Vrau 25-vjeçarin, 'arrest me burg' për efektivin e "Shqiponjave", Hajdaraj shfaq pendesë: Të jetë familja këtu, dua të kërkoj ndjesë publike

Gjykata ka dhënë masën ‘arrest me burg’ për efektivin e policisë, Nevaldo Hajdaraj, i cili vrau me armë zjarri mëngjesin e së martës 25-vjeçarin, Klodjan Rasha. 

Gjatë seancës gjyqësore Hajdaraj ka shfaqur pendesë duke deklaruar se nuk donte ta vriste Rashën, por e kreu aktin duke menduar se po i rrezikohej jeta. Hajdaraj thekson se ka njoftuar sallën operative për një njeri të dyshimtë dhe se gjithçka ka ndodhur për 4-5 minuta. 

"Merrni çfarë mase të doni, unë kam vrarë një njeri. Gjithçka ka ndodhur në orën 01.09 min për 4 ose 5 min ka qenë situata. Kam njoftuar sallën operative dhe kemi kërkuar përforcime për një njëri të dyshimtë. Kjo që ka ndodhur me mua s'do ja uroja askujt në jetë", ka thënë Hajdaraj duke kërkuar prezencën në seancë edhe të familjes së Klodjan Rashës, me qëllim që të ketë mundësi të kërkojë falje publike.

Efektivi i “Shqiponjave” u shpreh se ndërmori aktin se dyshonte që Klodian Rasha kishte armë zjarri në duar, gjë e cila nuk është konfirmuar pasi gjatë hetimeve u vu re se 25-vjeçari nuk kishte asnjë send të paligjshëm dhe Prokuroria bëri me dije se Klodian Rasha është qëlluar pas shpine.

Në kërkesën e Prokurorisë janë renditur faktet dhe është bërë zbardhur i gjithë mekanizmi sesi ka ndodhur ngjarja. Në një rindërtim të ngjarjes, sipas Prokurorisë rezulton se: “Në orën 01:09 minuta të datës 8 dhjetor oficerët e policisë i kanë bërë thirrje një personi, i identifikuar më vonë si Klodian Rasha, që të ndalonte por që ai është larguar dhe nuk i është bindur urdhrit të policisë.

Dy oficerët e policisë në shërbimë atë mbrëmje në territorin e Komisariatit nr.3 janë vënë në ndjekje të 25-vjeçarit dhe kanë pritur sa është futur në një rrugicë qorre”.

Ky është pikërisht momenti ku Nevaldo Hajdaraj shprehet se ka dyshuar që personi kishte armë pasi ai e kërcënoi se do ta vriste. Megjithëse, Hajdaraj nuk jep shpjegime se përse qëlloi direkt mbi Klodian Rashën, raporton gazetarja Klodiana Lala.

Sipas aktit të ekspertimit, njëri nga plumbat që i ka sjellë vdekjen 25-vjeçarit e ka kapur në shpinë, pikërisht në shpatullën e djathtë dhe më pas diagonalisht i ka prekur zemrën.

Mësohet se, dy efektivët që morën pjesë në ngjarjen e rëndë në rrugën “Dritan Hoxha” nuk kanë patur kamera trupi, por vetëm një pistoletë dhe antiplumb, dhe në momentin që ishin vënë në ndjekje të 25-vjeçarit kanë njoftuar sallën operative.

3 minuta më vonë kanë kërkuar një autoambulancë, por nuk kanë shpjeguar pse e kanë kërkuar atë. Kjo sipas Prokurorisë tregon që vrasja e Klodian Rashës ka ndodhur në harkun kohor të 3 minutave dhe nuk dihen saktësisht lëvizjet që kanë bërë efektivët gjatë kësaj periudhe.

Në orën 01:14 minuta, efektivët kanë deklaruar se ishte përdorur arma e zjarrit dhe mjekët kanë deklaruar faktin e tij të vdekjes në orën 01:23 minuta të datës 8 dhjetor.

Prokuroria ka deklaruar se është duke pritur një sërë aktesh të ekspertimit për të hedhur dritë mbi dinamikën e plotë të ngjarjes së rëndë, e cila është bërë shkak për nisjen e një vale protestash në kryeqytet dhe në qytete të tjera të vendit.

Mësohet se, hetimet e sapo nisura krahas Nevaldo Hajdarajt do të shtrihen edhe mbi mënyrën si është bërë planizimi i shërbimit, instruktazhin që efektivët kanë marrë, nëse kanë patur mangësi në instruktazh, si dhe po kryhet një hetim administrativ për të kuptuar nëse drejtues të tjerë të policisë kanë përgjegjësi mbi ngjarjen e ndodhur.

Seanca është mbajtur me dyer të mbyllura. Vetëm në momentin e dhënies së vendimit janë lejuar mediat, pasi Prokuroria thekson se ka mjaft sekrete të hetimit, por edhe kode të Policisë së Tiranës dhe Policisë së Shtetit, që nuk duhen bërë publike në media.