‘Vrava një njeri’, si një telefonatë zbardhi vrasjen me thikë në Xibër/ Flasin dëshmitarët

Një ngjarje e rëndë tronditi mbrëmjen e së mërkurës fshatin Xibër-Murrizë në Klos, ku 65-vjeçari Selim Velsula u masakrua me thikë pranë banesës së tij nga kushëriri, Hazbi Velsula. Ngjarja ndodhi më 11 qershor 2025 dhe trupi i viktimës u gjet me plagë të shumta të shkaktuara nga mjet prerës.

Pas kryerjes së krimit, autori i dyshuar u largua nga vendngjarja dhe qëndroi në arrati për disa orë. Ai telefonoi motrën duke i rrëfyer krimin: “E vrava një njeri”, çka çoi në njoftimin e menjëhershëm të policisë nga e afërmja. Hazbi Velsula u arrestua në mesnatë nga shërbimet e DVP Tiranë, teksa ishte fshehur në banesën e vëllait në lagjen Allias.

Sipas dëshmive të familjarëve, mes dy palëve nuk kishte konflikte të mëparshme. Rasim Velsula, kushëri i parë i viktimës, deklaroi:
“Kemi pasur hyrje-dalje të rregullta. Unë them që autori ka qenë në depresion, nuk e shpjegoj dot ndryshe. Është i ri, i pamartuar, jetonte në Tiranë me familjen. Vinte vetëm për të punuar tokat. Nuk kishim dijeni për ndonjë problem mes tyre.”

Policia e Shtetit ka zbardhur zyrtarisht ngjarjen dhe arrestimin e autorit:

Njoftimi i Policisë:

“Zbardhet ngjarja e ndodhur mbrëmjen e djeshme, ku u gjet pa shenja jete, dyshohet i vrarë me armë të ftohtë (thikë), shtetasi S.V. Vihet në pranga autori i vrasjes. Autori u kap në mesnatë nga shërbimet e DVP Tiranë, në Allias.

Specialistët e Seksionit për Hetimin e Krimeve kundër Personit në DVP Dibër, në bashkëpunim me Komisariatin e Policisë Mat, menjëherë pas ngjarjes së ndodhur më datë 11.06.2025, në fshatin Xibër-Murrizë, ku pranë pronës së tij u gjet pa shenja jete dhe me dëmtime në trup të shkaktuara me mjet prerës, shtetasi S.V., 65 vjeç, banues në këtë fshat, kanë organizuar punën për nxjerrjen e autorit përpara përgjegjësisë penale dhe për sqarimin e rrethanave të rastit.

Si rezultat i veprimeve të shpejta dhe profesionale hetimore, u zbardh dinamika e ngjarjes. Nga veprimet e kryera, dyshohet se shtetasit H.V. dhe S.V. fillimisht janë konfliktuar fizikisht për motive të dobëta dhe më pas shtetasi H.V. e ka goditur me armë të ftohtë (thikë) shtetasin S.V., duke i shkaktuar vdekjen.

Po në vijim të veprimeve, falë një informacioni të marrë nga Drejtoria Vendore e Policisë Tiranë për vendndodhjen e autorit të dyshuar, shërbimet e DVP Tiranë kapën në lagjen Allias dhe vunë në pranga autorin e dyshuar të ngjarjes, shtetasin H.V., 32 vjeç, banues në Allias, i cili pas krimit ishte strehuar në banesën e vëllait.

Në cilësinë e provës materiale, u sekuestrua arma e ftohtë (thikë), që dyshohet se është përdorur nga autori.

Materialet procedurale iu referuan Prokurorisë së Dibrës, për veprime të mëtejshme, për veprat penale “Vrasja me paramendim” dhe “Prodhimi dhe mbajtja pa leje e armëve të ftohta”.”