Washington Post artikull për zgjedhjet në Shqipëri: Garë e ngushtë mes PS dhe PD

Washington Post i ka kushtuar një artikull zgjedhjeve të mbajtura ditën e sotme në Shqipëri. Duke përmendur Exit Poll-et, media amerikane shkruan për një garë të ngushtë mes PS dhe PD-së. Më tej, thuhet se Presidenti Ilir Meta është kthyer në kundërshtarin më të fortë të qeverisë, duke e akuzuar kryeministrin Rama se ka marrë në dorë të gjitha pushtetet.

Artikulli i plotë:

Një sondazh për zgjedhjet parlamentare të Shqipërisë tregon që Partia Socialiste në pushtet është në një garë të ngushtë me Partinë Demokratike të opozitës.

Exit Poll-i i EuroneWs Albania nga MRB tregon që socialistët e krahut të majtë do të fitojnë rreth 46% të votave, ndërsa demokratët pritet të kapin rreth 42%. Është ende e paqartë nëse socialistët do të marrin 71 vende në parlamentin me 140 vende për të qeverisur vetëm.

Rreth 3.6 milion votues me të drejtë vote në Shqipëri dhe jashtë votuan për të zgjedhur 140 ligjvënës për një mandat katër-vjeçar në shtetin ballkanik.

"Procesi u karakterizua nga një situatë e qetë, siguri dhe integritet," tha Ilirjan Celibashi, kreu i Komisionit Qendror të Zgjedhjeve. Ai tha se fituesi do të dalë për 48 orë.

Shqipëria, një anëtare e NATO-s që nga viti 2009, po pret me padurim të nisë negociatat e anëtarësimit të plotë me Bashkimin Evropian dhe zgjedhjet e së dielës konsiderohen një moment kyç në atë rrugë.

Shpresa është që zgjedhjet e 10-ta parlamentare të Shqipërisë post-komuniste të jenë të lira dhe të ndershme. Deri më sot, votimi gjithmonë është shoqëruar nga parregullsi.

Pjesëmarrja paraprake ishte pothuajse 48%, pak më e lartë se katër vjet më parë. Kishte ca incidente. Makineritë e identifikimit elektronik nuk kanë funksionuar në 167 nga 5,199 vendvotime.

Një oficer policie u plagos me një sulm me thikë në qytetin verior të Pukës. Arsyeja pse ai u sulmua nga një burrë në një qendër votimi nuk është e qartë.

Kishte gjithashtu disa përpjekje për të fotografuar fletët e votimit, gjë që nuk lejohet me ligj, dhe disa përplasje fizike midis mbështetësve politikë kundërshtarë.

Kryeministri Edi Rama, i cili po kërkon mandatin e të tretë radhazi, dëshiron të zhvillojë turizmin, energjinë, bujqësinë dhe projektet dixhitale.

"Tani le të dëgjojmë njerëzit", tha Rama pas mbylljes së votimeve. Ai gjithashtu pretendoi fitoren duke thënë se "Shqipëria do të dalë fituese nga ky proces, jo vetëm partia që do të vazhdojë të qeverisë vendin".

Lulzim Basha i demokratëve ka akuzuar qeverinë për korrupsion dhe lidhje me krimin e organizuar dhe është zotuar të ulë taksat, të rrisë pagat dhe të sigurojë më shumë mbështetje sociale.

Duke folur për mbështetësit Basha pretendoi se partia e tij kishte fituar, por tha që numërimi duhet të mbahej në përputhje me ligjin.

Përballjet midis mbështetësve arritën kulmin të mërkurën në qytetin qendror të Elbasanit, ku një aktivist i Partisë Socialiste ndërroi jetë. Policia tha se viktima u qëllua nga një anëtar i Partisë Demokratike, gjatë një debati.

Megjithëse zyrtarisht i paanshëm, Presidenti Ilir Meta u kthye në një kundërshtar të fortë të qeverisë, duke akuzuar Ramën për përqendrimin e pushtetit legjislativ, administrativ dhe gjyqësor në duart e tij dhe drejtimin e një "regjimi kleptokratik".

Shumë vëzhgues të huaj nga Organizata për Siguri dhe Bashkëpunim në Evropë dhe ambasadat perëndimore monitoruan votimin. Ambasadorja amerikae Yuri Kim iu bëri thirrje kandidatëve dhe udhëheqësve politikë "të pranojnë gjykimin e votuesve" ndërsa ambasadori i BE Luigi Soreca gjithashtu i nxiti ata të respektonin "zërin e qytetarëve shqiptarë".