Zbardhen sms e kontrollorëve: Mua dhe Lolën na pushuan...prekën fundin

Janë zbardhur disa nga bisedat në celularët e sekuestruar nga prokuroria të kontrollorëve në kullën ajrore të aeroportit Nënë Tereza.

Nga veprimet hetimore në celularin e Flora Ndrecës është konstatuar se kjo shtetase ka komunikuar nëpërmjet aplikacionit “WhatsApp” me shtetasin Gersi Spaho, të cilit më 6 prill ora 21:12 i shkruan; “mua dhe Lolën na pushuan, se kemi dhënë dorëheqje të gjithë, por shyqyr që u kujtuan të bëhen bashkë, e prekën fundin”. Në datë 6 prill, ora 10:50 shtetasi Muhin Mezini i ka dërguar shtetasit Olsi Petri nëpërmjet aplikacionit “WhatsApp” foto të formularit “në 12 jam aty”.

Kujtojmë që me 7 prill në Prokurorinë e Tiranës u depozitua materiali kallëzues i dërguar nga Shoqëria Albcontrol sh.a., si dhe materialit kallëzues të referuar nga shërbimet e policisë gjyqësore në Komisariatin e Policisë Rinas, me anë të së cilës janë kallëzuar penalisht shtetasit Flora Ndreca, Muhin Mezini dhe Armando Fezga, si të dyshuar për kryerjen e veprës penale “Shpërdorimi i detyrës” kryer në bashkëpunim.

Në datë 6 prill ora 10:49, shtetasi Muhin Mezini i ka dërguar kontaktit të regjistruar me emrin Ezi, foto të formularit të paaftësisë së përkohshme të plotësuar në emër të tij, ndërsa bashkëbiseduesi Ezi i përgjigjet “e mira është të shkruash më shkurt”. Nga përmbajtja e bisedës së zhvilluar mes tyre në vijim, del se shtetasi Muhin Mezini e orienton shtetasin Ezi për mënyrën e përpilimit të formularit të paaftësisë së përkohshme të plotësuar në emër të tij.

Nga deklarimet provohet se shtetasit Flora Ndreca, Armando Fezga dhe Muhin Mezini, në bashkëpunim me njeri-tjetrin kanë ndikuar tek vartësit e tyre për të plotësuar formularin e paaftësisë së përkohshme për punë, me qëllim shmangien nga detyrim ligjor për të ushtruar detyrën e tyre funksionale në institucionin e rëndësisë së veçantë.

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm