Zgjedhjet lokale të 2019-ës, Gjykata Kushtetuese pezullon gjykimin dhe i drejtohet Komisionit të Venecias

Gjykata Kushtetuese ka pezulluar gjykimin për çështjen e zgjedhjeve lokale të 30 qershorit 2019. Mësohet se Gjykata Kushtetuese vendosi t'i drejtohet Komisionit të Venecias për marrjen e vendimit, ndërkohë që palët përfaqësuese kanë të drejtë të dërgojnë pyetje deri në 25 qershor.

Gjykata Kushtetuese nisi sot gjykimin për dekretin e Presidentit të Republikës, Ilir Meta, i cili anuloi 30 qershorin, si datën e zhvillimit të zgjedhjeve lokale dhe dekretoi 13 tetorin e atij viti si datën e ligjshme për këto zgjedhje.

Seanca erdhi pas kërkesës së kryebashkiakes së Shkodrës, Voltana Ademi, e cila si kryetare e Shoqatës së Bashkive, kërkon shpalljen si të pavlefshme të zgjedhjeve të 2019.

Gjatë seancës, Këshilli i Ministrave kërkoi pezullimin e procesit, derisa në gjykatën e Tiranës të zgjidhej konflikti i lindur mes Voltana Ademit dhe Pjerin Ndreut, për kryesimin e shoqatës, si dhe njëherazi që pjesë e procesit të ishte edhe Shoqata për Autonomi vendore. Të dyja kërkesa u rrëzuan nga shtatë gjyqtarët kushtetues.

Kujtojmë se në datën 8 qershor Voltana Ademi u shkarkua nga posti i kryetares së shoqatës së bashkive të Shqipërisë dhe në vend të saj u zgjodh kryebashkiaku i Lezhës, Pjerin Ndreu. Vendimi i marrë nga shoqata u konsiderua “nul” nga Ademi, e cila prentendon se ata që kanë votuar për shkarkimin e saj nuk janë pjesë të shoqatës. Ajo madje ka paditur në gjykatë kryebashkiakun e Lezhës, Pjerin Ndreun, ku kërkon që të shpallen të paligjshme zgjedhjet e tij në postin që dikur e mbante ajo.

Në vijim, seanca plenare u ndërpre për një orë, duke iu dhënë mundësinë palëve për të njohur me dokumentet.

Më pas, për disa orë, trupa e gjyqtarëve kushtetuese dëgjoi argumentet pro dhe kundër të palëve. Avokati Jordan Daci që përfaqëson Voltana Ademin tha se kërkesa e Shoqatës së Bashkive duhet pranuar pasi zgjedhjet vendore të 30 qershorit u zhvilluan pa një dekret të presidentit.

Përfaqësuesja e Këshillit të Ministrave, Elira Kokona në fjalën e saj në mbledhjen e Gjykatës Kushtetuese u shpreh se ky proces ka të bëjë me votuesit dhe se sipas saj për aq kohë sa kërkuesi nuk është as votues dhe as subjekt politik , atëherë ka devijim total të aspekteve procedurale të një shqyrtimi kushtetues.

Ajo gjithashtu theksoi se qëllimi i vet ekzistencës së Shoqatës nëpërmjet kryetarëve, nuk mundet të kryesohet apo përfaqësohet nga ish-kryetarë.

Ademi: E bindir që GJK do të japë drejtësi për të drejtat e qytetarëve

Pas pezullimit nga ‘Kushtetuesja’, e para që ka reaguar në rrjetet sociale ka qenë Voltana Ademi, e cila shkruan se Gjykata Kushtetuese do të vendosë kthimin në jetë të pluralizmit politik në nivel vendor dhe për rrjedhojë edhe të demokracisë vendore.

“Në Gjykatën Kushtetuese sapo ka përfunduar seanca plenare për shqyrtimin e kërkesës së Shoqatës së Bashkive të Shqipërisë lidhur me "zgjedhjet" e 30 qershor 2019.

Së pari, dua të falenderoj të gjitha mediat që më kanë ndjekur në këtë betejë për demokracinë dhe pluralizmin vendor.

Së dyti, falenderimi shkon për trupën e Gjykatës Kushtetuese, për kohën dhe përkushtimin e tyre në mbrojtje të parimeve kushtetuese dhe të drejtave të njeriut.

Ky proces ka rëndësi madhore për themelet e demokracisë dhe pluralizmit dhe shpresojmë që gjykata të kontribuojë, përmes shqyrtimit të kërkesës sonë, në rregullimin e këtyre themeleve që janë tronditur nga "zgjedhjet" e 30 qershorit dhe mos të përsëriten më të tilla raste.

Jemi krenarë nga ana tjetër, pasi është një arritje me vete që ky proces u konceptua dhe u nis nga Shoqata e Bashkive të Shqipërisë, si pjesë e shoqërisë civile që ndërhyn për të bllokuar veprime arbitrare të politikës.

Kam bindjen që pluralizmin nuk do ta asgjësojë asnjë autokraci dhe se Gjykata Kushtetuese do të vendosë kthimin në jetë të pluralizmit politik në nivel vendor dhe për rrjedhojë edhe të demokracisë vendore.

Kam bindje që GJK do të japë drejtësi për të drejtat e qytetarëve, drejtësi kushtetuese, drejtësi për pluralizëm, drejtësi për shtet dhe pushtet pluralist, drejtësi për çdo institucion aktor dhe faktor që kanë detyrim të zbatojnë Kushtetutën dhe vetëm Kushtetutën”, shkruan Ademi.