“Armët po transportohen me ambulanca”, si e paralajmëroi deputetja britanike sulmin në veri të Kosovës

Më 4 korrik 2023, deputetja britanike Alicia Kearns në një status në platformën “X”, shkroi se Serbia ishte duke furnizuar me armë veriu e Kosovës.

Ajo tha konkretisht se armatimet po transportoheshin me ambulanca dhe po fshihen brenda Kishës Orthodokse Serbe.

“Qeveria është e vetëdijshme, dhe ushtarët tanë të sapo kthyer nga shërbimi në KFOR, se ka armatim që kontrabandohet nga kufiri prej Serbisë në kishat ortodokse me ambulanca. Kur trupat tanë janë në dijeni për këtë dhe përpiqen të marrin leje dhe t’i kapin, leja zgjatet shumë. Deri në momentin që sigurohet leja befasishëm’ – një ambulancë u paraqit në kishë dhe nxori përsëri të gjitha armët”, shkruante Kearns.

Deputetja asokohe bëri thirrje të ndaleshin të gjitha eksportet drejt Serbisë.

Por çfarë ndodhi mëngjesin e 24 shtatorit në Zveçan?

Një grup agresorësh serb sulmuan Policinë e Kosovës me armë zjarri dhe granata dore. Si pasojë, mbeti i vrarë efektivi Afrim Bunjaku dhe u plagos një tjetër. Të shtënat vijuan edhe pas vrasjes, ndërsa Policia e Kosovës nisi një aksion për arrestimin e agresorëve.

Rreth 30 ushtarë serb kishin marshuar të armatosur rëndë drejt veriut duke sulmuar policinë. Tre prej tyre u vranë ndërsa 6 të tjerë u arrestuan dhe pritet të dalin sot në Gjykatë.

Policia sekuestroi një sërë armësh, municione luftarake, eksplozivë dhe autoblinda.

Kearns ka deklaruar në platformën “X” të hënën se dislokimi i trupave të KFOR-it duhet të bëhet nga një grup më i madh i shteteve anëtare. Po ashtu, ajo është shprehur se duhet të nisë një hetim për vrasjen e Afrim Bunjakut.

“Mbretëria e Bashkuar si anëtare e QUINT-it duhet të marrë një rol më aktiv në dialogun e paqes ndërmjet Serbisë e Kosovës - pasiviteti aktual është i paqëndrueshëm. Britania e Madhe nuk është më e kufizuar nga konsensusi dhe mosnjohësit e BE-së, kështu që duhet të jetë më muskulore dhe dinamike në përpjekjet diplomatike. Ne kemi nevojë për një shtyllë kurrizore në Ballkan”, shkruan Kearns.

Ajo thekson se Qeveria e Serbisë duhet të angazhohet për normalizim të raporteve me Kosovën “dhe t’i japë fund retorikës radikalizuese dhe ndarjeve etnike që nxisin urrejtje”.

“Qeveria e Kosovës duhet të përvijojë përkushtimin e saj për të mbështetur komunitetet serbo-kosovare, duke siguruar përfaqësimin dhe pjesëmarrjen e tyre aktive në demokraci pa ndërhyrje të pajustifikuara të huaja. BE-ja duhet të angazhojë pesë shtetet e BE-së që nuk e njohin sovranitetin e Kosovës për të mbështetur trajektoren e Kosovës drejt anëtarësimit në BE dhe NATO, duke forcuar paprekshmërinë e integritetit të saj territorial.

Policia e Kosovës do t’i hetojë grupet paraushtarake përgjegjëse për vrasjen e oficerit Afrim Bunjaku. Si financohen, armatosen dhe si transportojnë armë në/përreth Kosovës. Nga kush i marrin udhëzimet e tyre? KFOR-i dhe EULEX-i duhet të ndihmojnë hetimet dhe të ndajnë të gjithë inteligjencën mbi depot e armëve dhe lëvizjet me Qeverinë e Kosovës dhe vendet anëtare, për të ndihmuar në përgjigjen e shqetësimeve rreth përfshirjes së aktorëve të Beogradit në vrasjen e oficerit të policisë kosovare dhe bllokadat e orkestruara të rrugëve. Nëse imazhet fillestare janë të sakta, KFOR-i duhet t’i hetojë automjetet dhe sistemet e armëve që i kishte, ato që ne duhet të supozojmë tani për tani janë të rreme, ngjitëse që mbajnë emrin e tyre”, shton deputetja britanike.