Ekspozoi lidhjet mes fondacionit të Xoxës dhe kompanisë së inceneratorit, si u kërcënua gazetari holandez pas publikimit

Gazetari holandez, i cili prej vitesh jeton dhe shkruan për Shqipërinë Van Gerven Oei publikoi pak muaj më parë një artikull i cili ekspozonte lidhjet mes fondacionit “Harabel” i drejtuar nga Arjola Xoxa, bashkëshortja e kryetarit të bashkisë Erion Veliaj, me kompaninë Integrated Energy BV SPV e hetuar nga SPAK për korrupsion me Inceneratorin e Tiranës.

" Siç dëshmohet nga dosja e Ahmetaj, Integrated Energy BV SPV iu dha koncesioni i Sharrës falë nismës dhe mbështetjes së kryebashkiakut Veliaj, bashkia e të cilit është gjithashtu përgjegjëse për pagesat për Integrated Energy BV SPV për një periudhë 30 vjeçare. Në këmbim, kompania bëri gjestin e vogël të mbështetjes së karrierës së sapolindur kuratoriale të gruas së kryebashkiakut duke sponsorizuar një park skulpture në landfillin që menaxhon.

Në të gjithë këtë, artisti Sislej Xhafa, i cili kishte zgjedhur në mënyrë spontane vendin “pa asnjë sugjerim paraprak”, siguronte një fasadë respekti, ndërsa në praktikë lehtësoi artshpëlarjen e një koncesioni të menaxhuar në tokë të larë me gjak dhe në kurriz të qytetarëve të Tiranës, të cilët tashmë po përballen me një rritje të madhe të kostove të grumbullimit të mbetjeve", thuhet ndër të tjera në artikullin e shkruar në uebsajtin e The Albanian Mechanism.

“Pas më shumë se një dekade të sundimit de facto një partiak, Partia Socialiste e kryeministrit Edi Rama ka ndërtuar një mekanizëm qeverisës të ndërlikuar, i bazuar në pastrimin masiv të parave të drogës ndërkombëtare, të maskuar me një fasadë kulturore të ofruar nga servilë të shumtë nga bota ndërkombëtare e arkitekturës dhe artit”, shkruhet po ashtu në artikull. 

Kërcënimet

Pas shkrimit, Van Gerven Oei u përball me një seri sulmesh nga artisti shqiptar Driant Zeneli, i cili përmendet në artikullin e tij. Zeneli është bashkëthemelues i fonacionit “Harabel”. 

Asokohe, Vincent tha se sulmet e përsëritura të Zenelit u përshkallëzuan, deri sa në 4 shtator Zeneli së bashku me 3 persona të tjerë u afruan në galerinë “Zeta” për t’u konfrontuar me të. 

“Ata përdorën një gjuhë agresive dhe homofobike, duke tentuar ta sulmonin fizikisht. Ndërhyrja e personave të tretë ndaloi përshkallëzimin e situatës”, thuhet në reagimin e rrjetit Safe Journalist për ngjarjen.

Organizata të medias reaguan të alarmuara pas publikimit të një serie mesazhesh kërcënuese që Driant Zeneli, i cili sëbashku me bashkëshorten e kryebashkiakut Erjon Veliaj, Ajola Xoxe, është bashkëthemelues i fondacionit “Harabel” bëri ndaj gazetarit holandez Vincent van Gerven Oei.

“The SafeJournalists Netëork është thellësisht i alarmuar nga kërcënimet ndaj gazetarit holandez Vincent van Gerven Oei, i cili publikoi një arikull kritik me titull “Si të lash art dhe para përmes koncesionit të menaxhimit të mbetjeve””, thuhet në reagimin e rrjetit Safejournalist, që përfshin organizata të medias në të gjithë Ballkanin Perëndimor.

Asociacioni i Gazetarëve të Shqipërisë po ashtu u shpreh i shqetësuar për sigurinë e gazetarit. “AGSH dënon me vendosmëri çdo kërcënim, intimidim dhe shantazh ndaj gazetarëve”, thuhet në reagim.

Në një sërë mesazhesh të publikuara nga gazetari Zeneli përdor gjuhë fyese dhe më pas e kërcënon të mos shkruaj. “Mos guxo të më shkruash më personalisht se e ke policin te dera”, thuhet në një nga mesazhet e Zenelit që van Gerven Oei ndau me median.

Vetë gazetari i cilësoi këto sulme të përditshme, ndërsa tha se kolegët nga Shqipëria e vuanin më shumë presionin për shkak se veç tyre sulmoheshin edhe familjet e tyre. “Ky është abuzimi dhe kërcënimi që kolegët e mi shqiptarë vuajnë në përditshmëri e sa herë raportojnë për lidhjet mes qeverisë, oligarkëve dhe kapitalistëve të kulturës”, shkroi ai në një mesazh në Instagram, ku denoncoi kërcënimet.

“Ky incident ngre shqetësime serioze mbi sigurinë e gazetarëve në Shqipëri, sidomos kur raportojnë mbi tema sensitive që përfshijnë figura të fuqishme”, thuhet më tej në reagim, ku kërkohet hetim i kërcënimeve.  Më herët në shtator edhe ambasadori i Holandës në Shqipëri dha një mesazh solidariteti me gazetarin van Gerven Oei.