Nga refugjatët në Lezhë te Shqipëria në “Euro 2024”, ç’pritet të ndodhë në 2024-ën

Një vit të tensionuar po lëmë pas, e i tillë pritet të nisë edhe 2024-ën.

Politiko.al ka renditur më poshtë disa nga ngjarjet më të rëndësishme që pritet të shënojnë këtë vit në Shqipëri, të cilat sjellin për rjedhojë edhe debate të shumta.

Shqipëria pritet të hapë një kamp për refugjatët që zbarkojnë në Itali

Kryeministri i Shqipërisë Edi Rama deklaroi sot në Romë se ka pranuar një marrëveshje me qeverinë italiane për pranimin e mijërave refugjatëve nga ata që zbarkojnë çdo ditë në Itali, të cilët do të mbahen në dy struktura në Lezhë në pritje të trajtimit të kërkesës së tyre për azil.

E para do të jetë në Portin e Shëngjinit, ku do të jetë akomodimi i parë i emigrantëve, regjistrimi i tyre, kontrolli i parë dhe nisja e tyre për në strukturën tjetër, e cila do të ndërtohet vetëm 20 kilometra me tutje, ose rreth 30 minuta larg, në fshatin Gjadër në Lezhë. Aty do të qëndrojnë deri në përfundimin e shqyrtimit të kërkesës për azil.

Marrëveshja, e cila ka ngjallur mjaft kundërshtime si nga opozita shqiptare ashtu edhe ajo italiane, pritet të vihet në zbatim në pranverë të 2024-ës.

Situata e trazuar politike në Shqipëri

Bllokimi prej disa javësh i punimeve të parlamentit nga deputetët e PD, të kryesuar nga Sali Berisha, hedhja në foltore i bombave tymuese dhe aksioni i mosbindjes civile të ndërmarrë nga ky grupim ka sjellë një situatë të trazuar politike në Shqipëri.

Për pasojë Kuvendi ka përjashtuar herë pas herë deputetët demokratë nga seancat parlamentare. Berisha ndërkohë ka përsëritur se ky aksion opozitar do të vijojë deri në plotësimin e kushteve të kërkuara.

Që pas komisionit të bujshëm për aferën e inceneratorëve, mazhoranca ka refuzuar çdo kërkesë tjetër të opozitës, duke mohuar të drejtën kushtetuese për të kontrolluar qeverisjen, me pretendimin se ligji në fuqi ka nevojë për rregullime. Rrëzimi i kërkesave për komisionet hetimore parlamentare e ka shtyrë opozitën e drejtuar nga Berisha që të radikalizojë qëndrimin e vet në Kuvend.

PD çon në Kushtetuese marrëveshjen Rama-Meloni për emigrantët

Thuajse me të njëjtën përmbajtje të padisë por me kërkesë të dorëzuar nga deputetë të ndryshëm, PD është paraqitur sërish e përçarë përballë Gjykatës Kushtetuese ku kërkon kundërshtimin e marrëveshjes për emigrantët të firmosur mes krerëve të qeverive shqiptare dhe italiane, Rama – Meloni.

PD kërkon shfuqizimin e kësaj marrëveshje, që sipas PD-së është antikushtetuese, ndërsa në vendimi i Gjyaktës Kushtetuese pritet vitin që vjen.

Gjyqi për vulën e PD-së

Gjykata e Tiranës ka pezulluar disa herë çështjen për shqyrtimin e kërkesës së Lulzim Bashës për miratimin e Kuvendit Kombëtar të 2 Shtatorit, duke pranuar kërkesën e grupit të deputetëve të drejtuar nga Gazment Bardhi.

Sipas Gjykatës ndryshimet statutore mund të regjistrohen deri kur të ketë vendim të formës së prerë për 2 çështjet e tjera, atë në Gjykatën e Lartë për Kuvendin e Berishës më 11 dhjetor 2021 dhe kërkesa e Bardhit për ndryshimin e emrit të kryetarit në listën e partive.

Gjykata e Apelit ka në shqyrtim edhe disa çështje të tjera që lidhen me konfliktin brenda PD-së, pasi më 16 maj, janë depozituar edhe dy padi të anëtarëve të Komisionit të Rithemelimit, mbështetës të Sali Berishës.

Konflikti brenda Partisë Demokratike mbeti i pazgjidhur në rrugë gjyqësore edhe për vitin 2023 dhe pritet të vijojë edhe në 2024, pasi Gjykata e Apelit shtyu seancën e radhës për shqyrtimin e ankimit të mbështetësve të Lulzim Bashës. 

Beleri kthehet në “çështje diplomatike” mes Shqipërisë dhe Greqisë

Çështja e betimit të kryebashkiakut të zgjedhur të bashkisë Himarë, Fredi Beleri është bërë temë kryesore edhe në marrëdhëniet mes Greqisë dhe Shqipërisë. Shteti grek vijon të mos pranojë firmosjen e letrës që do të hapte negociatat e Shqipërisë më Bashkimin Evropian. Sipas Greqisë moslejimi i Belerit për t’u betuar si kryebashkiak, është vendim politik i qeverisë.

Gjykata e Posaçme ka shtyrë disa herë seancat për këtë rast, ndërsa procesi pritet edhe këtë vit.

Beleri u arrestua vetëm 2 ditë para zgjedhjeve lokale të 14 majit, pasi u kap në flagrancë bashkë më bashkëpunëtorin e tij Pandeli Kokaveshi duke blerë vota. Beleri nuk ka mundur të marrë detyrën, pasi autoritetet gjyqësore nuk i dhanë leje për të kryer betimin.

 

KE: Rritja e Shqipërisë pritet të ngadalësohet në 2024, nga çmimet e larta dhe efektit të forcimit të lekut te eksportet

Ekonomia shqiptare pritet të ngadalësohet në 2024 , sipas raportit të Komisionit Europian, i ndikuar nga ngadalësimi i konsumit privat si rrjedhojë e çmimeve të larta, frenimit të punësimit dhe efektit negativ që po jep në konkurrueshmërinë e eksporteve forcimi i lekut.

Edhe investimet privat priten në rënie si rrjedhojë e shtrëngimit të kushteve të financimit po ashtu dhe ato publike, pasi do të kërkohen më shumë fonde për politikën e rritjes së pagave. Sektori që pritet të ketë ecurinë më të mirë është ai i turizmit, i ndikuar nga oferta e lirë e Shqipërisë dhe përmirësimi i infrastrukturës dhe alternativave turistike.

Në Shqipëri inflacioni pritet të ulet në 3% në 2024

Gjatë takimeve me përfaqësuesit e FMN-së dhe BB-së, Guvernatori Gent Sejko u shpreh se Shqipëria, si edhe vendet e tjera, u prek nga goditjet e pafavorshme ekonomike globale. Inflacioni në Shqipëri filloi të rritet në fund të vitit 2021, u përshpejtua me shpërthimin e agresionit të Rusisë në Ukrainë, arriti kulmin në tetor 2022 dhe filloi të ngadalësohej gradualisht më pas.

Ndërkohë, parashikimet tregojnë për një reduktim gradual të tij, me një kthim në objektivin tonë prej 3% që pritet të arrihet në mesin e vitit 2024.

“Euro 2024”, Shqipëria në “grupin e vdekjes”

Shorti i grupeve për Evropianin e vitit 2024, që do të mbahet në Gjermani nga 14 qershori deri më 14 korrik, e ka vendosur Shqipërinë në grupit B bashkë me Spanjën, Kroacinë dhe Italinë,.  

15 qershor: Italia – Shqipëria, Dortmund

19 qershor: Kroacia – Shqipëria, Hamburg

24 qershor: Shqipëria – Spanja, Dusseldorf

Fjalori i ri i shqipes/ Pritet të botohet në 2024, më shumë fjalë e shprehje se fjalori i 1980

Pas 43 vitesh nga botimi i Fjalorit të Gjuhës Shqipe, gjuhëtarët në të gjitha trevat shqipfolëse po punojnë për hartimin e një fjalori të ri të shqipes.

Fjalori i ri po hartohet mbi parimin e përfshirjes së të gjitha fjalëve të traveve shqiptare, përfshirë edhe leksikun e arbërishtes që përcjellin vlera kuptimore, stilistike dhe nocionore.

Fjalori i ri i Gjuhës Shqipe, me rreth 110 mijë fjalë dhe mbi 11 mijë shprehje frazeologjike, pritet të botohet këtë vit.