Nga Tirana në Elbasan, incidentet parazgjedhore që po ‘ndezin' fushatën e 25 prillit

Ndërsa na ndajnë disa javë nga zgjedhjet e 25 prillit, fushata (ende jo zyrtare) ka nisur e tensionuar.

Vetëm gjatë ditëve të fundit janë shënuar tri episode që kanë paraprirë situatën parazgjedhore, ngjarje që kanë shkaktuar debate të shumta në politikë dhe në media.

Në 12 shkurt, Presidenti Ilir Meta u përplas fizikisht me efektivët e Policisë Bashkiake, pasi shkoi në zyrat e Frymës së Re Demokratike ku takoi nga afër kreun e partisë, Sali Shehu. “Dilni nga zyrat ose do t’ju çoj në burg me duart e mia”-u shpreh Meta me tone të ashpra, ndërsa përplasja fizike ka vijuar derisa të gjithë dolën jashtë. Policët Bashkiakë kishin shkuar me qëllim që FRD-ja të lironte zyrat. 

Meta e konsideroi urdhrin për lirimin e zyrave të FRD-së dhe përplasjen me policinë si "grusht shteti”.

Incidenti në ditën e Verës

Dita e Verës në Elbasan u shoqërua me përplasje politike mes PD dhe PD. Kryeministri Edi Rama dhe kreu i PD, Lulzim Basha vizituan qytetin në të njëjtën kohë dhe kjo shkaktoi një incident mes simpatizantëve të të dyja forcave.

Sapo kryeministri Edi Rama hyri në bulevardin kryesor, një grup personash të cilët ishin mbledhur për të pritur kryetarin e Partisë Demokratike Lulzim Basha thirrën “Rama ik”.

Kjo shkaktoi reagimin e mbështetësve të socialistëve duke krijuar një situatë të tensionuar. Pas kësaj Basha dhe Rama kanë akuzuar njëri tjetrin të dielën.

Basha u shpreh se Rama erdhi i shoqëruar nga bandat e Elbasanit.

“Rama e sheh qeverinë si një tortë ta ndaj me bandat. Ne do t’ia kthejmë vendin qytetarëve”, tha Basha nga Elbasani.

“Pas takimit u vonova pak sepse më thanë se kishte pasur një incident. Unë do të vazhdoj me axhendën time dhe nuk do të ndaloj sepse Shqipëria ka ndaluar boll për 8 vite. Kështu që më ndiqni.

Nuk ka shans që Edi Rama dhe bandat e tij ta mbajnë peng Elbasanin. Ju uroj nga zemra Gëzuar Ditën e Verës”, tha Basha.

Nga ana tjetër Rama tha se me Bashën nuk ishte armik dhe se nuk kishte arsye përtej betejave dhe ballafaqimeve politike të ndodhte ai incident.

Ndërsa në një koment në Tëitter, Rama shkroi se ngjarja ishte ‘shembull i degradimit të një opozite demode, e cila ka në krye një kukull në duart e Saliut dhe Ilirit, që duan sherr e përçarje, për të marrë peng Shqipërinë e drejtësinë!’

“Keqardhje e madhe për PD-në e kthyer në vegël e dy hallexhinjve të drejtësisë! Tash 20 vjet që vij në ditën e verës në Elbasan, s’kisha parë një turmë ulëritëse me flamuj partie, si ai automobili zhurmues i filmit “Koncert në vitin 36”!

Dukeshin si 100 kopje të Ilir Metës, ndërsa Luli kishte parkuar makinën në korsinë e biçikletave e ishte fshehur mes tyre!”, shkroi Rama.

Pas përplasjes, PD zbuloi emrat e mbështetësve të PS në Elbasan që u përfshinë në konflikt.  Sekretari i Përgjithshëm i PD-së, Gazmend Bardhi listoi emrat e atyre që i cilësoi si element kriminal të ekipit të Ramës në Elbasan.

Lista emërore si vijon:

KELMEND YMER XHAFERRI, ka qënë më parë i dënuar për disa vepra penale dhe i përfshirë në incidentin kundër punonjësve të policisë në Elbasan tek Tregu Ushqimor, duke thyer me forcë postobllokun e policisë.

NINO, anëtar i krimit të organizuar.

MARSEL RROKAJ, anëtar i krimit të organizuar dhe djali i Agron Rrokës, drejtori i burgut Elbasan.

ERIS SKILJA, anëtar i krimit të organizuar.

NALDI METAJ (i njohur me pseodonimin BABALJA), anëtar i krimit të organizuar.

GËZIM RUSI, anëtar i krimit të organizuar.

Përplasje fizike Boçi –Luca

Incidenti i radhës u shënua këtë të enjte, kur kandidati për deputet i Partisë Demokratike në Elbasan, Luçiano Boçi, është përplasur fizikisht me biznesmenin  njohur Gjergj Luca në një lokal në Labinot.

Lidhur me rastin në fjalë është bërë ekspertiza mjekoligjore, por ende ekspertët nuk kanë dalë në një përfundim zyrtar. Ende nuk është e qartë se cila ka qenë arsyeja e përplasjes.

Boçi është i shtati në listën e Partisë Demokratike për Elbasanin.

Letra e presidentit

Një ditë më parë, Presidenti i Republikës Ilir Meta i është drejtuar me një letër zyrtare Komisionit Qëndror të Zgjedhjeve dhe Kuvendit për situatën e zgjedhjeve dhe për sulmin në zyrën e FRD.

Meta u shpreh në letër se “situata parazgjedhore është cënuar rëndë” në prag të zgjedhjeve të 25 prillit.