Pesticidet, salmonela apo inekzistenca e institucioneve: Kush po e vret sigurinë ushqimore?

Siguria ushqimore në Shqipëri është tronditur përgjatë muajve të fundit të 2025-ës. Duke filluar nga mishi i pulës i ardhur nga Brazili i kontaminuar deri te pjeshkët me përmbajtje nikeli, shqiptarët po ekspozohen ndjeshëm përballë rreziqeve që kanosen nga konsumi i tyre.

Por, çfarë po ndodh me sigurinë tonë ushqimore? Kush po i helmon tryezat e qytetarëve?

Institucionet përgjegjëse heshtin ose reagojnë vetëm pas denoncimeve mediatike, duke e kaluar fajin në hallkat më të vogla.

Mish i kontaminuar me salmonelë

18.3 ton fileto pule të importuara nga Brazili rezultuan të kontaminuara me bakterin Salmonella, ngarkesë e cila u zbulua në Portin e Durrësit. Por skandali nuk ndalet këtu: 13.1 ton nga kjo sasi u hodhën në treg përpara se Autoriteti Kombëtar i Ushqimit (AKU) të njoftonte publikisht kontaminimin.

Ministrja e Bujqësisë, Anila Denaj, tha se AKU e kishte kryer detyrën dhe se tashmë çështja i takonte institucioneve përkatëse, duke hequr përgjegjësinë nga ministria të cilën drejton.

“Situata e AKU është e qartë; agjencia ka kryer detyrën dhe ka realizuar kontrollet e nevojshme. Sigurisht, lajmi është bërë publik, janë konfirmuar përgjigjet e analizave dhe i gjithë zinxhiri i kontrollit, për të cilin AKU ka denoncuar ata që kanë shkelur protokollet. Çështja i takon insitucioneve si krimi ekonomik, policia që duhet të japin gjykimin përkatës”, u shpreh Denaj.

Kompania që importoi mishin e pulës me salmonelë është ‘AMG Food’, produktet e së cilës në treg gjenden me emrin ‘diMal’. Arben Goxha, pronari i kompanisë ‘AMG Food’ u ndalua një muaj pasi ishte shpallur në kërkim për t’u hetuar më pas në gjendje të lirë.

Skandali është se konsumatorët u njoftua nga AKU 1 javë pas analizave që faktuan prani të salmonelës në mishin e pulës, çka tregonte se një pjesë e mirë e mishit ishte konsumuar nga shqiptarët.

Qumësht me alfatoksinë

Në muajin Prill mediat denoncuan se në treg qarkullonte qumësht me përmbajtje alfatoksine, një toksinë e krijuar nga myku që rritet tek drithërat, misri dhe gruri.

Nga 26 mostra të marra nga janari deri në prill 2025, 10 prej tyre kanë rezultuar pozitive dhe sipas specialistëve 40% e qumështit të kontrolluar ishte i kontaminuar mbi normat e sigurisë ushqimore.

Sasia e kontaminuar u tërhoq nga tregu i shitjes. Sipas analizave, kontaminimi tejkaloi kufirin maksimal të vendosur nga BE.

Kroacia bllokon domate dhe pjeshkë me pesticide

Kroacia ka asgjësuar 4 ton me domate shqiptare, pasi ato rezultuan të ishin të spërkatura 5 herë më tepër se norma e lejuar me chlorfenapyr. Në njoftim të EFSA u publikua rezultati i analizave laboratorike, ku niveli i ngarkesës së lejuar është 0.01mg\kg, ndërsa rezultati kapte vlerën e 0.06 mg\kg. Domatet janë prodhuar në tokat bujqësore të Beratit.

Më 22 gusht po Kroacia, ka asgjësuar 5 ton pjeshkë nga Divjaka, pasi u gjet prezencë e lartë e metalit të rëndë nikel.

Produktet u ndaluan nga shteti kroat para se të hidheshin në treg dhe të bliheshin për konsum nga qytetarët.

AKU, në një reagim, njoftoi se as marrjes së alarmit nga autoritetet kroate ka nisur inspektimin dhe në magazinat ku janë tregtuar pjeshkët, nuk është gjetur produkt. I gjithë malli është dërguar për eksport dhe nuk ka dalë në tregun shqiptar.

Neglizhenca e autoriteteve po helmon konsumatorin

Rastet që kanë kërcenuar sigurinë ushqimore kanë qenë të shumta, por reagimi i autoriteteve është zhgënjyer. Ministria ia ka kaluar topin AKU-së, kur ky i fundit në disa raste, as nuk e ka identifikuar kompaninë që ka tregtuar produktin e kontaminuar.

Në kushtet kur askush nuk merr përgjegjësi për një problem që kërcënon sigurinë ushqimore dhe vë në rrezik shëndetin e konsumatorit, mbetet ende pa përgjigje pyetja: Kush po na helmon tryezën?

Institucionet duhet t’i shohin rastet si këmbana alarmi dhe të marrin masa për të mos lejuar më që produktet të cilat hidhen në treg, qoftë për konsum në Shqipëri apo për eksport jashtë, të vendosin në rrezik shëndetin e konsumatorit.

Por, autoritetet bëjnë të kundërtën: një sy qorr e një vesh shurdh./ Politiko. al/ K. T