Pse nuk ndalet dot rrjedhja e tezave të maturës? Ministria e Arsimit për Politiko: Procesi mbeti i paprekur

Suela Gjidede

Pavarësisht deklaratave zyrtare për një proces “të garantuar dhe të besueshëm”, maturantët edhe këtë vit u përballen me një realitet shqetësues. 

Testet e Maturës Shtetërore 2025 qarkulluan në rrjetet sociale pak pas fillimit të proviemeve, duke ngritur dyshime serioze për ruajtjen e konfidencialitetit dhe integritetit të procesit.

Lidhur me këtë fenonem tashmë thuajse të përvitshëm, Politiko.al iu drejtua zyrtarisht Ministrisë së Arsimit dhe Sportit me një kërkesë se sa është cënuar integriteti i procesit të provimeve dhe çfarrë masash janë marrë për të parandaluar raste të tilla në provimet e ardhshme. 

Në përgjigjen që morëm, ministria thekson se çdo rast është trajtuar me përgjegjësi dhe se asnjë prej incidenteve nuk ka ndikuar në vlefshmërinë e testimit, megjithatë mbetet e paqartë se sa efektive kanë qenë masat parandaluese dhe nëse transparenca institucionale ka qenë në nivelin e duhur.

"Ministria e Arsimit dhe Sportit, me institucionet e saj përgjegjëse Qendrën e Shërbimeve Arsimore, Agjencinë Kombëtare të Arsimit Parauniversitar si dhe me angazhimin e strukturave vendore arsimore, administratorëve dhe vlerësuesve të provimeve, ka garantuar zhvillimin me përpikëri të procesit të Maturës Shtetërore 2025, në përputhje me standardet e organizimit, konfidencialitetit dhe korrektësisë së testimit.

Ky angazhim i strukturave është shoqëruar me masat përkatëse në të gjitha hallkat e procesit nga trajnimi i administratorëve, përgatitja e testeve, shpërndarja dhe administrimi në terren, monitorimi i procesit dhe deri te vlerësimi përfundimtar.

Ministria, përmes strukturave, me verifikimin e rasteve të publikuara në rrjete sociale pas nisjes së provimit, ka trajtuar me përgjegjësi çdo rast, duke ndjekur procedurat administrative, sipas rregullores së maturës shtetërore.

Theksojmë se çdo tentativë për shpërndarjen e testit në rrjetet sociale pas nisjes së provimit, nuk ka ndikuar në vlefshmërinë apo integritetin e procesit, i cili është zhvilluar në përputhje me të gjitha protokollet, bazuar në rregulloren e Maturës Shtetërore.

Ministria e Arsimit dhe Sportit mbetet plotësisht e angazhuar në garantimin e një procesi të drejtë, të besueshëm dhe të barabartë për të gjithë maturantët", thuhet në përgjigjen e ministrisë së Arsimit për Politiko.al. 

Rrjedhja e testeve, një problem i përsëritur

Fenomeni i publikimit të testeve të Maturës Shtetërore në rrjetet sociale pak minuta pas nisjes së provimeve është raportuar nga media edhe vitet e shkuara.

Konkretisht, në provimin e matematikës të këtij viti, teza u publikua në rrjette sociale brenda pak minutash nga fillimi i testimit, duke detyruar Ministrinë të reagojë me deklarata që mohonin ndikimin në integritetin e procesit.

Ekspertë të arsimit kanë ngritur vazhdimisht shqetësimin se rrjedhja e testeve, edhe nëse ndodh pas nisjes zyrtare të provimit, minon besimin publik.

Në një intervistë në Politiko.al, pak ditë më parë pedagogu dhe eksperti i njohur i arsimit, Ndriçim Mehmeti kritikoi mungesën e transparencës nga institucionet, heshtjen e politikës dhe manipulimin e procesit arsimor për qëllime elektorale. 

"Vetë QSHA ka nxjerrë të dhëna që me dhjetëra maturantë marrin nota plus. Nëse i referohemi shifrave, ka 200-300 maturantë me 4 ose 5 nota plus. Si nuk u cënoka procesi dhe si e vërteton ministra që nuk e cënon dalja e tezës?

Fakti që ka heshtje dhe nuk ka përfaqësues të ministrisë që të dalin në debat, pasi e kanë detyrim ligjor, për të treguar se pse nuk ka cenim të procesit, kjo është shumë e rëndë.

Celularët nuk lejohen të përdoren me urdhër të ministrisë në shkollë, kurse në provimet e maturës qarkullojnë lirshëm, nuk monitorojmë dot me kamera 270 qendra provimi dhe kjo është e pafalshme. Organizohet një ushtri me mësues e punonjës për këtë proces dhe dhe më pas askush nuk merr përgjegjësinë për këtë që ndodh. Kjo është tallje e madhe", theksoi Mehmeti gjatë bisedës lidhur me këtë fenomen./ Politiko.al