Pse urimi i SHBA-ve për zgjedhjet është 'shuplakë' për Edi Ramën, krahasimi me Bukureshtin

Ambasada e Shteteve të Bashkuara të Amerikës në Tiranë ka uruar dje pas rreth dy javësh lidhur me zgjedhjet e 11 majit.

Në një mesazh krejt të shkurtër, ambsada i drejtohet popullit shqiptar, por jo fituesit të zgjedhjeve, Edi Rama, i cili si asnjëherë më parë mori 83 ulëse në Kuvend dhe siguroi një mandat të 4-ët. 

“Urojmë popullin e Shqipërisë për zgjedhjet parlamentare dhe presim të vazhdojmë partneritetin tonë të ngushtë me Shqipërinë”, shkroi dje ambasada.

Një lumë reagimesh vërshuan prej ditës së djeshme duke 'lexuar' mesazhin që përcillte në thelb ambasada dhe konkretisht mospërmendja e fituesit në tekstin e reagimit. 

Për ta kuptuar më mirë këtë detaj, sjellim në vëmendje reagimin e administratës 'Trump' për zgjedhjet e një tjetër shteti jo shumë larg Shqipërisë. Ambasada uroi vetëm dy ditë pas zgjedhjeve Bukureshtin zyrtar, në 20 maj të këtij viti. 

Në mesazhin për shtetin rumun, ambasada e SHBA i drejtohet me emër fituesit, konkretisht presidentit të ri Nicușor Dan, ndryshe nga mesazhi "i thatë" për Shqipërinë, të cilin analistët e përkthejnë si një sinjal negativ për kryeministrin shqiptar, Edi Rama. 

„Mezi presim të bashkëpunojmë me Nicușor Dan, si President i Rumanisë, dhe me qeverinë e re, për të promovuar prioritetet tona të përbashkëta, si mbrojtja, energjia dhe partneritetet tregtare,” shkruan përfaqësimi diplomatik i Shteteve të Bashkuara në Rumani në rrjetet sociale. 

Po ashtu, kujtojmë se përshëndetja’ e zgjedhjeve shqiptare nuk kapte as standardin e shtetit të vogël karaibas të Belizës.

Në rastin e Shqipërisë urimin e bënte Ambasada, në të Belizës Departamenti i Shtetit, te e para urohej populli shqiptar, te e dyta, nominalisht, kryeministri fitues i zgjedhjeve. Ajo çka e bënte më të mprehtë ironinë e urimit ishte se, Ambasada fliste për partneritet me popullin e Shqipërisë-jo me qeverinë.