Të penduarit e drejtësisë që prangosën bandat e krimit

Artan Tafani mori statusin e të penduarit të drejtësisë tre ditë më parë. Dëshmia e tij çoi në pranga 12 persona, ndërsa 4 të tjerë janë shpallur në kërkim. Pjesëtari i bandës së Laert Haxhisë zbërtheu krimet dhe grabitjet që ka kryer grupi.

Tafani rrëfeu 6 vrasje të bujshme: Vrasja e Alban Semakut në Peqin, 17 Tetor 2021; Vrasja e Albi Bashaliut 27 dhjetor 2021; Vrasja e Lulzim Qorrit dhe Dikens Halilit në Greqi; Vrasja e Fridman Xhaferrajt në vitin 2021; Vrasja e Çajup Selimit.

Tafani dëshmoi se Laert Haxhiu ishte organizatori i vrasjeve dhe grabitjeve, madje në disa ngjarje ka marrë pjesë edhe si ekzekutor.

Por, Tafani nuk është i penduari i vetëm i drejtësisë. Statusin e tillë e kanë fituar 15 persona, të përshirë në ngjarje kriminale që kanë zbërthyer më pas aktivitetin e grupeve.

Nuredin Dumani

“Plumbi i Artë” zbardhi vrasjet më të kobshme që deri asokohe nuk e kishin një autor. Dumani u arrestua më 30 mars të vitit 2022 gjatë një aksion i policor. Ai u gjet në Fier në një dhomë hoteli me një plagë në shtyllën kurrizore. Pas dëshmisë së Dumanit u lëshuan plot 30 urdhër-arreste, mes tyre Ervis Martinaj, Sokol Sanxhaktari, Suel Çela dhe Florenc Çapja.

Në një nga dëshmitë e tij, Dumani tregoi se Ervis Martinaj i kishte dhënë 100 mijë euro parapagim për vrasjen e Endrit Dokles, por Dumani ka deklaruar se nuk ka dashur ta kryej. Dumani rrëfeu edhe vrasjen e Emiljano Ramazanit dhe Regis Runajt.

I penduari i drejtësisë dëshmoi se si avokati tashmë i arrestuar Alban Bengasi i kishte ofruar 120 mijë euro për të eliminuar bashkëshorten e tij, por i penduari i drejtësisë kishte refuzuar.

Luftar Reçi

Ai u shndërrua në vjeshtën e vitit 2020 në të penduarin më të rëndësishëm të SPAK, duke trazuar dhe alarmuar emrat më të njohur të botës së krimit, përmes dëshmive të tij për krime të bujshme të 17 viteve më parë. I dënuar me 25 vite burgim për vrasjen e Maksim Lalës, Reçi ka rrëfyer në datat 21 tetor, 31 tetor dhe 26 nëntor 2020, të gjithë veprimtarinë kriminale që ka pasur me Lulzim Berishën dhe anëtarët e tjerë të bandës së tij, duke implikuar edhe Emiljano Shullazin, me qëllim për të zbutur dënimin e tij. Luftar Reçi implikoi Viktor Bajraktarin (Imeraj), Emiljano Shullazin, Indrit Taullain, Lulzim Berishën, Plarent Dervishajn dhe Indrit Rusin në vrasjet e Klodjan Saliut, Vajdin Lamajt dhe mikut të tij Artan Arsi.

Ernejt Shyti

Autori i vrasjes së Behar Sofisë, tregoi se e ekzekutoi biznesmenin për 50 milionë lekë, shumë të cilën nuk e mori asnjëherë. Po ashtu, Shyti rrëfeu se pas Behar Sofisë, ishte planifikuar edhe vrasja e një 34-vjeçari i cili jetonte në Kamëz, vrasje e cila nuk u krye dot pasi sipas tij ishte shumë e vështirë të studiohej zona. Sipas Shytit vrasja ishte porositur nga Bujar Laze.

Klevis Alla

Në rrëfimin e tij, i penduari për vrasjen e dy vëllezërve Besmir e Viktor Haxhia, ngjarje e ndodhur në prill të vitit 2020, e ka shmangur shumë herë emrin e Nuredin Dumanit. Më vonë, ai tregoi se Dumani e kishte kërcënuar me jetën e të motrës. Alla pohoi se me porosi të Nuredin Dumanit dërgoi Besian Xhixhën dhe Enver Diven te shtëpia e Besmir Haxhisë. Ai ka treguar se Dumani, të cilin e kishte komshi, i ka kërkuar që ta takonte. Në bisedën që kanë zhvilluar ai i ka kërkuar Allës që dy miqtë e tij, t’i dërgonte pranë shtëpisë së Besmir dhe Viktor Haxhisë, për të monitoruar zonën. Besmir Xhixha dhe Enver Diva, pasi kanë monitoruar të gjithë ambientin, kanë rënë dakord për të kryer vrasjen, por kanë kërkuar që si shofer të jetë Klevis Alla, pasi ishte një njeri që e njihte mjaft mirë zonën.

Henrik Hoxhaj

Henrik Hoxhaj ishte një ndër ushtarët e besuar të grupit të Talo Çelës dhe Nuredin Dumanit deri në momentin që këta u prishën pas vrasjes së Emiljano Ramazanit në Elbasan. Madje, Hoxhaj ka marrë pjesë në të paktën një vrasje bashkë me Nuredin Dumanin. Hoxhaj ka rrëfyer disa ngjarje kriminale, si: vrasja e Dorian Shkozës në vitin 2020, vrasja e vëllezërve Haxhija, vrasja e Emiljano Ramazanit dhe Regis Runajt.

Të tjerë të penduar të drejtësisë janë: Erion Alibej, Euglent Halili, Petriç Liçi, Adriatik Coli, Bujar Buzhani, Julian Sinanaj, Mikel Shallari, Elvis Bardhi, Kristi Pine, Enver dhe Ermond Jamaku.