Moratorium 4-vjeçar për gjyqtarët e zgjedhjeve? PS kundër: Propozimi i PD vë në pikëpyetje arritjet me Reformën në Drejtësi

Bashkëkryetari i Komisionit për Reformën në Drejtësi, Damian Gjiknuri ka hedhur poshtë propozimin e PD për një moratorium 4-vjeçar që shtyn procesin e vettingut për gjyqtarët që shqyrtojnë ankimimet e zgjedhjeve.

Pas përfundimit të tryezës për Reformën Zgjedhore, Gjiknuri tha se nuk është normale që pjesë e trupës së Kolegjit Zgjedhor të jenë gjyqtarë që nuk e kanë kaluar ende vettingun dhe se ky propozim i PD vendos në pikëpyetje ato që janë arritur me reformën në drejtësi

“Nuk duhet normale që vettingu të bllokohet për formimin e Kolegjit Zgjedhor. Mund të ishte më e arsyeshme që ata që kanë kaluar vettingun të jenë pjesë e trupës. Nuk dua që propozimet e PD-së të vendosin në pikëpyetje atë që është arritur me reformën në drejtësi. Kushtetuta ka përcaktuar detyrimin që çdo gjyqtar të kalojë në vetting dhe kjo nuk mund të pezullohet. Pse mos të jenë ata që kanë kaluar vettingun dhe të përzgjidhen mes tyre. Ata që janë përtej apelit për të plotësuar trupën pse jo mos të jenë. Me rekomandimet e ODHIR për afatet jemi dakord dhe nuk kemi ndonjë ndarje në këtë drejtim. Shpresoj që opozita këtë 2-3 javë që kanë mbetur ta shfrytëzojmë për kompromis dhe të lëmë mënjanë ata që nuk janë në përputhje me rekomandimet e ODHIR. Madje, për mua nuk ka pse të shtohen, madje mendoj të jenë më pak se 8 gjyqtarë në trupën përbërëse”, tha Gjiknuri.

Nga ana tjetër, Gjiknuri deklaroi se PS ka hedhur poshtë cdo mundësi për qeveri kujdestare që përcakton edhe ministrin e Brendshëm teknik 100 ditë para zgjedhjeve, sërish ky propozim i PD.

Sipas Gjiknurit, ajo që nuk u arrit me luftë në rrugë, nuk mund të arrihet as në tryezë.

“Nuk ka diskutim për qeveri tranzitore. Ato që nuk u arritën me luftë në rrugë , nuk mund të arrihet në tryezë, për mua është diçka e mbyllur”, tha Gjiknuri.