Ndryshime (pa)parashikuara në qeveri, pse Rama zgjodhi të bëjë riciklim ministrash në prag të ndërrimit të viteve

Në prag të ndërrimit të viteve, kryeministri Edi Rama njoftoi ndryshime në kabinetin qeverisës.

Një zhvillim sa i beftë, aq edhe i parashikueshëm dy ditë para ndërrimit të viteve.Sot Rama shkarkon Gent Cakajn nga posti i ministrit të Jashtëm në detyrë, po ashtu edhe veten si ministër i Jashtëm, dhe në vend të tij emëron Olta Xhaçkën. Në vend të kësaj të fundit, Rama rikthen në qeveri Niko Peleshin, ish-zv.kryeministrin dhe ish ministrin e Bujqësisë.

Po pse Rama zgjodhi pikërisht këtë moment për ndryshime në kabinet...

Kujtojmë se këto vendime vijnë pak ditë pasi Sandër Lleshaj dha dorëheqjen e tij si ministër i Brendshëm, për shkak të vrasjes së Klodian Rashës nga një polic i 'Shqiponjave'.

Vendin e tij e zuri Bledi Çuçi dhe ministër i Bujqësisë u emërua një tjetër grua, Milva Ekonomi. Po ashtu, disa muaj më parë Besa Shahini u largua nga posti i ministres së Arsimit dhe vendin e saj e zuri Evis Kushi, deri atëherë deputete e qarkut të Elbasanit.

Është përfolur prej kohësh në media se Rama do të bëjë zëvendësime ndër ministra, ashtu siç ka paralajmëruar edhe vetë pak muaj më parë gjatë një aktiviteti ku mori pjesë në Vlorë, duke thënë se 'ministrat e lodhur do spostohen në stolin e rezervave'.

“Kush do të lodhet, do të kalojë në vijën e dytë dhe mund të shkojë në stolin e rezervave. Kush do të ketë energji, do të shkojë në sulm deri në fund”, duke lënë të kuptohet se këto ndryshime janë të mundshme.

Këto ndryshime vijnë vetëm katër muaj para zgjedhjeve elektorale, ndërsa PS aspiron një mandat të tretë qeverisës.

Një pjesë e ministrave në kabinetin qeverisës nuk kanë të shkuar politike, sic ishte Gent Cakaj, Besa Shahini, apo Sandër Lleshaj.

Nëse kthehemi pak vite pas, kujtojmë se Rama bëri disa lëvizje në qeveri në prag të zgjedhjeve të 2017, ku argumenti që përdori ishte se emrat e larguar do të ndihmojnë PS të marrë mandatin e dytë. Edhe tani duket se ndoqi të njëjtën formulë, për qëllime elektorale.

Pse personat e ‘ricikluar’

Olta Xhaçka dhe Niko Peleshi duket se janë zgjedhur pas një përllogaritje të mirë nga ana e Ramës. E para, të dy figurat janë të sprovuar dhe kanë përvojë në drejtimin e dikastereve.

Së dyti, Rama nuk tenton një ‘Gent Cakaj’ të dytë, i kontestuar nga presidenti Ilir Meta për dekretimin, pra me këto dy emra, Rama e tejkalon ‘sfidën’ me Ilir Metën, me të cilin ka patur mjaft përplasje gjatë këtij viti që po lëmë pas.

Së treti, qarqet mediatike e komentojnë një ndryshim për qëllime elektorale, pasi të dy ministrat kanë përvojë dhe kanë qenë në fushatat e mëparshme elektorale, Xhaçka në Dibër kurse Peleshi në qarkun e Korçës.  

Pra, Rama shkon në fushatë me dy emra që i duhen terrenit të tij zgjedhor dhe më i sigurt në proceset elektorale.

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm