Atentati me 4 të plagosur në Tiranë, autorët ngatërruan shënjestër, do të ekzekutonin gruan e Roan Brahimit

Tjetër kthesë ka marrë dinamika e atentatit me 4 të plagosur në zonën e Lundrës, ngjarje që ndodhi natën e së enjtes.

Dyshohet se autorët kanë ngatërruar shënjestër, pasi objektiv i atentatit ka qenë bashkëshortja e Roan Brahimit, i ekzekutuar nëj vit më parë në Greqi. Shënjestra e dyshuar përdorte mjet tip G-Class njësoj si familja e "Pelikani Security" dhe me targa të ngjashme.

Po dje, Roan Brahimit i ekzekutuan vjehrrin, Gjovalin Prendi 65 vejç, në Pllanë të Lezhës. Autorët kanë qenë duke vëzhguar objektivin e tyre dhe sapo e kanë parë tek dera e lokalit e kanë qëlluar në pjesën e gjoksit.

Arenc Stafa, 35 vjeç, Kian Mullahi 19 vjeç, Marko Demiraj 17 vjeç dhe Dior Demiraj, 11 vjeç, u plagosën me breshëri arme. Dy të miturit janë në gjendje të rëndë shëndetësore në Spitalin e Traumës.

Shoferi i mjetit të familjes dhe kompanisë “Pelikani Security”, Arenc Stafa, ka deklaruar se po ktheheshin nga festa e ditëlindjes së 11-vjeçarit. Ai ka thënë para oficerëve të policisë se nuk ka konflikte me askënd dhe se nuk ka vënë re diçka të dyshimtë.

VRASJA E ROAN BRAHIMIT

Një vit më parë persona të panjohur me motor qëlluan për vdekje Roan Brahimin, i cili ishte në makinë me gruan e tij. Kjo e fundit mbeti e plagosur lehtë.

Fëmija shtatë vjeçar i çiftit, i cili po luante në shesh me gjyshen, ka parë me sytë e tij vrasjen e të atit, sipas dëshmitarëve okularë.

Ekzekutorët raportohet se vëzhgonin çdo lëvizje të familjes së viktimës dhe kishin ruajtur një vend parkimi për Roan Brahimin për ta futur në kurth.

Roan Brahimi dyshohet të ketë lidhje edhe me vrasjen Gentjan Bejtjes në 15 mars 2024 në Larushk të Krujës. Brahimi njihet si rival i Ervis Martinajt.