Pse i humbi Basha zgjedhjet? 7 arsye

Nga Alfred Lela 

Pavarësisht një fushate të mirë, një mesazhi optimal që përqendrohej te ekonomia dhe integrimi europian, Lulzim Basha dhe Partia Demokratike i humbën zgjedhjet.
Këto janë shtatë arsyet sipas meje:
1-Basha dhe PD u futën shumë vonë në fushatë, i shpallën shumë vonë koordinatorët dhe i prezantuan shumë vonë kandidatët. Rama dhe PS, në të kundërt, nuk e ndërprenë asnjëherë fushatën permanente dhe i caktuan shumë më herët drejtuesit politikë të qarqeve.
2-Basha i vetëm nuk mjafton. Përpjekja e shtabit të komunikimit të PD për të paketuar kryetarin demokrat si antipod të Ramës, nuk korri sukses. Fjalimet përmbyllëse të fushatës e dëshmojnë më mirë se çdo gjë handikapin komunikativ mes dy liderëve. Fjalimi i Bashës ishte një përmbledhje sloganesh. Rama në anën tjetër kishte ndërtuar me kujdes antitezat e tij kundër gjithë tezave opozitare. Basha duhej propozuara bashkë me një ekip, të përzgjedhur me kujdes dhe të kompozuar me eksponentë të partisë dhe shoqërisë.
3-Basha i kishte këputur vetë dy degët ku mbahej, duke dalë nga Kuvendi dhe duke braktisur zgjedhjet vendore. Me kryetarë demokratë nëpër Bashki, PD do e kishte pasur më të lehtë penetrimin në terren, dhe me deputetë ende aktivë, kandidatë e tij do të kishin patur më shumë peshë në publik.
4-Ndarja e mandateve në favor të qeverisë e dëshmoi edhe njëherë sa e dëmshme kishte qenë mospjesëmarrja e opozitës në përvijimin e reformës administrative-territoriale, por edhe pamundësia për ta ndikuar drejtpërdrejt në debate dhe bllokime parlamentare Kodin e ri elektoral i cili u miratua me votat e opozitës patericë.
5-Basha e përdori stukturën e partisë si epruvetë eksperimentale duke mos krijuar dot një lidership stabël dhe as efikas. Ai e filloi me koordinatorët të cilët ua mbivendosi sekretarëve dhe më pas i rrëzoi ata duke mbushur Sekretariatin me njerëzit e tij. Të njëjtin mesazh paqëndrueshmërie dha edhe me Komision e përzgjedhje së kandidatëve të cilin vetë e ideoi dhe vetë e rrëzoi. Koordinatorët dhe drejtuesit politikë në qarqe i ndërroi disa herë duke krijuar konfuzion.
6-Nuk çoi asnjë betejë të madhe deri në fund, çka e bëri publikun ta shihte si joserioz. Ilustrimi më i mirë i kësaj është premtimi i tij gjatë fushatës në Kukës se, po të vinte në pushtet do të hiqte taksën e Rrugës së Kombit. Ndërkohë, po ai vetë dhe për arsye krejt jo-politike dhe personale, e kishte demotivuar PD-në e Kukësit për të rezistuar në vijim pas protestës së egër të kuksianëve, që e detyroi Ramën të vinte urgjent nga Vlora në Tiranë.
7-Nuk krijoi dot partneritete dhe besnikëri në parti dhe as shoqëri. Ai ka qenë kryetari më i kontestuar në historinë e pluralizmit dhe ndoshta i vetmi që nuk krijoi dot një rrymë besnikësh. Duke preferur klientë më shumë se partnerë, ai e konceptoi lidershipin e PD-së si ekonomik më shumë se civik apo ideologjik.

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm