Zgjedhjet për kryetarin: A është PD parti muslimane?

Politiko.al

Siç thekson një shënim i Politiko.al, vetëm 17 përqind e antarësisë demokrate në Bashkinë  e Korçës e kanë votuar Lulzim Bashën në garën e tretë të tij për kryetar partie. Në ndryshim nga kjo, në dy bashkitë e tjera të qarkut, Maliq e Devoll, shifrat kanë qenë mbi 57 dhe 78 përqind në favor të Bashës.

Përveç implikimve të tjera, që janë kryesisht politike, në këtë rast duhet shënuar edhe një që lidhet me balancat fetare. Devolli dominohet nga muslimanët, ndërsa Maliqi është thuajse i tëri muhamedan. Korça nga ana tjetër ka thuajse një balancë mes dy komuniteteve, atij ortodoks e musliman.

Te këto diferanca fetare duhet vëzhguar ndryshimi në pëlqim për Bashën dhe ekipin e tij drejtues në qarkun e Korçës. Edhe për faktin se Ervin Salianji dhe Edmond Spaho janë muslimanë nga ‘periferitë’, njëri nga fshatrat e Maliqit dhe tjetri nga Devolli.

Korça, sipas të gjithë njohësve të balancave politike e shoqërore, është shumë e ndjeshme dhe, gjithmonë nga shefat e partive në Tiranë është bërë kujdes që ekuilibri delikat të konsiderohet dhe të ruhet.

Basha nuk e ka patur këtë konsideratë dhe këmbëngulja e tij për përfaqësim të elementit musliman, si në rastin Spaho-Salianji i ka dhënë efektet, jo vetëm në votën e brendshme partiake, por edhe në zgjedhjet parlamentare. Nëse në Devoll dhe Maliq Basha dhe emisarët e tij pëlqehen, në Korçë refuzohen.

Kjo, sigurisht, lidhet edhe me faktin se qyteti i Korçës kërkon një përfaqësim qytetar dhe dy të dërguarit e Bashës konsiderohen si ‘provincialë’ në qytet.

Por nuk është kjo e vetmja disbalancë në radhët e PD. Ka qenë një prej kandidatëve për kryetar të partisë, Edit Harxhi që në emsionin PolitikOn në RTV Ora ka vënë në dukje faktin se në listen e Bashës për Tiranën nuk kishte asnjë katolik, përveç Aldo Bumçit në vendine  17-të, pozicion jofitues. Dy vende më poshte ishte një tjetër i krishterë, i besimit ortodoks, Ivi Kaso, gjithashtu në pozicion jofitues.

Dominimi i elementit musliman në Partinë Demokratike ishte i theksuar edhe në vetë garën e sapombyllur për kryetar. Të katër kandidatët Lulzim Basha, Agron Shehaj, Edit Harxhi dhe Fatbadh Kadilli janë të besimit muhamedan.

Partia Demokratike nuk i përket klasikisht kësaj tradite. Kujtoni kujdesin thuaje kirurgjikal të Sali Berishës për të patur në krye të qeverisë ortodoksin Leka Meksi dhe në krye të parlamentit katolikun Pjetër Arbnori. Jozefina Topalli në librin e Berishës rrinte lart ndër të tjera edhe pse përfqësonte komunitetin e fuqishëm katolik të Veriut.

Berisha nuk bënte gjë tjetër veçse një kujdesi që u themelua në fakt nga muhamedani Ahmet Zogu i cili gjithmonë kishte në struktuart e larta të shtetit të tij katolikë dhe ortodoksë. Balancën e prishi pushteti komunist i Enver Hoxhës që përjashtoi ortodoksët dhe sidomos katolikët nga drejtimi i vendit.

Me ardhjen e Bashës në krye të PD, edhe pse ai nuk ka gëzuar ende pushtet ekzekutiv për të bërë ndarje fetare të posteve, kjo balancë është zhbërë.

Të gjithë drejtuesit e lartë të piketuar nga Basha në PD janë të besimit musliman (hiq n/kryetarin Paloka te mbetur nga koha e Berishes). 

Një prirje alarmante u vu re sidomos gjatë fushatës së fundit, kur në ekipin e komunikimit të Bashës bënin pjesë në përqindje totale elementë të besimit musliman dhe disa prej tyre njerëz që u mëshojnë ideve islamike në shoqëri.

Pa qenë nevoja e përmendjes së emrave, vëzhguesit e politikës e dinë se për kë bëhet fjalë.