Flash News

Armand Shakaj dyshohet se e vrau dhe e groposi Eglant Koçin, çfarë u bë “mollë sherri” mes shokëve

Ulen çmimet e karburanteve, ja sa do të shitet nafta dhe benzina

POLITICO nxjerr deklaratën e fortë të Ramës: Të huajt janë më të rëndësishëm se shqiptarët

Televizioni amerikan: Protestat po kthehen në sfidë të hapur ndaj Ramës

Zhdukja e Eglant Koçit, policia: Një strukturë e posaçme po merret me gjetjen e trupit

OPINEWS

Rasti i 17-vjeçarit në Gjermani - Rreziku i radikalizimit islamik mes shqiptarëve

Politiko 12 Shtator 2025, 12:32
Rasti i 17-vjeçarit në Gjermani - Rreziku i radikalizimit islamik

Enver Robelli

Me vite të tëra kemi qenë një grup i vogël zërash pothuaj të vetmuar publikë që kemi paralajmëruar mbi rrezikun e radikalizimit islamist të shqiptarëve në diasporë dhe në Ballkan, veçanërisht në Kosovë e Maqedoni.

Sharjet, gënjeshtrat, shënjestrimi dhe kërcënimet kanë qenë çmimi që kemi paguar, por nuk jemi dorëzuar. Kur e shoh se një kosovar 17-vjeçar në Gjermani e ka qëlluar me thikë një arsimtare, duke i shkaktuar lëndime të rënda, i shtyrë me gjasë (dhe sipas autoriteteve gjermane) nga motivet ekstremiste fetare, nuk ndiej asnjë dëshirë t’ju them: “Ju kam paralajmëruar”.


E vërteta e hidhur është se shoqëria e gjerë nuk po e merr seriozisht këtë rrezik, politikanët nuk kanë guxim të prekin këtë hekur të nxehtë sepse kalkulojnë për vota dhe debati publik është i përqendruar kryesisht në ngatërresat toksike për pushtet. Përballë kësaj situate një grusht njerëzish - zëra të vetmuar në shkretëtirë - s’mund të bëjnë asnjë kthesë.

Rreziku i shkombëtarizimit i kërcënohet sidomos shqiptarëve në mërgatë. Një pjesë e konsiderueshme e tyre janë të paintegruar, madje refuzojnë të integrohen. Ky fakt nuk mund të mbulohet me prezantimin inflacionar të shembujve të mirë. Lum mërgata për ta! Por realiteti është edhe ky: te komuniteti shqiptar në një trevë zvicerane, për shembull, më lehtë i gjen 5 milionë franga për të ndërtuar një xhami se sa 500 franga për një aktivitet kulturor iluminist.

Komunitete të tjera janë aq të organizuara, saqë paguajnë bursa për shkollim të të rinjve, në komunitetet e mëdha shqiptare në Zvicër, Gjermani e Austri lehtë i gjen qindra e mijëra njerëz që entuziazmohen me marrëzitë paramesjetare të ndonjë tik-tok-imami. Të tillët janë idhujt e rinj, jo më Naim Frashëri, jo Esad Mekuli, jo Azem Shkreli, jo Martin Camaj, jo Gazmend Zajmi.

Andaj jemi këtu.

Sulmi i parë me motive islamiste në Gjermani është kryer në vitin 2011 nga Arid Uka. Një kosovar. I rritur në Gjermani. Në aeroportin e Frankfurtit ai vrau dy ushtarë amerikanë dhe plagosi rëndë dy të tjerë! Goditje më të tmerrshme s’mund t’i bësh kombit dhe atdheut tënd. Uka u dënua me burg të përjetshëm.

Në fillim të nëntorit të vitit 2020 Kujtim Fejzulai, një simpatizant i grupit terrorist “Shteti Islamik”, vrau në Vjenë 4 njerëz dhe plagosi pjesërisht rëndë 23 të tjerë. Me origjinë nga Maqedonia, shqiptar me nacionalitet, ai u eleminua nga policia austriake para se të bënte një kërdi edhe më të madhe.

Rastet e tjera janë më pak ekstreme, por prapëseprapë të përbuzshme. Ka gra që qëllimisht pushtojnë hapësirën publike të veshura me burka, ndonëse e dinë se maskimi i tillë në Zvicër është i ndaluar me ligj. Për këtë shkelje së fundi u dënua një grua kosovare në Bern. Shpesh xhamitë funksionojnë të izoluara në zona të braktisura industriale të qyteteve perëndimore dhe askush nuk e di se çka predikohet në këto mjedise. Për një shtresë shqiptarësh të qenmit shqiptar me gjasë është ngarkesë, ata më shumë e shohin veten pjesëtar të ymetit islamist mbarëbotëror. (Sa i përket burkës, e cila nuk ka asnjë lidhje me fenë islame, por është simbol prapambeturie dhe i shtypjes së grave nga burrat, mund të shtrohet pyetja: ku është ai politikan shqiptar në Kosovë që ka guximin të dalë e të kërkojë e propozojë një ligj për ndalimin e saj edhe në Kosovë?).

Është e drejtë e secilit të besojë në çfarë të ketë dëshirë, por kur feja keqpërdoret për beteja kulturore dhe ideologjike, atëherë thika dhe armë të tjera nuk janë larg. Siç e pamë këto ditë në Essen të Gjermanisë. Frika se ky nuk është krimi i fundit nga këto qarqe është më shumë se e bazuar. Fatkeqësisht.

Të fundit