Nga Enca, Elvana Gjata te Rudina Dembacaj, VIP-at që shkelën ligjin përgjatë 2023-shit

Të famshëm dhe të dashur për publikun shqiptar. Megjithatë, për disa prej tyre ky vit nuk ishte më i miri.

Gjatë 2023-shit, shumë personazhe të njohur të showbizz-it shqiptar u përfshinë dhe u përmendën në ngjarje të bujshme, disa shkelën ligjin dhe u arrestuan, por ka edhe nga ata që morën dënime nga gjykata për ngjarje të ndodhura ndër vite.

Arrestohet Enca

Këngëtarja e njohur Enca Haxhiaj u arrestua në fillim të shtatorit të këtij viti nga policia në kryeqytet pasi në vilën e saj në periferi të Tiranës iu gjetën 5 vazo të mbjella me kanabis sativa që po rriteshin qetësisht në ballkonin e shtëpisë.

Asaj iu caktua pas tre ditësh arresti masa ‘detyrim paraqitje’ , pasi mbrojtja pretendoi se qëndrimi me masë më të rëndë, nuk është i nevojshëm pasi nuk përbën rrezik për t’iu shmangur hetimit.

Në dëshminë e saj para grupit hetimor, Enca tha se kanabisin e kishte për përdorim vetjak.

Përveç saj, Policia shoqëroi në komisariat edhe të dashurin e saj.

Falsifikoi firmën e ish-bashkëshortit, dënohet me burg aktorja Rudina Dembacaj

Aktorja Rudina Dembacaj është dënuar me 6 muaj burg nga Gjykata e Apelit, dënim që i është konvertuar në 80 orë shërbim prove.

Ka qenë ish-bashkëshorti i saj që ka kallëzuar penalisht Dembacajn, pasi ajo ka nxjerrë vajzën e tyre jashtë shtetit duke falsifikuar firmën e tij në prokurë.

Fjolla Morina: Unë e di kush e zhduku Ervis Martinajn

Një postim i këngëtares Fjolla Morina riktheu në vëmendje zhdukjen e mbretit të lojërave të fatit Ervis Martinaj prej të cilit nuk ka asnjë gjurmë prej rreth një viti.

Përmes disa postimeve në rrjete sociale, Morina pretendon se është në dijeni se cili është personi që fshihet pas zhdukjes së Martinajt.

Në një postim tjetër me një foto nga një videoklip muzikor i saj, shkruan se në dorë mban një orë të Ervis Martinajt.

“Kjo është ora e Vis Martinajt në dorën time, ma ka dhënë në klip. Këta e dinë çfarë kanë bërë me të dhe tani me mua dhe fëmijën tim çfarë duan të bëjnë”, shprehet këngëtarja.

Doli në përgjimet e ‘Sky’, SPAK nis hetim pasuror për Elvana Gjatën

SPAK ka nisur hetim pasuror për këngëtaren e njohur Elvana Gjata e cila doli në përgjimet e fundit në aplikacionin “SkyECC” që çoi në goditjen e grupit të strukturuar kriminal, mes tyre ish i fejuari i saj Ervin Mata dhe zyrtarë e ish zyrtarë policie.

Ajo është përmendur disa herë në përgjime si "transferuese" e parave nga Ervin Mata për Erzen Breçanin.

Në përgjimet mes Ervin Matës, dhe Erzen Breçanit dhe djalit të tij Eralbit, flitet për transferimin e shumave deri në 500 mijë euro, nga llogaria e Elvanës. Konkretisht, në faqen 83 të dosjes, citohet një bisedë e Erzen Breçanit me djalin e tij Eralbin.

Digjet makina e Kozak Braçit

Mbremjen e 2 dhjetorit u dogj gjatë natës makina e personazhit të njohur të rrjeteve sociale Kozak Braçit.

Makina është djegur teksa ishte e parkuar në zonën e Alliasit ku Braçi banon me familjen e tij. Vetë Kozak Braçi ka publikuar pamjet e automjetit që digjet, e cila është shkrumbuar tërësisht nga flakët. Ai shkruan se nëse autori nuk gjendet nga shteti, do e gjejë vetë.

“Po nuk e gjeti shteti këtë herë, do e gjej vetë”.

Tritol dy bizneseve të Noizy-t në Durrës

Dy biznese në pronësi reperit Rigels Rajku i njohur me emrin e artit si Noizy u sulmuan me eksploziv në Durrës, në qershor të këtij viti.

Triloti ishte vendosur pranë një butiku të rrobave ‘Illyrian Bloodyline’ si dhe në lokalin ‘Rigels Shisha Lounge’, që ndodhen në lagjen 13 të qytetit bregdetar.

 Sipas policisë, banda e Laert Haxhiut ishte përgjegjëse për vendosjen e tritolit në lokalin e shtetasit Bashkim Rajku, babai i reperit Noizy.