Reforma Zgjedhore/ 4 deputetë të opozitës shprehen pro marrëveshjes: Do ta votojmë, pa qenë nevoja për ndryshime

Partia Socialiste është një hap larg miratimit të Reformës Zgjedhore në Parlament gjatë seancës së 23 korrikut, një javë para afatit.

4 deputetë opozitarë kanë deklaruar votën pro Reformës Zgjedhores pa qenë nevoja për ndryshime. Në një deklaratë për mediat jashtë ambienteve të Kryesisë së Kuvendit, deputetët Artur Roshi, Fationa Dhimitri dhe Besnik Troplini thanë se do të votojnë pro draftit të marrëveshjes zgjedhore që do të futet për t’u miratuar në seancën plenare në datë 23 korrik. Po ashtu, pro kësaj marrëveshje është shprehur edhe deputetja Suzana Topi.

Me 4 deputetët e vetëdeklaruar pro votimit të marrëveshjes dhe 77 votat e mazhorancës, pra në total 81 vota, drafti është vetëm 3 vota larg miratimit në 23 korrik.

Deputeti dhe njëherazi kreu i Ballit Kombëtar Demokrat, Artur Roshi u shpreh se nuk janë të kënaqur me marrëveshjen, e cila sipas tyre ishte burim konflikti, por nuk mund të bllokonin integrimin. Sipas Roshit “Kushtetuta është simbol uniteti dhe për integrimin e vendit nuk mund të zgjedhin ndryshe”.

“Është ajo që i duhet vendit në këto momente. Sa i përket prekjes së Kushtetutës, sipas meje, përmbledh të drejtat natyrore të qytetarëve. Kështu që ajo është simbol i unitetit.

Loja e kartonët nuk na çojnë askund. Balli Kombëtar është e hapur për proceset demokratike, që e ka tejkaluar edhe interesin e vet partiak dhe ka parë momentin, situatën politike dhe ne do të jemi pro kësaj marrëveshje. Pra, jo se ne morëm atë që deshëm, për të mos thënë ajo që unë kam predikuar. Por sepse para integrimit në Europë të vendit nuk mund të zgjedhim një rrugë tjetër”, është shprehur Roshi.

Kjo marrëveshje është parakusht për hapjen e negociatave. Për këtë arsye sipas Troplinit Shqipëria ka dy rrugë që duhet të ndjek, BE dhe SHBA.

“Marr përsipër që të flas në emër të Ballit Demokrat Kombëtar. Që është formuar që në diktaturë. Ne kemi mbijetuar dhe kemi shuar përtej detit. Strategjia drejt BE dhe SHBA, janë dy rrugës. Nëse ka debat mes opozitës dhe maxhorancës, çdo kush duhet të tolerojë diçka dhe të heq dorë nga diçka. Kjo është një nga pikat e BE dhe Bundestagut”, tha ai.

Ndërkaq, vota e tretë pro marrëveshjes, Fatjona Dhimitri, është shprehur se nuk mund të mbështes një propozim që heq koalicionet zgjedhore dhe ndihmon Edi Ramën në lojën e tij. Sipas saj, konsensusi për këtë reformë është kusht për integrimin e vendit drejt BE-së.

“Si deputete e Kuvendit të Republikës se Shqipërisë theksoj se çështja e koalicioneve, është lojë e Edi Rama. S’jam në Kuvend për të mbështetur Edi Ramën. Nuk mund të mbështes një propozim që heq koalicionet zgjedhore dhe ndihmon Edi Ramën. Unë jam në opozitë me Edi Ramën dhe nuk mund të bllokoj procesin e integrimit. Konsensusi për reformën është i vetmi kusht për negociatat “, u shpreh Dhimitri.