Flash News

Igli Tare emërohet zyrtarisht si Drejtori Sportiv i ri i Milanit

Dy vëllezër tentojnë të vrasin kushëririn në Kukës, njëri arrestohet pas një viti në arrati

Ndërron jetë Artan Lame, e ëma e konfirmon: Ky moment i mallkuar erdhi

2-vjeçari holandez bie nga kati i tretë i hotelit në Rinas, dërgohet në spital

Vlorë/ Përplasi të miturën dhe u largua nga vendngjarja, shpallet në kërkim 27-vjeçarja

KRYESORE

Të shtatë kundër Reas: Konflikti i vajzës së Linda Ramës me Zhejin dhe portalet, I SHPJEGUAR

Politiko 26 Prill 2019, 18:49

Të shtatë kundër Reas: Konflikti i vajzës së Linda

Politiko.al

Rea Xhillari, me profesion interior designer, është vajza e Linda Bashës, bashkëshortja e kryeministrit Rama. Në pamje të parë një vajzë e tërhequr, Xhillari është një gërshetim i funky me geeky, një kombinim që e gjen në rininë urbane, ata që quhen young profesionals. Thjeshtra e kryministrit Rama ka qenë, ditët e fundit, në qendër të vëmendjes mediatike, pas botimit të një shkrimi ku aludohej për një raport dashuror me ministrin e Jashtëm në detyrë, Gent Cakaj.

Shkrimi u botua fillimisht në gazetaimpakt.al, ose të paktën ky emër shfaqej në fund të të gjitha postimeve në sajtet e tjera që e rimorën copy/paste. Përveçse një ndërhyrjeje ligjore, kjo nuk mund të vërtetohet, pasi 'impakt' e ka hequr shkrimin nga faqja. Të njëjtën gjë ka bërë edhe gazeta 'Koha Jonë'.

Fakti që impakt e ka 'fshirë' shkrimin që mori dhenë në Tiranë, nuk të lejon t'a krahasosh as me të njëjtin tekst të shfaqur në një gazetë tjetër të diasporës 'Bota sot', e vetmja që e ka shoqëruar me autorësi. Firmosur nga Beqir Sina, nuk dihet nëse është ky shkrimi që është marrë pastaj nga 'impakt', duke bërë xhiron edhe të portaleve të Tiranës, apo e kundërta.

'Impakt' është një portal pa impressum (adresë dhe të dhëna të tjera) i cili duket se e ka qendrën në Kosovë (ose Maqedoni), po të gjykosh nga përmbajtja. Identiteti i 'impaktit', sërish duke gjykuar nga lajmet e postuara aty, është ultra-konservator fetar, me një linjë editoriale që mbështet një agjendë islamike, pro-iraniane dhe anti-hebraike, me Opinione autorësh që në Shqipëri portretizohen si radikalë, si psh Olsi Jazexhi.

Nuk mund të thuhet shumë për shtrirjen apo ndikimin e gazetaimpakt.al: në rrjetet sociale Facebook dhe Twitter ka përkatësisht 148 dhe 38 ndjekës.

'Impakt' në shkrimin për lidhjen (e hamendësuar) Cakaj-Xhillari, u referohet në mënyrë përgjithësuese 'rrjeteve sociale' dhe 'disa portaleve', por pa fakte, dmth pa foto ose dëshmi të tjera. Në manualet e gazetarisë shkrime të tilla konsiderohen fake news (lajme të rreme) dhe ato bëhen për qëllime shantazhi, denigrim figure ose për agjenda politike. Në rastin e 'Impakt' duket se fiton varianti i konservatorizimit moral fetar mbi agjendat e tjera. Të dy personazhet e 'lajmit' u përkasin rretheve sociale ultra-liberale të Tiranës dhe Prishtinës. Edhe më liberalë, rrjedhimisht të papranueshëm për 'Impakt', i bën Xhillarin dhe Cakajn, lidhja e afërt me një libertin të dikurshëm, tashmë kryeministër, Edi Ramën.

E gjitha kjo është 'shumë', mjafton të shohësh përshkrimin që i bëhet lidhjes (së hamendësuar) mes Xhillarit dhe Cakajt ['bashkëjetes' si i thonë në Shqipëri këtij trendi]. Në leximin puritan të 'Impaktit', çdo gjë më pak se martesa është një sakrilegj, social dhe politik.

Shkrimi i 'impakt' (apo Bota sot?) u mor më pas nga shtatë portale në Shqipëri. Botuesi i njërit prej të cilëve, Artur Zheji (360grade.al) u hodh në gjyq nga Rea Xhillari duke qenë i vetmi i identifikuar publikisht nga thjeshtra e kryeministrit. Të tjerët nuk u përmendën duke u mjaftuar me numrin 7, për të treguar sasinë, dhe jo identitetin. Një ditë më pas ishte dosja.al, e cila nuk gjendej në 'dosjen' e të paditurve nga Xhillari, që identifikoi 'të shtatët kundër Reas': syri.net, 360grade.al; Standard.al; Faxweb.al; Albeu.com: Telegraf.al dhe Boldnews.al.

Shkrimi i marrë copy/paste dhe i botuar në 7 portale anti-qeveritare, ka gjetur përgjigjen në një letër të Rea Xhillarit dërguar gjykatës, botuar së pari në një gazetë pro-qeveritare, shqiptarja.com. Aty Znj. Xhillari përmend më të njohurin mes tyre, një mik të hershëm të rinisë së ungjit të saj, Edi Rama, Artur Zhejin, duke 'shpërfillur' të tjerët. Kjo, ndoshta edhe për faktin se Xhillari thotë në letër se ka qenë 360grade që e ka publikuar i pari. (Kjo nuk është kronologjia e saktë në fakt: siç u cek më sipër shkrimi buron nga 'Bota sot' ose 'Impakt').

Xhillari thotë se nuk e njeh, dhe as e ka takuar Cakajn, dhe e konsideron shpifje shkrimin e botuar në portalin e Zhejit dhe në të tjerët.

Paditësja kujdeset që në letrën dërguar gjykatës të bëjë edhe 'komunikim publik' duke iu kundërvënë hamendësimeve për nepotizëm në shkrimin për të cilin ajo i drejtohet ligjit. Duke qartësuar se, as ajo dhe as e ëma nuk kanë përfituar asnjë favor nga të qenit kryeministër i Edi Ramës.

Artur Zheji i 'padituri i parë' dhe i vetmi i cilësuar me emër, nuk ka vonuar të përgjigjet. Replika e Zhejit duket se i drejtohet kryeministrit Rama, të cilin e ka patur shok rinie dhe me të cilin ka ruajtur një raport miqësor deri vonë. Gazetari nuk e shtyn më tej 'konfliktin' me Rea Xhillarin, por i kujton se, të dy po 'përdoren' nga Rama, njëri si 'viktima' e tjetri si 'xhelati'. Mes Ramës e Zhejit ka rrjedhur shumë 'gjak i keq' pas ardhjes në krye të qeverisë të ish-kryebashkiakut të Tiranës. Përmbyllja e kësaj mërie, herë të zëshme e herë të heshtur, duket se u vulos pas vendimit të Gent Cakajt për të shkarkuar nga puna në Ambasadën shqiptare në Romë, të bijën e Artur Zhejit. Gerarta Ballo-Zheji hodhi disa ditë më vonë kandidaturën për në Parlamentin Europian.

Në mbyllje të reagimit për Xhillarin, Zheji ka një nëntekst të qartë për këtë akt të kryeministrit duke 'e sfiduar' Ramën nëpërmjet thejshtrës. Gazetari kërkon që edhe Rama të marrë e të shkruajë një letër, ashtu si kjo e tija drejtuar...."e di vetë ai se kujt".

Ministri Cakaj nuk i ka shpëtuar pyetjes për marrdhënien e tij (të hamendësuar) me thjeshtrën e kryeministrit, as në një intervistë për emisionin 'Opinion' në TV Klan. Cakaj ua ka referuar insinuatat e tilla 'armiqve' të kryeministrit Rama.

Ky qëndrim ka sjellë reagimin e shkrimtares Flutura Açka, e cila ka kujtuar ministrit të ri se, në diktaturë përdorej termi 'armik' ndërsa në demokraci bëhet fjalë për 'kundërshtarë politikë'.