Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

VIDEO-LIVE/ Tensionohet situata te Parlamenti, policia hedh gaz lotsjellës dhe ujë me presion ndaj protestuesve

Politiko 16 Mars 2019, 12:52

Duke folur nga selia e Partisë Demokratike, ku njoftoi mbylljen e protestës, Lulzim Basha nuk la pa përmendur edhe faktorin ndërkombëtar. Kreu i opozitës, iu kërkoi miqve të huaj të mos degjojnë më zërin e autokratit Rama por të popullit. “Nuk ka stabilitet pa demokraci, nuk ka stabilitet pa drejtësi”, iu tha Basha ndërkombëtarëve para selisë së PD.

______________________________________________________________________________

Ambasadori i Britanisë së Madhe në Shqipëri, Duncan Normal është i pari personalitet ndërkombëtar që ka reaguar deri tani për protestën e opozitës. Në një status në ‘Twitter’, ai shkruan se tubimi është mundësi e mirë për të ushtruar të drejtën për të protestuar, ndërsa bën thirrje për vetëpërmbajtje.

“Sot është një mundësi për të ushtruar të drejtën tuaj për të protestuar. Megjithatë kjo e drejtë duhet të ushtrohet në mënyrë paqësore; dhuna e minon demokracinë. Ne i bëjmë thirrje të gjithëve që të tregojnë përmbajtje, të respektojnë institucionet demokratike dhe të parimit të paqes”, deklaron ai.

Situata pranë parlamentit vijon të jetë e tensionuar, aq sa ka bërë që policia të përdor jo vetëm gaz lotsjellës por edhe ujë me presion. Për të larguar protestuesit, uniformat blu po përdorin edhe pozicione strategjike, siç është gazi hedhja e gazit lotsjellës nga qendra ‘Toptani’, duke i 'futur qytetaret ne kurth'.

______________________________________________________________________________

Pas përdorimit të gazit lotsjellës, policia ka hedhur edhe ujë me presion ndaj protestuesve të Parlamenti. Autobotet me ujë janë zhvendosur me shpejtësi nga Kryeministria për te Parlamenti, ku edhe janë përdorur ndaj qytetarëve.-----------------------------------------------------------------------------------------------------------------------------

Është tensionuar situata përpara Parlamentit, aty ku policia ka përdorur gazin lotsjellës ndaj protestuesve. Situata nuk paraqitej e rënduar, gjithsesi, policia ka vendosur të përdorë gazin e dëmshëm për qytetarët.

Siç shihet edhe nga këto pamje, një prej qytetarëve është shtrirë në tokë për shkak të bllokimit nga gazi. Protestues të tjerë i kanë ardhur menjëherë në ndihmë, duke e rikthyer në normalitet.

-----------------------------------------------------------------------------------------------------------------------------

Pas rrethimit të Kryeministrisë, Basha dhe Kryemadhi kanë udhëhequr protestuesit për te godina e Parlamentit. Me thirrjen "Parlamenti i krimit", qytetarët kanë kërkuar largimin e qeverisë së drejtuar nga Edi Rama. Protestuesit vijojnë të qëndrojnë te Parlamenti, ndërkohë që nuk ka informacione se si do të vijojë protesta.

-----------------------------------------------------------------------------------------------------------------------------

Mediat ndërkombëtare janë duke raportuar për protestën e opozitës në Tiranë. Associated Press, Washington Post dhe Abc News shkruajnë për kërkesën e mijëra shqiptarëve për dorëheqjen e qeverisë së drejtuar nga kryeministri Edi Rama.

-----------------------------------------------------------------------------------------------------------------------------

Këshilltari ekonomik i CDU-së gjermane, Martin Henze i është bashkuar protestës së opozitës në bulevardin ‘Dëshmorët e Kombit’. Ai është fotografuar në krah të ish-kryeministrit Sali Berisha, gjatë kohës që qëndronin në mes të protestës.-----------------------------------------------------------------------------------------------------------------------------

Siç shihet edhe nga kjo foto, qytetarët kanë rrethuar sot godinën e Kryeministrisë, si përgjigje ndaj Edi Ramës se nuk mund të hyjë më në "strehën e krimit". Në foton e publikuar nga 'A2', shihet edhe një protestues i gjakosur, por informacione nga incidenti nuk bëhen të ditura. Deri më tani nuk raportohet për përplasje të protestuesve me policinë, por vetëm hedhje e shashkave dhe tymueseve përpara godinës.

-----------------------------------------------------------------------------------------------------------------------------

Me një vendim të paparalajmëruar më parë, opozita i ka bërë thirrje protestuesve që të bëjnë një marshim për rrethimin e Kryeministrisë. Ky skenar nuk ishte lajmëruar më herët, por ish-deputeti Flamur Noka mori fjalën në podium dhe i bëri thirrje qytetarëve që t’i bashkoheshin në marshim.-----------------------------------------------------------------------------------------------------------------------------

Protesta e opozitës së bashkuar ka bërë Presidentin e Republikës së Shqipërisë, Ilir Metën, të ndërpresë vizitën e tij zyrtare në Azerbajxhan. Burime të Politiko.al pranë Presidencës bëjnë me dije se Meta është kthyer mbrëmë në darkë nga Azerbajxhani ku ndodhej për vizitë zyrtare. Sipas agjendës zyrtare planifikohej që presidenti Meta të vinte sonte në darkë ndërkohë që ka mbërritur në Tiranë mbrëmë në darkë.

-----------------------------------------------------------------------------------------------------------------------------

Ish-deputeti i Partisë Demokratike, Flamur Noka, ishte i pari që hipi në podiumin në bulevardin ‘Dëshmorët e Kombit’, për të kërkuar dorëheqjen e kryeministrit Edi Rama. "Rama ik", u shpreh Noka, duke theksuar se ky është vullneti i qytetarëve.

-----------------------------------------------------------------------------------------------------------------------------

Kryetari i opozitës, Lulzim Basha ndodhet aktualisht në mes të turmës që po proteston përpara Kryeministrisë. Gjatë ecjes në bulevardin ‘Dëshmorët e Kombit’, në krah të Bashës qëndronte Kiri Hajdari, djali i Azem Hajdarit. Ai ka qenë së fundmi në qendër të vëmendjes të mediave për shkak të qëndrimit të kundërt që ka mbajtur me motrën e tij, deputeten Rudina Hajdari, sa i përket djeges së mandateve.

-----------------------------------------------------------------------------------------------------------------------------

Monika Kryemadhi bashkë me ish-deputetët e LSI-së dhe mbështetësit e kësaj partie janë nisur nga selia e LSI për t`ju bashkuar protestës përpara kryeministrisë. Kryemadhi u shpreh për Ramën duke thënë se kryeministri i Shqipërisë po përgatitet për zgjedhjet e parakohshme e madje edhe për kandidatin për kryeministër të qeverisë tranzitore.

-----------------------------------------------------------------------------------------------------------------------------

Ka nisur protesta e opozitës përpara Kryeministrisë, ndërkohë që Lulzim Basha dhe Monika Kryemadhi kanë dalë nga selitë për t'ju bashkuar qytetarëve.-----------------------------------------------------------------------------------------------------------------------------

Ndryshe nga katër protestat e kaluara, Partia Demokratike ka kërkuar leje për 48 orë për zhvillim proteste. Por policia ka refuzuar kërkesën e opozitës duke paralajmëruar Partinë Demokratike se kanë afat deri në mesnatë në orën 24:00. Pas kësaj ore, policia kërkon nga PD që të mbyllin protestën.

-----------------------------------------------------------------------------------------------------------------------------

Ndërkohë që protesta e opozitës ka nisur përpara Kryeministrisë, Edi Rama është shfaqur ‘live’ në profilin e tij në ‘Facebook’. Ai ndodhet në qytetin e Beratit ku po zhvillon takim me operatorët turistik.

-----------------------------------------------------------------------------------------------------------------------------

Protestuesit e parë kanë nisur të grumbullohen përpara Kryeministrisë në kryeqytet. Protesta është planifikuar të nisë në orën 11:00, ndërkohë që efektivët e policisë ndodhen aty prej orësh. Policia dhe Garda kanë shtuar kamerat në bulevard, si dhe kanë lyer me graso shtyllat e ndriçimit.

(“S’ka Shqipëri, ka tre tepsi”, protestuesi në Tiranë shpreh zemërimin kundër partive politike dhe shoqërisë civile)

[video width="576" height="320" mp4="https://cdnimpuls.com/politiko.al/uploads/2019/03/video-1552730513.mp4"][/video]

-----------------------------------------------------------------------------------------------------------------------------

Lulzim Basha dhe Monika Kryemadhi ndodhen aktualisht në selitë e tyre. Ata presin orën 11:00 për t'u nisur drejt bulevardit 'Dëshmorët e Kombit', ku do u bashkohen qytetarëve protestues.

-----------------------------------------------------------------------------------------------------------------------------

Një numër i konsiderueshëm i qytetarëve raportohet nga degët e Partisë Demokratike në rrethe, se janë nisur për të marrë pjesë në protestën përpara Kryeministrisë në Tiranë. Raportohet se janë të paktën 60 mijë qytetarë nga qytete të ndryshme që po mbërrijnë në Tiranë, ku do i bashkohen protestës së orës 11:00.

-----------------------------------------------------------------------------------------------------------------------------

Pak orë përpara se të fillojë protesta e opozitës në Tiranë, Ambasada Amerikane u ka dërguar nga një mesazh qytetarëve të saj në vendin tonë.

Në mesazh kërkohet nga amerikanët që të tregojnë kujdes në katër zona të kryeqytetit: Bulevardi ‘Dëshmorët e Kombit’, Zogu i Zi, Qyteti i Studentit dhe stadiumi ‘Selman Stërmasi’.

Ambasada thekson se kohëzgjatja e protestës është e panjohur dhe se protestuesit mund të shpërndahen në zona të tjera.

-----------------------------------------------------------------------------------------------------------------------------

Rreth 1800 policë kanë rrethuar Kryeministrinë dhe godinat e tjera shtetërore që ndodhen në bulevardin ‘Dëshmorët e Kombit’, për shkak të protestës së planifikuar nga opozita. Efektivët e forcave ‘Shqiponja’, Forcës së Ndërhyrjes së Shpejtë dhe efektivë nga policitë e rretheve mësohet se ndodhen në gatishmëri në kryeqytet, në rast të ndonjë incidenti.