Flash News

Kërcet arma në Durrës, plagoset një 30-vjeçar

Aksident në Rrugën e Arbrit, makina del nga rruga, dy të plagosur

Arrestimet te “Bankers Petrolium”, Prokuroria jep detaje: Deklaroi 11.7 mld lekë humbje, shteti nuk përfitoi asnjë të ardhur për 20 vite

Vdesin tragjikisht në aksident ylli i Liverpool, Diogo Jota dhe vëllai i tij

Posta e mëngjesit/ Me 2 rreshta: Çfarë pati rëndësi dje në Shqipëri

KRYESORE

A do të arrihet një marrëveshje për Reformën Zgjedhore deri në 31 maj?

Politiko 27 Maj 2020, 10:29

A do të arrihet një marrëveshje për Reformën Zgjedhore

Në mbledhjen e 26 majit të Këshillit Politik palët u rikthyen në tryezë, pas bojkotit për shkak të tensioneve me shembjen e teatrit, duke gjetur edhe dakordësitë e para për propozime që u paraqitën në tryezë nga opozita PD-LSI.

Kompromisi u gjet për tri çështje si financimi i partive në fushata zgjedhore, pra për të ulur financimin nga privati dhe për të marrë më shumë buxhet nga taksapaguesit shqiptarë, për shmangien e zgjedhjeve në sezonin e verës, por në periudhat 15 prill – 15 maj dhe 15 tetor – 15 nëntor, si dhe për kuotat gjinore, që partitë në zgjedhje të vendosin 30% të kandidatëve gra.

Megjithatë, këto kompromise janë cilësuar si çështje të vogla, përballë atyre që mbeten ende të papërmbushura , “pikat e nxehta”, ndonëse afati i përcaktuar nga vetë palët për përmbushjen e Reformës Zgjedhore, por edhe i rikujtuar dje nga ambasadorja e SHBA pas takimit me kreun e opozitës, Lulzim Basha, është 31 maji.

Takimi i radhës mes ekspertëve dhe katër palëve, bashkëkryetarit të Komisionit nga PS, Damian Gjiknuri, bashkëkryetares së komisionit Rudina Hajdari nga opozita parlamentare, Oerd Byklykbashi nga PD dhe Petrit Vasili nga LSI është të enjten.

Deri në afatin e përcaktuar, palët duket se kanë lënë në fund debatet më të forta, për pika që deri tani ka patur ndasi.

Pikat që pritet të diskutohen brenda këtij afati të kufizuar ditësh janë kërkesa e opozitës PD-LSI për qeverinë kujdestare si një nga momentet që pritet të shkaktojë më shumë debat, për drejtuesin e përgjithshëm të Policisë së Shtetit, mënyra si duhet formuar Kolegji Zgjedhor, konsensusi për administratën zgjedhore, që të jetë i pavarur nga politika, pasi socialistët e duan të plotë, ndërsa opozita kërkon një sistem miks.

Një tjetër moment pikant është ndryshimi i sistemit, sidomos pas propozimit të rekomanduar së fundmi edhe nga ambasada amerikane për një model danez.

Duket se palët nuk janë shprehur të gatshëm për ndryshimin e sistemit, ndryshe nga Rudina Hajdari, e cila i akuzon edhe për pazare.

PS, përmes Damian Gjiknurit ka dalë kundër këtij formati, pasi sipas tij do të shpërbënte Kushtetutën.

Kujtojmë se sistemi danez është propocional rajonal, si ky që aplikohet aktualisht, por që ndryshe nga ky sistem ka dhe një listë të hapur korrektuese kombëtare për deputetët. Sistemi zgjedhor shqiptar aplikohet me lista të mbyllura, dhe qytetarët nuk kanë mundësi që të vendosin për emrat e deputetëve të caktuar.

Megjithatë, palët kanë theksuar vazhdimisht se për çështje që nuk do të gjejnë gjuhën e përbashkët do të trokasin në dyert e OSBE.

Pritet që në mbledhjen e radhës, të enjten diskutimi në Këshillin Politik të fokusohet në pika si rolin e policisë në zgjedhje, riformatimi i Komisionit Qendror të Zgjedhjeve, rolin e SPAK, riformatimi i Komisionit Qendror të Zgjedhjeve.