Këshilli Kombëtar pritet që të vendosë krijimin e Aleancës Qytetare për Mbrojtjen e Demokracisë. Vendimi iu propozua Këshillit Kombëtar nga kryesia e Partisë Demokratike ditën e djeshme dhe synon që të bëjë bashkë opozitën me elitën e shoqërisë, njerëzit e paangazhuar dhe rininë për t’i dhënë fund tranzicionit nëpërmjet zgjedhjeve të lira e të ndershme, ndryshimit të sistemit të kalbur nga korrupsioni dhe kriminalizimit të tij.
“Ne duhet të bëjmë shqiptarët bashkë, jo vetëm për të ardhur në pushtet, por për të ndryshuar Shqipërinë. Ky ndryshim nuk mund të bëhet duke përjashtuar, por duke përfshirë.”- tha lideri i opozitës Lulzim Basha në mbledhjen e Këshillit Kombëtar të PD, duke prezantuar projektvendimin për krijimin e Aleancës për Mbrojtjen e Demokracisë, i cili mësohet se përbëhet nga dy pika.
