“10 vite jetova si burrë”, rrëfimi i shkrimtares afgane: Talebanët më shpërfytyruan, kam vdekur e rilindur shumë herë

Jeta e popullit afgan ka qenë një sfidë për t’i mbijetuar regjimit të ashpër të talebanëve, dhunës fizike dhe asaj psikologjike dhe vdekjes nga duart mizore.

Në një intervistë për Euronews, shkrimtarja dhe aktivistja afgane Nadia Ghulam tregon përpjekjet e saj për të evakuuar miqtë dhe të afërmit nga Afganistani që tanimë është nën kontrollin e plotë të talebanëve.

"Situata në aeroportin ndërkombëtar të Kabulit është shumë e vështirë. Ka mijëra njerëz dhe mes tyre janë edhe familja ime," tha ajo, duke folur për Euronews në Barcelonë. "Unë kam qarë shumë gjatë ditëve të fundit ... dhe ministria spanjolle e Punëve të Jashtme më tha se do të ishin në gjendje të largoheshin. Shpërtheva në lot. Tani ndjej paqe dhe kam përsëri shpresë."

"Për 10 vjet më duhej të jetoja si burrë"

Nadia ishte 11 vjeç kur talebanët erdhën në pushtet në Afganistan.

Ajo sapo ishte liruar nga spitali, pasi një shpërthim shembi shtëpinë e saj duke lënë të vdekur vëllain dhe duke shpërfytyruar Nadian. Gjithçka për të cilën prindërit e saj kishin sakrifikuar, u zhduk në shumë pak sekonda.

Nadia shprehet se në kushtet kur talebanët nuk i lejonin femrat as të dilnin nga banesa, as të punonin, ajo vendosi të marrë rolin e burrit për të mbajtur gjallë mbijetesën e familjes së saj.

“Talebanët thanë se gratë nuk mund të punonin, nuk mund të studionin, nuk mund të dilnin nga shtëpitë e tyre. Nuk dija çfarë të bëja. Vëllai im ishte zhdukur. Babai im vuante nga sëmundje mendore. Kështu që vendosa të vesh rroba burrash për një ditë. Mendova se nesër gjërat do të ndryshojnë. Unë do të kthehem në Nadia dhe do të vazhdoj jetën time. Por kjo zgjati për 10 vjet. Për 10 vjet, më duhej të jetoja si një njeri, të punoja si një njeri. Kam humbur identitetin tim. Kam humbur një pjesë të fëmijërisë sime.”, është shprehur shkrimtarja afgane.

Më vonë, Nadia arriti të fitojë statusin e azilkërkuesit në Spanjë ku ndërmori edhe një operacion për rindërtimin e fytyrës së saj.

"Unë jam një e mbijetuar. Ndihem sikur kam vdekur dhe kam rilindur shumë herë. Ditët e fundit unë vdiqa përsëri. Por tani po përpiqem të rilind me shpresën për t'i dhënë përsëri dritë familjes sime dhe të gjithë atyre që kanë nevojë”, ka thënë Nadia.

Talebanët e morën kontrollin në Afganistan në mënyrë të beftë. Presidenti amerikan Joe Biden urdhëroi tërheqjen e trupave ushtarakë amerikanë dhe në të njëjtën kohë ish-presidenti afgan Ashraf Ghani braktisi vendin dhe u largua.

Aeroporti ndërkombëtar i Kabulit vijon të jetë prej ditësh nën presionin e kaosit ku mijëra njerëz presin të evakuohen. Mes situatës së tensionuar, ka pasur edhe të shtëna me armë kur vetëm para pak ditësh humbi jetën një rorje afgan dhe u plagosën tre të tjerë.