“Sekret tregtar”, Rama sulmon opozitën, nuk tërhiqet nga kritikat për BE-në: Gojën s’do e mbyllim

Kryeministri Edi Rama në konferencën për mediat tha se kontrata me “Pfizer” nuk bëhet publike, pasi është e mbrojtur nga sekreti tregtar.

“Kontrata me Pfizer është sekret, sipas klauzolës së sekretit tregtar. Nëse një vend në BE e bën publike, do e bëjmë edhe ne”, u shpreh Rama. Kjo shtoi ai nuk lejon edhe publikimin e çmimit të vaksinës.

I pyetur lidhur me dyshimet që mund të ngrihen, kryeministri u tha gazetarëve të mos ushqejnë popullin me konsipracione.

“Është lehtësisht e verifikueshme sepse paratë që paguhen për Pfizer nuk mbulohen nga sekreti. Mund ti shikoni dhe nuk duhet ta ushqeni popullin me konspiracione idjoteske. Është shumë e thjeshtë, Pfizer ka një kontratë me të gjitha vendet dhe asnjë kontratë nuk është publike. Unë këtë gjë nuk e  dija, thashë që do të shkoj në Parlament dhe do ta bëj publike. Më thanë që nuk bëhet dot publike”, tha Rama.

Ky i fundit komentoi edhe qëndrimin e ambasadës franceze sa i përket “pakënaqësisë” së tij nga BE-së.

Kreu i qeverisë tha se nuk ka bërë asnjë sherr me Bashkimin Evropian, por deklaratat e tij janë bërë referuar reagimeve të OBSH.

“Unë nuk kam bërë asnjë sherr me BE dhe mua nuk më ndalon askush të them opinionin tim. Mos u merrni me opinionin tim, por me opinionin e OBSH.

Nuk ka të drejtë as ambasada franceze, opozita jo e jo dhe shembulli im është ai i OBSH. Lexojeni cfarë ka thënë OBSH për shpërndarjen e vaksinës. Ka thënë jemi në prag të një katastrofe morale”, tha kryeministri.

Ai nënvizoi se fakti që jemi të vegjël, nuk jemi të pasur dhe nuk jemi anëtarë të BE “nuk na bën të rrimë me gojën mbyllur”. Rama sulmoi edhe opozitën, që sipas tij ka treguar se ka një karakter shumë të dobët.

“Çfarë thashë unë që u mërziten këta. Është çështje karakteri, opozita me reagimin e vet ka treguar karakterin e vet. Karakteri i dobët i atyre që kur kanë pasur pushtetin janë përkulur me servilizëm kujtdo që ka folur me gjuhë të huaj. Unë nuk hyj në këtë kategori dhe kjo që unë them nuk do të thotë mungesë respekti", tha Rama.