"Të prekurit me Covid-19 nuk do të votojnë", Rama flet për vaksinat; Sulmon opozitën: Luli i lidhur me zinxhirë

Kryeministri Edi Rama zhvilloi sot konferencën e fundit me fokus ekonominë, ku foli dixhitalizimin. Shefi i qeverisë u ndal edhe te procesi i vaksinimit, por nuk dha një datë se kur do të nisë fushata masive. Rama shprehu bindjen se në sezonin veror do të ketë lehtësime sa i takon zinxhirit të infektimeve.

“Nuk di ç’domethënë a ka një datë për vaksinimin masiv, kur këtu bëhet fjalë për të siguruar një sasi dozash që garantojnë një fushatë masive çdo ditë vaksinimi. Përsa kohë kjo sasi dozash nuk është në Shqipëri data që më kërkoni është muhabet. Ta hedhim në fall”, tha Rama.

Sa i përket mënyrës së si do të procedohet më 25 prill për personat e prekur nga koronavirusi, kryeministri tha se nuk mund të votojnë.

“Do bëjmë të njëjtën gjë që kanë bërë vendet e tjera. Ata të cilët janë testuar pozitivë dhe nuk janë negativizuar, duhet të qëndrojnë në shtëpi. Ata normalisht duhet të vetëkarantinohen, nuk bëhet fjalë”, tha Rama.

Kryeministri u pyet se pse vaksinat e "Pfizer" mbërritën në Shqipëri dje bashkë me të, ndonëse ishte lajmëruar nëj shtyrje e afatit. Ai tha se pas kësaj fshihet edhe puna e ministrave.

“Ndodhi ajo që ndodh gjithmonë me mua dhe ata që flasin anglisht dhe fatmirësisht në këtë pjesë jam i kënaqur që nuk jam vetëm se kam dhe dy të tjerë. Ndodhi ajo me gishta në vesh. Ndodhi ajo që o do vijnë sot, o do vijnë sot. Unë vërtetë jam lypësi më i madh por nuk jam lypës që kthej faqen tjetër.

Jo vetëm ndodhi ajo por si rezultat i asaj ndodhi dhe tjetra. Morëm dhe angazhimin për 30 mijë vaksina të tjera nga Pfizer në muajin Prill. Sa i përket të parës jo nuk do të bëni gabimin që bën Ilir Meta”, tha Rama.

Ky i fundit foli dhe për vizitën e tij në Bruksel një ditë më parë, ku mohoi të kishte marrë ultimatume, por sipas tij vetëm vlerësime. Rama madje iu kthye ashpër edhe gazetares shqiptare që bëri pyetje në Bruksel lidhur me pastërtinë e kandidatëve.

Gjatë konferencës së tij nuk munguan as sulmet për opozitën, marrëveshjen e saj për 25 prillin dhe Presidentin Ilir Meta. Sipas Ramës, këta të fundit duan të shpërbëjnë Reformën në Drejtësi për interesa personale.