Flash News
Si e toleroi Ceno Klosi kompaninë e inceneratorëve, negociatat e dyshimta për miliona euro
Flet Abazoviç: Pse Mali i Zi votoi kundër Kosovës në KiE
Pas arrestimit të Berberit, Rama emëron drejtorin e ri të Autoritetit Rrugor Shqiptar
Përfshihet në flakë një apartament te bulevardi ‘Zogu i Parë’ në Tiranë
Berisha: Ishim opozita e parë që kërkuam anëtarësimin në NATO pas rënies së komunizmit
Nga ‘check up-i’ te legalizimet dhe shëndetësia/ Berisha shpalos planet e PD-së
Kryetari i Partisë Demokratike Sali Berisha shpalosi në bashkëbisedimin me qytetarët në Facebook, vendimet që do të marrin demokratët me marrjen e pushtetit dhe rrëzimin e qeverisë Rama.
Berisha garantoi se do të depozitojnë në Parlament ligjin që njeh drejtësinë dhe që do të zbatohet në mënyrë autonome për t’i dhënë ndëshkimet e merituara, atyre që vodhën paratë e shqiptarëve.
“Ne do të depozitojmë në parlament ligjin që nuk njeh parashkrimin për çdo kryeministër që ka shërbyer në Shqipëri. Në këtë ligj nuk do të shpëtojë nga verdikti i drejtësisë, nuk bëhet fjalë për këtë drejtësi, e cila se është e tillë, rezulton para një javë, institucioni më i korruptuar i drejtësisë. Por bëhet fjalë për një drejtësi që do zbatojë ligjin në mënyrë autonome dhe do u japë ndëshkimet më të merituara atyre që vodhën shqiptarët. Prandaj si inceneratorët, por edhe aferat e Durrësit, Butrintit, dhe shumë të tjera, do marrin përgjigjen e merituar nga drejtësia shqiptare”, tha Berisha.
Edhe legalizimet janë në fokusin e PD-së. Berisha tha se qytetarët nuk do të marrin më fletushka legalizimi, por tapitë përfundimtare.
“Legalizimi është një problem i vulgarizuar nga mashtrimet pa fund të kësaj qeverie. Garantoj se do i jepet fund me një skemë më të thjeshtë që është përdorur ndonjëherë. Ata të cilët kanë marrë ato fletushka, nuk do marrin më fletushka të përkohshme, por do marrin tapitë përfundimtare të shtëpive”, u shpreh Berisha.
Kreu i demokratëve tregoi planet për sistemin e Shëndetësisë. Berisha tha se do të dyfishohen rrogat e punonjësve të shëndetësisë dhe do të garantohet buxheti i mjaftueshëm për reformimin e tij.
“Ne do të dyfishojmë rrogat e punonjësve të shëndetësisë, do të garantojmë një buxhet të mjaftueshëm për modernizimin dhe reformimin e sistemit të shëndetësisë. Do bëjmë gjithçka, që mjekë të shquar shqiptarë, të rikthehen kundrejt stimujve që u takojnë. Pra, sot shërbimi shëndetësor në Tiranë, renditet në dhjetëshen e fundit në botë dhe kjo është një katastrofë e vërtetë. Këtë situatë do e ndryshojmë me shpejtësi në vitet e pushtetit të PD-së”, tha kryedemokrati.
Berisha garantoi anulimin e koncesionit ‘check up’, duke deklaruar se është grabitja dhe plaçkitja më e tmerrshme e shqiptarëve. Berisha tha se Vilma Nushi, Ilir Beqja dhe Edi Rama do të vendosen para drejtësisë për qindra miliona euro të vjedhura.
“Është një shkrirje e familjeve Koleka e Nushi në një plaçkitje dhe grabitje të tmerrshme të qytetarëve shqiptarë. Këtë nuk e pranojnë vendet më të zhvilluara. Do anulohet dhe do të shkojnë para gjyqit, si Vilma Nushi, Ilir Beqja dhe Edi Rama, të cilët iu vërsulën të përdorin shëndetin e qytetarëve shqiptarë për të vjedhur qindra miliona euro. Informoj shqiptarët, se Vilma Nushi është një nga më kryesoret në shkatërrimin e sigurisë së barnave në Shqipëri, pasi me angazhimin e kushëririt të saj nga burri, Edi Ramës, hoqi ligjin, sipas të cilit në Shqipëri nuk mund të futeshin ilaçe që nuk përdoren në territoret jashtë BE. Pas heqjes së kësaj, Shqipëria u shndërrua në koshin e ilaçeve të skaduara nga Beogradi gjer në Bangladesh”, vijoi Berisha.
Berisha i bëri thirrje pronarëve të biznesit të vogël të përgatiten për një grevë të përgjithshme, teks premtoi se me ardhjen e PD-së në pushtet, do të ketë lehtësira fiskale për ta.
“Biznesi i vogël, së pari garantoj se nga 200 lekë që paguan energji, do zbresë aty ku ishte, te 60 lekë. Pra, do të ulet me tre herë, çmimi i energjisë. Kjo jo vetëm për biznesin e vogël, por për të gjitha bizneset në Shqipëri. Së dyti, biznesi i vogël do ketë lehtësira shumë të mëdha fiskale. Do hiqet taksa mbi të. Do kalohet për sigurimet shoqërore në nivelin 10 përqind. Mbi të gjitha do mbrohet biznesi i vogël nga peshkaqenët e mëdhenj, oligarkët e qeverisë, që kanë krijuar bizneset e tyre do vrarë qindra e mijëra biznese të vogla. Bizneset e tyre bëjnë evazion dhe vrasin konkurrencën. I bëj thirrje biznesit të vogël të përgatitet për grevë të përgjithshme”, deklaroi Berisha.