Pikat kryesore/ Berisha flet për Frontin që do të udhëheqë protestën e 7 korrikut, qëllimin dhe fton Metën

Kryetari i PD-së, Sali Berisha zhvilloi sot një konferencë për mediat, ku foli për disa çështje, por në fokus ishte sjellja e kryeministrit Edi Rama në Samitin e BE-së, për të cilën kryedemokrati shprehu rezerva.

Një tjetër pikë ku u ndal Berisha ishte edhe protesta e 7 korrikut, të cilën ai e njoftoi pak ditë më parë. Kryetari i demokrati tha se protestat nuk duhet të ndalen deri në rrëzimin e qeverisë Rama.

Ai shpalli “Frontin për Shpëtimin e Shqipërisë”, që sipas tij do të udhëheqë aksionin opozitar.

“Protestat duhet të jenë të atilla që nuk do të ndalen deri në realizimin e qëllimit. Kush do të jetë kjo protestë,do të përcaktojë vetë protesta. Kjo lëvizje është një front për shpëtimin e Shqipërisë. Unë jam i gatshëm edhe të udhëheq edhe të më udhëheqin.

Qëllimi i protestës është që të ngrihen shqiptarët në këmbë kundër këtij regjimi armiqësor, kundër kësaj qeveria që është kundër shqiptareve. T’i ngre shqiptarët në këmbë kundër një regjimi që ka futur dorën në xhepat e shqiptarëve. Ju e dëgjuat të dhënat e fundi në Parlament që bëra unë. Të dhënat e INSTAT tregojnë se çmimi i bukës dhe i qumështit është rritur, 7 herë më shumë. Vaj dhe yndyrat kushtojnë 106 % më shumë se mesataren e BE. Inflacioni është gënjeshtër ajo që thuhet”, tha Berisha.

I pyetur nëse ka një strategji për protestën e 7 korrikut dhe se a do të tentohet futja në godinën e kryeministrisë, Berisha deklaroi sot se nuk është ai që vendos për atë që do të ndodhë.

Ai shtoi se Rama ia mbath para se të fillojnë protestat dhe se ai është njëri prej aktorëve në këtë front dhe vendimet merren nga koalicioni, nga fronti.

“Edi Rama është i vetmi kryeministër që ia mbath para se të fillojnë protestat. Është e vërtetë. Nuk ka ndenjur kurrë në kryeministri. Ai, ndiqeni atë ditë, nga tunelet e Skraparit, gjer në galeritë e Klosit, por të sigurt të jeni ju që në asnjë protestë nuk ka qëndruar në zyrë. Kemi të bëjmë me një front, nuk jam unë. Unë jam njëri prej aktorëve në këtë front dhe vendimet merren nga koalicioni, nga fronti”, deklaroi Berisha.

Ky i fundit u pyet për Ilir Metën dhe bashkëpunimin pasi ky i fundit të lërë presidencën. Kryedemokrati e mirëpriti, pohoi se është takuar disa herë me Metës, ndërsa e ftoi atë që të bashkohet në koalicionin opozitar.

“Kemi pasur…disa herë jemi takuar me presidentin Meta. Ai i mbyll këto javë detyrimet dhe mirëpritet shumë kontributi i tij dhe i LSI, në opizitarizmin kundër Edi Ramës. DNE do të bashkohemi me të gjitha forcat politike që besojnë se ku regjim është armiqësor kundër Ramës”, tha Berisha.