Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

Ditari i Opozitës

Raporti i OSBE-ODIHR, Dizdari: Demokracia nën trysni, zgjedhjet me kushte të pabarabarta

Politiko 22 Maj 2025, 10:22

Nga Fjoralba Dizdari

Raporti paraprak i OSBE ODIHR për zgjedhjet e 11 majit 2025 hodhi dritë mbi një sërë shqetësimesh që cenojnë ndershmërinë dhe barazinë e garës zgjedhore në Shqipëri, duke konfirmuar alarmin që shumë e kanë ngritur me zë dhe me fakte.

Sipas misionit të vëzhgimit ndërkombëtar, ky proces u shoqërua me problematika serioze që favorizuan në mënyrë të padrejtë qeverinë dhe minuan besimin e publikut tek zgjedhjet si mekanizëm demokratik.

Një nga kritikat më të forta ishte përdorimi politik i administratës publike dhe burimeve shtetërore në funksion të fushatës së mazhorancës. Ky fenomen, i njohur prej vitesh në Shqipëri, u përsërit sërish, duke vënë në pikëpyetje parimin e barazisë në garë. OSBE ODIHR vuri në dukje presionin ndaj punonjësve të administratës, si dhe përdorimin e pozicioneve shtetërore për të ndikuar mbi votuesit.

Po aq shqetësues ishte edhe momenti i faljes së gjobave nga ana e qeverisë pak ditë para zgjedhjeve, një veprim që raporti e cilëson si favorizues dhe i ndërmarrë në kushte të pabarabarta në raport me opozitën. Ky vendim krijoi një avantazh elektoral të padrejtë dhe dëmtoi frymën e një gare të ndershme.

Raporti evidenton gjithashtu ankesa të shumta për shitblerje votash në disa zona, një praktikë që cënon rëndë integritetin e procesit zgjedhor dhe shkel parimet themelore të zgjedhjeve të lira.

Një tjetër aspekt i theksuar nga OSBE ODIHR ishte kufizimi i lirisë së informacionit, përfshirë ndalimin e rrjetit TikTok nga qeveria gjatë fushatës. Sipas raportit, kjo ndërhyrje ndodhi në mënyrë të qëllimshme, duke dëmtuar rrjedhën e informacionit, veçanërisht për të rinjtë, dhe duke kufizuar padrejtësisht hapësirën e komunikimit për opozitën.

Të gjitha këto elementë, nga keqpërdorimi i pushtetit shtetëror, tek presioni mbi administratën, falja e gjobave dhe sinjalizimet për shitblerje votash, përbëjnë një tablo të rrezikshme për demokracinë.

Sot, më shumë se kurrë, kemi nevojë për një sistem zgjedhor që nuk matet me numra, por me drejtësi. Një proces ku pushteti nuk shfrytëzon shtetin, ku vota ka vlerë dhe nuk blihet, dhe ku qytetari nuk ndjehet i frikësuar, por i përfaqësuar.

Sepse zgjedhjet nuk janë thjesht për të marrë pushtet. Janë për të ndërtuar besim.

Ne nuk kemi nevojë për zgjedhje që mbajnë një datë në kalendar. Sepse demokracia nuk matet me fletë votimi të numëruara, por me lirinë për t’i mbushur ato pa frikë, pa pazar dhe pa presion. Kur kjo liri cenohet, nuk kemi më zgjedhje. Sepse kur vullneti i qytetarëve deformohet, nuk është thjesht rezultati që humbet legjitimitetin, është e ardhmja që humbet drejtimin.