Shkarkimi i Metës, vjen reagimi i parë nga PD: Vendim antikushtetues, Kushtetuesja të ruajë paanësinë

Partia Demokratike e ka cilësuar si një "sulm antikushtetues të Parlamentit ilegjitim mbi Institucionin e Presidentit të Republikës", vendimin e sotëm të Kuvendit për shkarkimin me 104 vota pro nga detyra të presidentit Ilir Meta.

Në një deklaratë për mediat, PD thekson se ky vendim thellon edhe më shumë tiparet antidemokratike të regjimit Rama-Doshi dhe vjen menjëherë pas masakrës zgjedhore.

PD e konsideron antikushtetues vendimin e Kuvendit dhe kërkon nga Gjykata Kushtetutese të ruajë paanësinë dhe të garantojë pavarësinë e institucioneve kushtetuese.

DEKLARATË E PARTISË DEMOKRATIKE TË SHQIPËRISË

Sulmi antikushtetues i Parlamentit ilegjitim mbi Institucionin e Presidentit të Republikës është akt që thellon edhe më shumë tiparet antidemokratike të regjimit Rama-Doshi. Ky akt vjen menjëherë pas masakrës zgjedhore dhe grabitjes më të madhe të votave të kryer ndonjëherë.

Përfaqësuesit e krimit të organizuar në Kuvendin njëpartiak të Shqipërisë nuk mund të jenë kurrë garant të Kushtetutës dhe as nuk mund të marrin vendime në emër të saj. Edi Rama ka përdhosur me qindra herë Kushtetutën e Shqipërisë dhe është ekspozuar përpara çdo shqiptari si armik i demokracisë dhe shtetit ligjor.

Partia Demokratike e konsideron antikushtetues vendimin e Kuvendit njëpartiak për shkarkimin e Presidentit të Republikës dhe kërkon nga Gjykata Kushtetutese të ruajë paanësinë dhe të garantojë pavarësinë e institucioneve kushtetuese, duke refuzuar farsën për shkarkimin e Presidentit të Republikës.

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm