Zgjedhjet e 14 majit/ Firmoset marrëveshja e koalicionit midis PD dhe PBDNJ, Berisha: Do godasim sistemin monist

Firmoset marrëveshja e Koalicionit mes Partisë Demokratike dhe PBDNJ për zgjedhjet vendore të 14 majit.

Sali Berisha dhe Vangjel Dule kanë nënshkruar marrëveshjen që parashikon se PBDNJ do të mbështesë kandidatët e Partisë Demokratike, ndërkohë që iu lanë të lira tre bashki.

Në këto tre bashki PBDNJ ka përcaktuar kandidatët: Fredi Bejleri do të jetë kandidat për Himarën, Thanas Maneka për Dropullin dhe Leonidha Kristo  për Finiqin.

Opozita e bashkuar ka rënë dakord që të dalë me një kandidat të përbashkët në zgjedhje, duke e vlerësuar si mënyrëm më të mirë për të mundur socialistët.

Pas firmosjes së marrëveshjes, Berisha deklaroi se më 14 maj, do t’i jepet goditje fatale sistemit monist në vend. Më tej theksoi se bashkitë do i kthehen qytetarëve.

“Shpreh kënaqësinë time dhe të PD për këtë marrëveshje me një aleat të hershëm të PD, me të cilin ne vendosim të bëjmë një betejë të përbashkët kundër monizmit të plotë, të vendosur nga regjimi më i korruptuar në Europë dhe botë, regjimi i Edi Ramës.

Përmbysja e këtij monizmi është përparësi absolute e çdo qytetari të lirë, e çdo opozitari dhe në këtë kontekst, ne së bashku me PBDNJ, OMONIA-n, bashkojmë forcat me bindjen se me 14 maj do i japim një goditje fatale sistemit monist.

Nga ana tjetër, ne synojmë që t’ju kthejmë bashkitë qytetarëve shqiptarë. T’i kthejmë bashkitë në shtëpitë e përbashkëta të qytetarëve shqiptarë. Qytetarët e parë të këtyre bashkive të kenë vetëdijen e plotë, përgjegjësinë e plotë, gatishmërinë e plotë për të funksionuar si shërbëtorë të këtyre qytetarëve. Për të përdorur në mënyrën më transparente dhe të ndershme të gjitha burimet njerëzore dhe materiale, financiare, të bashkisë, për të shfrytëzuar të gjitha potencialet e mëdha që çdo bashki ka sot në Shqipëri, së pari në interesin më të mirë të qytetarëve të atyre bashkive”, tha Berisha.

Ndërkohë kryetari i PBDNJ-së, u shpreh se ky bashkëpunim do ta çojë opozitën drejt fitores në 14 maj.

“Shpreh kënaqësi për nënshkrimin e marrëveshjes. Është një bashkëpunim i hershëm me PD dhe në shumë drejtime i suksesshëm.  Rruga është e gjatë dhe e vështirë por na garanton fitore. Synojmë që të sjellim kandidaturat më të denja për komunitetin. Primaret ishin një risi dhe një realitet i pakthyeshëm që do shënojë aktivitetin e çdo force politike.

Së dyti ne do të sjellim programe konkrete, për çdo komunitet, programe të cilat do ofrojnë zgjidhje për problematikat lokale. Së treti, bashkëpunimi ynë dhe forcat e tjera opozitare, do të sjellim më 14 maj në çdo derë mesazhin se ata und të ndryshojnë fatin e tyre”, deklaroi Dule.