Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

"E djeshmja ishte ‘show’"/ Një tjetër tentativë e dështuar për diskutimin e listave në Këshill, Rama drejt humbjes së durimit: Vendosim edhe pa ju

Politiko 23 Korrik 2020, 20:23

Ka përfunduar pas 60 minutash mbledhja e Këshillit Politik e zhvilluar pak pas miratimit të marrëveshjes së “5 Qershorit”. Në takimin e sotëm, përveç çështjeve të përcaktuara në axhendë për shit-blerjen e votës, veprat penale që dëmtojnë zgjedhjet dhe krimin zgjedhor, është tentuar diskutohet nga ana e mazhorancës edhe ndryshimet kushtetuese dhe listat e hapura.

Mirëpo, diskutimi i këtyre ndryshimeve është refuzuar kategorikisht nga përfaqësuesit e opozitës jashtëparlamentare.

“Unë propozova që në vazhdën e takimeve që kishim zhvilluar dy ditë më parë, të vijonim diskutimin për ndryshimet kushtetuese për listat e hapura. Opozita nuk kërkon që të trajtohet kjo çështje në Këshill, edhe pse thirrja jonë dhe e presidentit ka qenë që të dialogohet dhe kjo çështje. Ne kërkuam dialog dhe vazhduam dhe sot ta prekim. Ne kemi mundësi që të vijojmë diskutim deri në 30 korrik. Kuvendi ka filluar një procedurë për ndryshime kushtetuese që nuk e ndalojmë dot. Nuk pati dakordësi. PD nuk kërkon që të vazhdohet më në këtë drejtim”, ka thënë Gjiknuri.

Sipas Vasilit dhe Bylykbashit, ndryshimet kushtetuese janë një çështje që mund të shtrohen në tryezën e Këshillit Politik, por jo brenda këtyre afateve.

“Opinioni publik duhet të dijë se kjo çështje është shtruar në tryezë prej dy ditësh dhe është kërkuar që përfundimi i diskutimeve të kryhet brenda 6 ditësh. Nëse për kodin elektoral u deshën 6 muaj, kërkohet që Kushtetuta e vendit të ndryshohet për 6 ditë. 6 muaj për Kodin e 6 ditë për Kushtetutën”, ka thënë Vasili, ndërsa shton se “Këshilli Politik mund të diskutoj çdo cështje, por kurrsesi për 6 ditë”.

Sipas nënkryetarit të LSI-së, qëllimi i mazhorancës nuk është diskutimi i ndryshimeve kushtetuese, por verdikti përfundimtar, pasi kryeministri Rama u frikësohet zgjedhjeve të ardhshme sipas marrëveshjes së “5 Qershorit”.

Mazhoranca nuk do që të diskutojë, do datën, verdiktin, ata kanë vetëm një qëllim të thyejnë digën që ndan, sepse zgjedhjet sipas 5 qershorit janë e kundërta e zgjedhjeve të manipuluara. Pretendimet e kryeministrit janë të shkruara qartë që t’i heqin mundësinë shqiptarëve që të votojnë një ofertë publike sepse do të shkojë tek pazaret me dyer të mbyllura. Çdo ndryshim duhet diskutuar me transparencë”, ka thënë Vasili.

Po ashtu, përfaqësuesi i demokratëve në tryezën e Këshillit Politik, Oerd Bylykbashi, e ka konsideruar mbledhjen e djeshme të këtij Këshilli si një “show” politik, pasi Opozita nuk ishte e pranishme.

Bylykbashi theksoi se, opozita i qëndron marrëveshjes së 14 Janarit dhe të 5 Qershorit dhe se çdo ndryshim për zgjedhjet duhet të kalojë nga Këshilli Politik dhe se “çdo veprim i njëanshëm nga mazhoranca për ndryshimet kushtetuese, minon dhe nxjerr nga shinat arritjen e marrëveshjes së 5 qershorit”.

Ndërkaq, anëtarja tjetër e Këshillit Politik, Rudina Hajdari i ka bërë apel Opozitës së bashkuar të pranoj diskutimin në tryezën e Këshillit Politik për ndryshimet kushtetuese, të cilat janë në të mirë të shqiptarëve. Ajo ritheskoi dhe njëherë se nuk tërhiqet pas deri sa t’i bëjë listat e hapura realitet.

“Edhe sot erdha në Këshillin Politik që t’i kërkojë Partisë Demokratike të mbështes ndryshimet kushtetuese që do të bëhen në 30 korrik. Çdo demokrat do që në parlament të vijnë njerëz që do të përfaqësojnë popullin dhe jo kreun e partisë. Çdo njëri që është i zhgënjyer nga kjo mënyrë të bashkohen dhe të mbështesin listat e hapura.

Ku janë ata demokratë që flisnin për shumë problematika në arsim e shëndetësi dhe të gjitha këto do të votohen në Kuvend dhe do të jenë në dorë të vetëm një apo dy persona, deputetët nuk e kanë sot fjalën e lirë. Deputetët sot nuk e kanë fjalën e lirë, nuk kanë vizion dhe argumenta. Listat e hapura do ta fuqizojnë qytetarin shqiptar”, deklaroi Hajdari, teksa shton se “nuk ka njeri që ta ndalë këtë fortunë ndryshimi”.

Në përfundim, i keqardhur nga refuzimi i një tjetër oferte nga ana e opozitës së bashkuar përsa u përket diskutimit të ndryshimeve kushtetuese dhe hapjes së listave në Këshill, kryeministri Rama i ka bërë thirrje kësaj të fundit për reflektim ose “parlamenti do vendosë edhe pa ta”.

“Refuzimi për të diskutuar mbi risitë kushtetuese është në fakt refuzim për të pranuar realitetin dhe kjo është një sëmundje tanimë e vjetër e opojashtëparlametares! Keqardhje. Por me ata pa ata, Parlamenti vendos edhe për ta, si sot si në 30 korrik. Reflektoni miq, listat do hapen!”, ka deklaruar Rama.

Kujtojmë se, ditën e sotme është votuar në Kuvend me 97 vota pro dhe vetëm 6 kundër marrëveshja e arritur në 5 Qershor në Këshillin Politik. Pas miratimit të “5 Qershorit”, mazhoranca dhe kreu i qeverisë Rama kanë paralajmëruar kalimin në parlament të ndryshimeve kushtetuese më 30 korrik, qoftë kjo edhe pa prezencën e opozitës jashtëparlamentare.

Pas përfundimit të mbledhjes së Këshillit dje, Rama në një apel për Bashën, i kërkoi atij të mos ripërsëriste edhe njëherë gabimet e së shkuarës, duke e privuar PD-në nga ky ndryshim i pashmangshëm.