400 mijë pula të ngordhura/ Ministria mohoi prezencën e gripit të shpendëve, emrat e kompanive mbahen të fshehta

Rreth 400 mijë shpendë të llojit pula ngordhën në tre pulari të Durrësit. Sektori i shërbimit veterinar izoloi dhe vendosi në karantinë pularitë deri në daljen e rezultateve laboratorike.

Nga ana e bizneseve përgjegjëse për mbarështimin e shpendëve të ngordhura, nukpati asnjë reagim mbi lajmin, madje asnjë informacion për konsumatorin e produkteve që prodhonin.

Autoriteti Kombëtar i Ushqimit garantoi se asnjë nënprodukt i shpendëve që është hedhur në treg, si mishi apo vezët, nuk vjen nga shpendët e infektuara me gripin e shpendëve.

“Nuk ka vend për panik. Në treg nuk ka vezë të pulave të prekura nga gripi i shpendëve”, njofton AKU.

Por teksa, AKU në njoftim e theksonte “gripin e shpendëve”, Ministria e Bujqësisë në një reagim lidhur me rastin e 400 mijë pulave të ngordhura, mohoi të kishte lidhje me Influencën Aviare H5N8 ose siç njihet ndryshe edhe gripi i shpendëve.

Në reagimin e ministrisë thuhej se “Pas analizave të kryera në tre data të ndryshme dhe me mbi 60 kampione, rezultatet e marra nga mostrat e dërguara nga Agjencia Kombëtare e Veterinarisë dhe Mbrojtjes së Bimëve drejt laboratorit të certifikuar në Institutin për Sigurinë Ushqimore dhe Veterinarinë përjashtojnë kategorikisht sëmundjen virusale të gripit të shpendëve. Rezultatet e analizimit në laboratorin e referencës konfirmojnë se nuk ka sëmundje që rrezikojnë konsumatorin apo produktet ushqimore me origjinë nga shpendët.”

Kështu, ministria përjashtoi mundësinë që shpendët të kishin ngordhur si pasojë e me Influencës Aviare H5N8.

Por, vetëm një ditë më parë Ministria e Bujqësisë njoftoi se ishte konfirmuar rasti i parë i Influencës Aviare H5N8 ose e gripit të shpendëve pikërisht në Durrës. Kampionët e analizave, sikurse pohon ministria, janë marrë në stabilimente të ndryshme ku mbarështohen shpendë të llojit pula.

Pra, Ministria mohoi prezencën e gripit të shpendëve pas njoftimit të rastit.

Kjo pasohet edhe nga siguria për konsumatorin. Ministria njoftoi se përdorimi i produkteve dhe nënprodukteve të pulës, është i sigurt duke dhënë këshilla se si duhet të gatuhen dhe të mbahen për të qenë të sigurt.

Ministria e Bujqësisë këshillon se mishi i shpendëve të llojit pulë është i konsumueshëm, sugjerohet të mbahet në temperatura mbi 70°C dhe vezët po ashtu të jenë të mirëgatuara, duke theksuar se nuk ka asnjë provë që tregon se infeksioni mund të kalojë nga shpendët te njeriu përmes mishit.

“Nuk ka prova epidemiologjike se ky virus mund të transmetohet tek njerëzit përmes ushqimit (shpendëve e vezëve). Virusi është i ndjeshëm ndaj nxehtësisë dhe dezinfektuesve po ashtu, prandaj praktikat e mira higjienike (dezinfektimi i sipërfaqeve) dhe higjiena personale (larja e duarve) ndihmon në kontrollin e rrezikut”, njoftoi ministria.