Alibeaj tha se PS u tërhoq nga marrëveshja për presidentin, si e paralajmëroi ‘Rithemelimi’ një ditë para procesit

Enkelejd Alibeaj akuzoi Partinë Socialiste se ka prishur konsensusin e arritur mes palëve për Presidentin.

Në një prononcim për mediat nga Kryesia e Kuvendit, Alibeaj tha se Rama u tërhoq nga marrëveshja kur pa kandidatët e opozitës dhe kuptoi se nuk mund të joshte asnjë prej tyre.

Për këtë arsye, ai tha se anuloi edhe mbledhjen e thirrur nga grupit parlamentar.  

“Një nga shkaqet mund të jetë dhe fakti se cilësua e kandidatëve tanë. Mund të jemi anatemuar për lojëra dhe qëndrime jo korrekte. Kandidaturat që u identifikuan në fazën e parë nuk janë as peng por njerëz me integritet. Teksa Rama pa se s’kishte asnjë shans për ta kapur vjedhur apo  joshur ka bërë këtë gjë sot. Sepse ishin figura anti komuniste”, tha Alibeaj.

Pak pas deklaratës së tij vjen reagimi i Taulant Ballës, kreu i Grupit Parlamentar të PS.

Ai deklaroi se nga PS nuk ka tërheqje të marrëveshjes. Sipas tij, Alibeaj e ka keqkuptuar diskutimin, pasi nuk ka pasur dakordësi që PS të mbështesë me firma kandidatët e propozuar nga një pjesë e opozitës.

“Kështu përfundon kur bëhesh “lodër” në duart e Ramës! 

Deputeti i PD, përfaqësues i Komisionit të Rithemelimit, Tritan Shehu reagoi i pari pas deklaratës së Alibeajt.

Në një postim në FB, ai shkruan se gjithçka pritej kur bëhesh ‘lodër’ në duart e Edi Ramës.

"Me sa turp perfundon kur behesh nje “loder” ne duart e Rames! Ai mbasi te perdor te flak, edhe per te te poshtruar, gje qe ne fakt keto”lodra” e meritojne plotesisht ate. Keshtu perfundon!

Alibeja u tregua i gatshem jo vetem ta percaje opoziten e PD, por ta katandiste ate ne reth 10 deputetet, aq sa i duheshin PS per te arritur “numrin e cilesuar”, pra ne realitet ai e nxorri ne “shitje” ate. Nuk e di pse po me kujton kjo Esat Pashen, kur po “shiste” Shqiperine!”, shkruan Shehu ndër të tjera.

Si u paralajmërua Alibeaj nga Komisioni i Rithemelimit?

Anëtari i Komisionit të Rithemelimit Enno Bozdo reagoi pas draftit të propozuar nga Enkelejd Alibeaj për kriteret e zgjedhjes së presidentit të ri, një ditë para nisjes së procesit për zgjedhjen e presidentit.  

Në një postim në Facebook, Bozdo shkruante se asnjë deputet nuk mund të bëjë propozime në emër të PD-së, ndërsa shtonte se këtë tagër e ka vetëm Këshilli Kombëtar.

“Nuk mund të ketë propozime të asnjë deputeti të veçantë në emër të PD. Këtë tagër e ka vetëm Këshilli Kombëtar i Partisë Demokratike. Rezoluta e miratuar prej tij e përcakton qartë këtë fakt!

Dokumenti i shpërndarë në “emër të grupit parlamentar të PD”, nuk është gjë tjetër veçse disa kritere të Ramës, të vendosura në gojën e atyre që jo vetëm nuk përfaqësojnë PD, por që kërkojnë që kështu zgjedhjen e presidentit t’ia lënë më dorë totalisht Ramës!

Rama nga ana e tij do deklarojë që zgjedhje ishte “konsensuale” me opozitën! Një skenar i turpshëm dhe bajat. Është një skenar i tillë sepse synon një opozitë vasale, të kapur, të papërgjegjshme, në kurndërshtim me interesat e shqiptarëve! Kjo kohë ka mbaruar!

PD sot përfaqëson rezistencën politike dhe qytetare ndaj qeverisjes më të korruptuar në Evropë!  Si e tillë ajo do të mbrojë vetëm interesat e  Shqipërisë dhe shqiptarëve, dhe jo të Ramës dhe të shiturve tek ai!”, deklaronte Bozdo.

Nënkryetari i Grupit Parlamentar të Partisë Demokratike, Luçiano Boçi, tha se PD nuk do të pranojë të bëhet pis në një proces ku Rama ka paracaktuar emrin se kush do të bëhet President dhe thjesht kërkon ta përfshijë PD-në në lojë. 

“Nëse ato negociata janë false, gjoja për të përfshirë opozitën, ndërkohë që me synimin për të zgjedhur personin e parashikuar nga Rama, atëherë ajo është një hile politike që kërkon të përfshijë në vorbullën e vetë për hir të opinionit dhe për ta bërë pis opozitën. Ne nuk duam të bëhemi pjesë në një proces të paragjykuar e të vendosur nga Rama”, deklaronte Boçi për gazetën Panorama në 5 prill.

Komisioni i Rithemelimit miratoi edhe një rezolutë më 6 maj, sipas së cilës kreu i ri i shtetit nuk duhet të zgjidhet bashkë me votat e Partisë Socialiste.

Po ashtu, në rezolutë thuhet se opozita do të votojë vetëm nëse arrihet pakt për zgjedhjen e një presidenti konsual të propozuar nga opozita.