Deklarata e fortë e Yuri Kim/ Kush po përpiqet të frikësojë gjyqtarët dhe prokurorët?

Ambasadorja e SHBA-së në Tiranë, Yuri Kim deklaroi sot se ka përpjekje për të frikësuar gjyqtarët dhe prokurorët në mosndëshkimin e më të fuqishmëve. Në një reagim në rrjetin social Tëitter, ambasadorja Kim shkruan se po bëhen përpjekje që Shqipëria të kthehet pas.

“Jemi të vetëdijshëm që ka më shumë përpjekje për të joshur ose frikësuar gjyqtarët dhe prokurorët që të shtrembërojnë drejtësinë dhe për të insistuar në mosndëshkimin e më të fuqishmëve. Me fjalë të tjera, për t’u zvarritur në të kaluarën.

Gjyqtarët dhe prokurorët duhet të kryejnë detyrat e tyre në përputhje me ligjin dhe me integritet”, shkroi Kim ndër të tjera.

Ambasadorja amerikane ka reaguar vazhdimisht me thirrje për të mos intimiduar drejtësinë si një ndër kushtet që Shqipëria të ecë përpara në rrugën e integrimit.

Por, kush po përpiqet të shtrembërojë drejtësinë? Më poshtë, rendisim disa nga çështjet e ‘nxehta’ që kanë nuk kanë kaluar pa zhurmë kohët e fundit në vend.

Lirimi i Alqi Bllakos

Gjyqtarja Irena Gjoka e Gjykatës së Posaçme kundër Korrupsionit dhe Krimit të Organizuar vendosi pak ditë më parë të lirojë nga qelia ish-deputetin socialist, Alqi Bllako, i akuzuar për shpërdorim detyre dhe korrupsion në aferën e inceneratorit të Fierit.

Gjyqtarja pranoi kërkesën e Bllakos dhe e zëvendësoi masën e tij të sigurisë nga arresti me burg në arrest shtëpie.

Gjykata e Posaçme nuk dha detaje lidhur me shkaqet e vlerësuara nga Gjoka, por sipas avokatit të Bllakos, Sokol Hazizaj, kërkesa e lirimit nga qelia u bazua mbi faktin se klienti i tij është baba i tre fëmijëve të mitur, të cilët “kanë nevojë për kujdesin e tij”.

Vendimi u kundërshtua nga Prokuroria e Posaçme SPAK, e cila e konsideroi të pamjaftueshëm shkakun e ngritur për lirimin e Bllakos nga qelia.

Alqi Bllako u vetëdorëzua në polici më 1 prill të këtij viti, pasi Gjykata e Posaçme caktoi më parë masën e “arrestit me burg” pas hetimit për kontratën koncesionare të Fierit me një vlerë të përllogaritur në 28 milionë euro.

SPAK e akuzon Bllakon se ka marrë përfitime të paligjshme nga kompanitë koncensionare të ndërtimit të inceneratorëve, ndërsa ka favorizuar këto kompani gjatë kohës që ushtronte detyrat shtetërore si sekretar i Përgjithshëm i Ministrisë së Mjedisit dhe më pas në funksionin e “Autoritetit Kontraktues”, si drejtor i Agjencisë Kombëtare të Ujësjellës Kanalizimeve dhe Infrastrukturës së Mbetjeve.

Së bashku me Bllakon, SPAK ka ngritur akuza edhe ndaj 9 zyrtarëve të tjerë të lidhur me procedurat e koncesionit për inceneratorin e Fierit, përfshi edhe ish-Ministrin e Mjedisit, Lefter Koka i cili gjendet në burg që prej dhjetorit 2021.

Inceneratorët

Qeveria e kryeministrit Edi Rama ka dhënë tre kontrata koncesionare për ndërtimin e incineratorëve në Elbasan, Fier dhe Tiranë, te një grup kompanish të lidhura me njëra-tjetrën, nën pronësinë e personave pa eksperiencë të mëparshme në këtë fushë. Koncesioni i parë, inceneratori i Elbasanit, u sekuestrua nga prokuroria dhjetorin e kaluar, pak ditë para se kompania t’i transferohej Bashkisë së Elbasanit me përfundimin e kontratës së koncesionit. Më vonë u vendos nën sekuestro preventive edhe kompania e inceneratorit të Fierit, kontrata për të cilën ishte pranë përfundimit.

Lidhur me këto afera korruptive, SPAK ka kërkuar gjithashtu arrestimin e Stela Gugalles, e cila është pronarja e kompanisë “Albtek Energy” si dhe Klodian Zotos, pronar i kompanisë Integrated Technology Services, por këta të fundit nuk janë arrestuar ende nga policia. Mbi të dyshuarit rëndojnë akuzat e korrupsionit të zyrtarëve të lartë dhe të pastrimit të parave.

Konfiskimi i kateve pa leje  

Kryeministri Edi Rama paralajmëroi një fushatë kundër ndërtimeve pa leje sidomos të shumëkatësheve që siç tha do të konfiskohen.

Rama në reagimet e tij publike ia hodhi fajin sërish sistemit të drejtësisë.

“Ndërtimet pa leje kanë qenë kanceri i këtij vendi, ka ndërtime pa lejen patjetër nuk diskutohet, por po të vijmë tek këto metrat katrorë pa leje abuzim mbi një leje ndërtimi e kemi ulur 10 fish. 

Sot jemi në kushtet kur duhet t’i japim një goditje përfundimtare këtij fenomeni të shëmtuar e fyes. E pamundur që ne të vendosim kontroll të plotë e të rreptë kur vjen puna te ata që ndërtojnë, një avlli, një cati dhe një shtëpi në fshat e të vijë të ketë shans për biznesmenët të hapen ndenjësesh e të bëjnë metra katrorë në kryeqytet.

Kjo që po bëjmë ka ardhur si rezultat se nxirr ligje e masa sa të duash, bëj kontrolle e denoncime sa të duash sa kohë ky sistem drejtësie në nivelin e prokurorive e gjykatave të rretheve nuk është i pastruar je i destinuar të turpërohesh”, deklaroi Rama ndër të tjera teksa i përgjigjej një komentuesi në Facebook.

SPAK në vendnumëro në hetimin e korrupsionit të zyrtarëve të nivelit të lartë

Të dhënat e siguruara nga BIRN nëpërmjet ligjit për të drejtë informimi tregojnë se dosjet e nxehta të SPAK mbeten të bllokuara në fazën e hetimeve paraprake, pa autorë të ndjekur penalisht.

Mungesa e efikasitetit të Strukturës së Posaçme Kundër Krimit të Organizuar dhe Korrupsionit ngre dyshime jo vetëm për mbarëvajten e hetimeve por edhe pikëpyetje mbi vullnetin e prokurorisë për të luftuar korrupsionin në nivelet më të lartë të qeverisjes.

Sipas indeksit vjetor të perceptimit të korrupsionit të publikuara nga organizata ‘Transparency International’, Shqipëria mbetet një nga vendet më të korruptura në Europë, duke u rankuar e 110 nga 180 vende në vitin 2021.