Kush është Artan Simoni, avokati që bën filozofi me Scooby-Doo; kërkoi vetëm 2 orë për një dosje 200 faqëshe

Gjykata e Posaçme e Shkallës së Parë për Korrupsionin dhe Krimin e Organizuar njoftoi se thirri avokatin Artan Simoni për të përfaqësuar kreun e PD, Sali Berisha në sallë pasi avokatët e tij u larguan nga seanca e sotme gjyqësore në shenjë proteste.

Po kush është Artan Simoni?

Fillimisht, emri i Simonit bëri xhiron e rrjetit prej një postimi që kishte publikuar vetëm dy ditë më parë.

Ai shfaqet hapur kundër Berishës, të cilin e cilëson si “Bisha e plakur”.

 “Bisha është plakur, bisha është lodhur, bisha s’mundet më. Shumë prej atyre që dikur bisha mbante mbi kurriz, pas kurrizit kanë filluar t’a çukasin. Ku gaboi bisha?!”, shkroi në rrjetet sociale Artan Simoni.

Vetëm pak orë më vonë, avokati pendohet për ‘guximin’ dhe fshin postimin nga profili i tij Facebook.

Që në nisje të këtij procesi, vetë Berisha dhe opozita kanë deklaruar publikisht se ky nuk është asgjë tjetër veçse një gjyq politik i urdhëruar nga kryeministri Edi Rama.

Dyshimet i forcon edhe fakti se vetë avokati kishte kërkuar vetëm dy orë që të njihet me një dosje voluminoze prej 200 faqesh, pasi Gjykata e Posaçme njoftoi se seanca ndaj Berishës do të vijonte me një avokat të caktuar nga shteti.

Kujtojmë se Simoni është caktuar nga gjykata me të njëjtin rol edhe që të përfaqsëojë ish-ministrin Fatmir Mediu në seancën e 7 qershorit, për shkak se seancat po shtyheshin për mungesë të avokatëve mbrojtës.

Po ashtu, nëse i hedhim një sy profilit të tij në rrjetet sociale,bie në sy edhe një meme me të cilën avokati preferon të tregojë se si filozofia bëhet sipas kohës që jeton.

Duket se për avokatin filozofinë e kohës e përfaqëson  Scooby-Doo, protagonist i serialit të animuar, që përfaqëson tiparet e qenit frikacak dhe të uritur përherë.