“Pakti u prish”/ Yuri Kim mesazh për PD-në para intervistës së Berishës? Ambasada e SHBA sqaron për Politiko

Ish-kryeministri Sali Berisha ka deklaruar se të premten e 10 shtatorit do të jetë në Kuvend. Berisha tha se do të jetë në Kuvend, në përputhje me vullnetin e qytetarëve që e kanë votuar, ndonëse ambasadorja amerikane Yuri Kim ka kërkuar hapur që PD ta përjashtojë.

Ndërkohë që është shpallur “non grata” nga SHBA, ish-kryeministri e cilësoi edhe njëherë si betejë për dinjitet.

I ftuar në Euronews Albania mbrëmë përballë ish zëdhënëses së tij Erla Mëhilli, Berisha rreshtoi disa deklarata të forta.

I pyetur se si do të vepronte nëse PD do të vendoste për ta përjashtuar nga grupi parlamentar, Berisha deklaroi se do të bënte gjithçka për të rikthyer Partinë Demokratike në vlerat e saj themeltare, nëse kjo parti do të fillonte të kishte qëndrime joparimore.

Po ashtu, ish-kryeministri mohoi pretendimet se ka drejtuar në një farë mënyre Partinë Demokratike gjatë këtyre viteve, por pranoi se ka një influencë fuqishme.

Berisha deklaroi se nëse do ishte në krye të PD, nuk do të ishte futur kurrë në zgjedhjet e 25 prillit, ndërkohë që kundërshtarët kishin ngritur një sistem patronazhistësh. Megjithatë, ish-kryeministri theksoi se Basha mori pjesë pasi PD kishte dalë nga sistemi dhe duhej të futej.

Pas kësaj interviste, Lapsi.al shkruan sot se përpara se intervista me Erla Mëhillin të transmetohej “live” dhe Berisha të bënte këto deklarata, kryediplomatja amerikane ka reaguar. ‘Një burim i sigurt brenda PD ka konfirmuar për Lapsi.al se drejtuesve të kësaj partie i është dërguar ky mesazh: “Pakti u prish, tani është radha jonë të flasim”’, shkruan Lapsi.al.

Por si qëndron e vërteta e këtij mesazhi?

Politiko.al kontaktoi zyrën e Marrëdhënieve me Publikun në Ambasadën Amerikane. Në përgjigje të interesimit të redaksisë së Politiko.al, ambasada sqaron se qëndrimi i SHBA për ish kryeministrin nuk ndryshon.

“Qëndrimi i ambasadës së SHBA mbetet i pandryshuar”, shkruan zyra e shtypit.

Kujtojmë se në korrik, ambasadorja amerikane në Shqipëri, Yuri Kim ka kërkuar nga kryetari i Partisë Demokratike, Lulzim Basha që kjo parti të distancohet nga Sali Berisha, ish-presidentin e shpallur non-grata nga SHBA-ja, duke i paralajmëruar se në të kundërtën do të rrezikojnë marrëdhëniet e Shqipërisë me Shtetet e Bashkuara të Amerikës.

Lidhur me qëndrimin e Partisë Demokratike pas shpalljes së tij ‘non grata’ nga DASH, Berisha tha mbrëmë se ka qenë mjaft i drejtë.

I pyetur për heshtjen e Bashës, Berisha tha se kryedemokrati ka kërkuar prova nga DASH, por shtoi se nëse Partia Demokratike do të gjendej para provave, do bënte gabim historik nëse nuk do të merrte vendimin për përjashtimin e tij.

“Unë mendoj se PD-ja nën vlerësimin tim ka mbajtur qëndrimin që duhet të mbajë. Qoftë në deklaratën e parë, qoftë edhe në vazhdim ka kërkuar prova, transparencë. Që PD-ja të marrë qëndrim ndaj një personi, duhet të ketë prova, dokumente, ndryshe nuk mund ta mbajë. Nëse Partia Demokratike do të gjendej para provave, do bënte gabim historik nëse nuk do të merrte vendimin për përjashtimin e atij personi,”-tha Berisha.