Paradoksi: Malltezi në burg për pronën e tij, burri i Xhaçkës as nuk hetohet për resortin me pronë të falsifikuar

Momenti që shprehja e urtë popullore “ca të nënës dhe ca të babës”, merr jetë, fal Prokurorisë së Posaçme dhe organeve të drejtësisë në vendin tonë.

Është çështje paradoksale!

Fundjavën e kaluar, prokuroria prangosën Jamarbër Malltezin, për një çështje që kishte të bënte me fitimin e pronës së tij si trashëgimtar dhe zhvillimin e saj.

SEANCA PËR MALLTEZIN

GJKKO la të pandryshuara masat e sigurisë duke lënë në burg Jamabër Malltezin dhe detyrim paraqitje për Fatmir Bektashin, në lidhje me privatizimin e ish- kompleksit “Partizani” në kryeqytet.

 Avokati mbrojtës i Malltezit, Klodian Skënderi deklaroi se qëndrimi i palës së akuzuar ka qenë mohues. Skënderi u shpreh se në rastin konkret nuk ka një vepër penale dhe se personat në hetim janë në një marrëdhënie të pastër.

“Të akuzosh dikë se është një trashëgimtar i ligjshëm i një familjeje tiranase si ajo Begeja, se ka lidhur marrëdhënie kontraktore me një familje tjetër tiranase është shumë e guximshme. Ky standard i Prokurorisë është shumë i ulët dhe me këto aludime po cenohen parimet juridike”, deklaroi avokati Skënderi.

SPAK sekuestron 5512 m2 truall të bashkëshortit të ish-ministres

Nga ana tjetër, SPAK është as nuk ka denjuar të marrë nën hetim “investitorin strategjik”, Artan Gaçi dhe bashkëshorten e tij, ish-ministren Olta Xhaçka, të cilët po ndërtojnë resort turistik mbi një pronë me dokumente false në bregun e Himarës.

Shkeljet i ka gjetur vetë Prokuroria e Posaçme, e cila ka vënë nën sekuestro një sipërfaqe prej 5512 m2. E, megjithatë resorti i Artan Gaçit dhe Olta Xhaçkës po vijon të ndërtohet.

Denoncimi i Fredi Belerit

Ishte Fredi Beleri i cili denoncoi nga burgu Olta Xhaçkën dhe Jorgo Garon, kreun aktual të Bashkisë së Himarës.

Beleri ka deklaruar se Artan Gaçi, bashkëshortja e tij, Olta Xhaçka, kryebashkiaku në detyrë i Himarës, Jorgo Goro dhe një qytetar, Foto Mëhilli, kanë falsifikuar dokumentet e pronës në vitin 2019, pak para se burri i ministres së Ramës ta blinte dhe ta përdorte për fitimin e statusit të “investitorit strategjik”.

Nga hetimi i deritanishëm, SPAK ja bërë lëvizjen “e madhe” duke sekuestruar vetëm pronën, pa e munduar Gaçin të paraqitet nëpër ‘zyrat hetimore’.

Si i dha Rama Xhaçkës për 30 vjet tokën e Himarës?

Deputetët e PD, përmes 1/5 e anëtarëve të Kuvendit, një vit më parë zbardhën skemën e një sërë shkeljesh, ku ndër të tjera akuzonin qeverinë Rama se i ka dhënë bashkëshortit të ish ministres së Jashtme, lejen për përdorimin e një zone bregdetare në Himarë për një periudhë 30-vjeçare.

“Në datë 29.03.2021, me vendimin nr. 3/5 të Komitetit të Investimeve Strategjike, subjekti tregtar i mësipërm, i cili është në pronësi të bashkëshortit të deputetes Olta Xhaçka, do të përfitonte, sipas përcaktimeve të ligjit nr. 55/2015 “Për investimet strategjike në Republikën e Shqipërisë”, i ndryshuar, Statusin e “Investim/Investitor strategjik procedurë e asistuar”, për projektin e investimit “Dreamades Luxury Suites”.

Sipas këtij vendimi, subjekti tregtar i sipërcituar dhe projekti i këtij subjekti, pra në pronësi të vetme të bashkëshortit të deputetes Olta Xhaçka, e cila sigurisht për shkak të cilësisë së saj si bashkëshorte dhe prezumimit të regjimit martesor ligjor, kishte disa përfitime direkte dhe të drejpërdrejta në të mirat publike, fondet publike apo asistencën nga buxheti publik, ku mjafton këtu të përmendim faktin se ky subjekt përfitonte përdorimin e bregdetit për minimalisht 30 – vjet, masa mbështetëse në kryerjen e procedurave ligjore, masat mbështetëse në lidhje me miratimin e lejëve përkatëse, masa mbështetëse për konsolidimin e tokës dhe pronës ku do të zhvillohet projekti, akseset në infrastukturën publike etj.

Pra, sipas vendimit të mësipërm, deputetja Olta Xhaçka, për shkak të parashikimeve të nenit 66 e vijues të Kodit të Familjes, në cilësinë e bashkëshortes së shtetasit Artan Gaçi, si dhe përcaktimeve të nenit 35, të ligjit nr. 9367, datë 07.04.2005 “Për parandalimin e konfliktit të interesave në ushtrimin e funksioneve publike”, i ndryshuar,  do të përfitonte drejtëpërsëdrejti të mira publike, që vendimi i sipërcituar i Komitetit të Investimeve Strategjike i jepte shoqërisë në pronësi të bashkëshortit të saj”, thuhet në arsyetimin e kërkesës së demokratëve drejtuar Gjykatës Kushtetuese për heqjen e mandatit të Xhaçkës.

Hapen “dyert”  e burgut për Jorgo Goron?

Kryebashkiakët e Ramës vijojnë të mbeten pranë dyerve të SPAK, nën hetim për korrupsion apo abuzime me tendera. Gazetarja Anduena Llabani deklaroi se një tjetër ish-kryebashkiak pritet të arrestohet është Jorgo Goro.

Sipas gazetares, të dhënat që SPAK ka mbledhur pas padisë së Belerit, kanë çuar në një skemë ku bashkëshorti i Xhaçkës ka përfituar tokë në kundërshtim me ligjin dhe i përfshirë në këtë çështje është edhe Goro.

“Këtu është i përfshirë edhe ish-kryetari i bashkisë së Himarës, Jorgo Goro si dhe Foto Mëhilli. Ata janë marrë në pyetje dhe kanë dhënë dëshmitë e tyre. Nuk është çudi që shumë shpejt SPAK të arrijë në urdhra-arresti për këtë rast, mund të kemi ish kryetarin e Bashkisë, Jorgo Goron, në javët që vijnë do kemi zhvillime”, tha gazetarja.

Jorgo Goro paraqitet në SPAK!

Jorgo Goro është paraqitur në ambientet e SPAK disa ditë më parë. Ndaj Goros ka dy gjetje, kryesorja është ajo e raportit zyrtar të Kontrollit të Lartë të Shtetit i cili ka evidentuar disa dyshime në lidhje me shkeljen e barazisë në tendera por edhe me investime të caktuara në qytetin e Himarës, gjatë kohës ku Goro mbante postin dhe mandatin e tretë të kryebashkikakut të Himarës.

Gjithashtu këtyre gjetjeve, i është bashkangjitur edhe një kallëzim nga Beleri, i cili nga paraburgimi këmbëngul se ka edhe shkelje të tjera në lidhje me detyrën dhe kompetencat e Goros si kryebashkiak i Himarës.

Goro hyri në SPAK pa praninë e një avokati, ndërsa deklaroi se ishte si një qytetar për të dhënë sqarime.