‘Paralizohet’ mësimi nga i ftohti, a po pranon ministria e Arsimit dështimin me ngrohjen në shkolla?

Ministria e Arsimit njoftoi këtë të enjte se do të mbyllen shkollat në të gjithë vendin për 3 ditë për shkak të temperaturave të ulëta që pritet të mbizotërojnë në vendin tonë. Bëhet fjalë nga data 24-26 janar, nga e hëna në të mërkurë, duke sqaruar se orët e humbura do të zëvendësohen.

" Për këtë arsye, duke qenë se prioriteti ynë absolut në çdo kohë është shëndeti dhe mirëqenia e fëmijëve tanë, kemi vendosur që shkollat të mbyllen javën e ardhshme, nga dita e hënë deri të mërkurën, dhe orët e humbura do të zëvendësohen në vijim pas një njoftimi të dytë në bashkëpunim me zyrat vendore arsimore", thuhet në njoftim.          

Me këtë vendim, ministria ka nxjerrë më shumë në pah problematikën e njohur në shkollat e vendit, sidomos në zonat periferike.

Mungesa e sistemit ngrohës, është një shkak që e bën të pamundur zhvillimin normal të procesit edukativ në shkollat, apo në kopshte dhe çerdhe e vendit.  

Kjo temë është e përvitshme në mediat tona, ku nxënësit ankohen se kanë ftohtë në orën e mësimit, ndërsa shfaqen në kamera të mbërthyer me xhupa e veshje të trasha për të përballuar temperaturat e ulëta.

Sistemi i ngrohjes në shumë shkolla nuk funksionon, jo vetëm nga mungesa e karburanti, por edhe ngaqë ai është amortizuar totalisht, dhe pse çdo vit miratohet një fond i veçantë për sistemin e ngrohjes në shkolla.

Në këtë fond, janë përcaktuar qartë dhe saktë shpenzime materiale për pajisjet, ndërtimin ose rikonstruksionin e tyre, shpenzime transporti dhe karburanti që do të konsumohet. Megjithatë, gjatë orëve të mësimit, nxënësit as nuk mund të qëndrojnë në klasë, as nuk munden të shkruajnë, sepse u ngrinë duart nga të ftohtit. 

Report tv kreu një vëzhgim pak ditë më parë në shkollat e Tiranës. Rezultoi se nxenësit në shkollën “Drita Pelinku’ detyrohen të qëndrojnë në klasë me xhupa ose të blejnë vetë rezistencë pasi kaldaja herë ndizet e herë jo.

Nxënësit që e kanë sjellë vetë ngrohësen nga shtëpia janë më të privilegjuarit, të tjerët që janë ulur në bankat e fundit e ku ngrohja nuk arrin kanë sërish ftohtë.

I njëjti vëzhgim u krye edhe në qytetin e Lezhës, Gjirokastrës dhe Elbasanit në lidhje me këtë problematikë.

Në gjimnazin "Hydajet Lezha" dhe në shkollën 9-vjeçare "Gjergj Kastrioti" në Lezhë, sistemet e ngrohjes janë jashtë funksioni. Në këto kushte nxënës e mësues kanë gjetur zgjidhje alternative për të siguruar sadopak ngrohjen, duke kontribuar vetë në blerjen e rezistencave apo kaloriferëve me korrent.

Në shkollat e qytetit të Gjirokastrës jashtë kamerave nxënësit thonë se ngrohja mungon, por ka dhe nga ata që shprehen se kanë ngrohje në klasa. Kjo ndodh në shkolla, ku nxënësit kanë blerë vetë rezistencat elektrike, ndonëse këto të fundit nuk arrijnë të kryejnë funksionin e tyre, pasi janë të pafuqishme të nxehin gjithë klasën.

Drejtoresha e shkollës 9-vjeçare "Halit Uruçi" në Belsh, Liljana Kullolli në një intervistë për Report Tv tha se kemi kaldajë, por nuk e ndezim sepse harxhon shumë naftë. Ajo pranon, se nxënësit në klasa ngrohen me rezistenca, që në disa raste i kanë blerë prindërit.