Rasti i Hajdarit si i Qerim Ismailajt. KQZ i ‘fali’ mandatin, por ish-kryebashkiaku i Mallakastrës u dënua me 6 muaj burg

Komisioneri Shtetëror i Zgjedhjeve, Ilirian Celibashi vendosi dje se kryebashkiaku i Kuçovës, Kreshnik Hajdari nuk ishte në kushtet për të humbur mandatin edhe pse prokuroria zbuloi se ai kishte një dënim në Greqi në vitin 1999 të padeklaruar në formularin e dekriminalizimit.

“Nuk ka shkak ligjor që kryebashkiakut të Kuçovës t'i ndërpritet mandati,” tha Celibashi pas seancës së shqyrtimit, ku palët ngritën pretendimet e tyre. Sipas tij, -“mungojnë shkaqet që e ndalojnë moskandidimin e tij në zgjedhje”, referuar ligjit “Për garantimin e integritetit të personave që zgjidhen, emërohen ose ushtrojnë funksione publike”, ose siç njihet si “Dekriminalizimi”.

Drejtoria përkatëse pranë Prokurorisë së Përgjithshme, që merret me hetimin e thelluar për kandidatët në zgjedhje lokale dhe qendrore, njoftoi KQZ-në se Hajdari rezultonte të jetë i dënuar me vendim të formës së prerë nga Gjykata e Shkallës së Parë Janinë.

Dënimi me gjobë dhe më pas dëbimi nga shteti grek ka ndodhur në vitin 1999 për hyrje të paligjshme në territorin grek bashkë me familjen.

Hajdari ruan mandatin, por merret i pandehur nga SPAK

Vetëm një ditë pas vendimit të KQZ, kryebashkiaku i Kuçovës, Hajdari është marrë i pandehur nga SPAK pasi fshehu dënimin në Greqi për kalim të paligjshëm kufiri.

Zyrtari i PS-së u mor sot në pyetje në Prokurorinë e Posaçme dhe pas daljes ai refuzoi që të fliste për mediat, ndërsa avokati i tij u shpreh se klienti i tij nuk është marrë i pandehur, por u pyet për një kallëzim e ngritur ndaj kryebashkiakut për fshehjen e dënimit në Greqi.

Rast i ngjashëm me Qerim Ismailajn, humbi mandatin dhe u dënua me 6 muaj

Prokuroria e Posaçme kundër Korrupsionit dhe Krimit të Organizuar Tiranë, mori të pandehur edhe kryetarin e bashkisë së Mallakastrës, Qerim Ismailajn në nëntor 2021.

Ai u akuzua nga PD se ka gënjyer në formularin e dekriminalizimit per denimin ne shtetin fqinj. Vetë Ismailaj ka deklaruar se nuk kishte dijeni lidhur me këtë dënim, pasi në të kundërt do e kishte deklaruar sepse nuk do e kishte penguar të kandidonte për kryebashkiak.

Në përfundim të hetimeve, Ismailaj u akuzua për veprën penale të falsifikimit të vulave dhe formularëve.

Megjithatë, për KQZ-në dhe Ilirjan Celibashin, kjo nuk përbënte një vepër penale të rëndë, ku në legjislacionin shqiptar dënohet maksimumi me gjobë, ndaj kryebashkiaku nuk ndodhet në kushtet e ndalimit.

Sërish, pas një procesi të gjatë Ismailaj u dënua nga GJKKO me 6 muaj burg që iu konvertua me 40 orë pune për interes publik.