5.7 mln euro për Inceneratorin e Tiranës/ Mblidhet sot Këshilli Bashkiak, denoncimi i Berishës 'konfirmohet' nga Veliaj

Do të zhvillohet sot në orën 16:00, mbledhja e Këshillit Bashkiak të Tiranës.

Në rendin e ditës është përfshirë dhe “Projektvendimin “Për disa ndryshime në vendimin nr. 126, datë 23.12.2022, të Këshillit Bashkiak “Për miratimin e Programit Buxhetor Afatmesëm 2023-2025 dhe detajimin e Buxhetit të Bashkisë së Tiranës për vitin 2023, të ndryshuar”.

Një ndër ndryshimet kryesore që lidhet me buxhetin është një fond shtesë për pagesat për inceneratorin e Tiranës për depozitimin e mbeturinave, shkruan Monitor. 

Në relacion sqarohet se Bashkia Tiranë ka ezauruar të gjithë planin buxhetor të vitit 2023 për këtë shërbim. Bashkia ka kërkuar fonde tek Ministria e Financave, por kjo e fundit i ka thënë se “Në momentin e vështirësive financiare (të faktuar/verifikuar ligjërisht) nga ana e Bashkisë Tiranë, Autoriteti Kontraktor (MIE) është përgjegjës për garantimin e fondeve për kryerjen e pagesave nëpërmjet alokimit të buxhetit për Bashkinë Tiranë”.

Bashkia thotë se shoqëria ka paralajmëruar për ndërprerjen e shërbimit të depozitimit të mbetjeve, në rast të mos shlyerjes së detyrimeve. Si rrjedhojë lind e nevojshme që Bashkia e Tiranës të mbulojë nga të ardhurat e veta detyrimet për këtë kontratë duke parashikuar fondin e nevojshëm, deri në fund të vitit 2023.

Sipas tabelave që shoqërojnë vendimin dhe detajojnë rishpërndarjen e fondeve buxhetore, shuma shtesë për zërin “Shpenzime për Ndërtimi i Landfillit, inceneratorit dhe rehabilitimit të venddepozitimeve ekzistuese Tiranë dhe prodhimin e energjisë elektrike” është 600 milionë lekë, ose rreth 5.6 milionë euro.

Kujtojmë që kryedemokrati Sali Berisha në konferencën e përbashkët me gazetarët këtë të premte ka denoncuar se në këshillin bashkiak të Tiranës pritet të kalojë një vendim për 600 milionë lekë për Zotin dhe Mertirin.

Berisha i bëri thirrje qytetarëve që të mos lejojnë që mbledhjet e këshillave bashkiakë në të gjitha qytetet të bëhen me dyer të mbyllura.

Njoftimi

Sot (15 shtator), ora 16:00

Mbledhje e Keshillit Bashkiak te Tiranes:

Rendi i dites i njoftuar:

1. Projektvendim “Për miratimin dorëheqjes së mandatit të këshilltares së Këshillit Bashkiak, zj. Katerina Marku”.

2. Projektvendim  “Për miratimin e familjeve aplikuese që përfitojnë nga programi i bllok- ndihmës ekonomike deri në 6 përqind, nga fondi i kushtëzuar dhe nga buxheti i Bashkisë Tiranë, për periudhën 1- 30  qershor 2023”.

3. Projektvendim  “Për miratimin e familjeve aplikuese që përfitojnë nga programi i bllok- ndihmës ekonomike deri në 6 përqind, nga fondi i kushtëzuar dhe nga buxheti i Bashkisë Tiranë, për periudhën 1- 31 korrik 2023”.

4. Projektvendim “Për emërtimin e një sheshi në territorin e Bashkisë Tiranë”.

5. Projektvendim “Për vendosjen e skulpturës “Rrënjët e Kujtimit” në sheshin “Bukuresht” njësia administrative nr.10”.

6. Projektvendim “Për emërtimin e disa rrugëve në territorin e Bashkisë së Tiranës”.

7. Projektvendim “Për miratimin e bonusit të qirasë të individëve/familjeve, pasuritë e të cilëve preken nga zbatimi i projektit të segmentit rrugor “unaza e madhe e Tiranës, Sheshi Shqiponja-Bulevardi i ri, Shkozë”.

8. Projektvendim “Për miratimin e pagesës së qirasë sipas vlerës së tregut të lire, të individëve/familjeve, pasuritë e të cilëve preken nga shpronësimi për interes public, në funksion të procesit të rindërtimit, me qëllim realizimin e projekteve “Për zonat e reja në zhvillim, në Njësitë Administrative nr.4 dhe 8, zona “5 Maji”.

9. Projektvendim “Për disa ndryshime në vendimin nr.2, datë 30.03.2009, të Këshillit Bashkiak, “Mbi miratimin e Rregullores, për organizimin dhe funksionimin e shërbimit taksi në qytetin e Tiranës, i ndryshuar”.

10. “Për disa ndryshime në vendimin nr.101, datë 19.10.2022, të Këshillit Bashkiak “ Për kompensimin e biletës së pajtimit mujor të përgjithshëm (abonesë së studentit), për studentët e pajisur me kartë student për të gjitha linjat, në transportin qytetës në Bashkinë e Tiranës”.

11. Projektvendim “Për disa ndryshime në vendimin nr.142, datë 23.12.2022, të Këshillit Bashkiak “Për miratimin e marrëveshjes së bashkëpunimit ndërmjet Bashkisë Tiranë dhe Qendrës Shqiptare të Trashëgimisë për themelimin e përbashkët të organizatës jofitimprurëse qendrës “Trashëgimia për të gjithë – Garda” dhe aktiviteteve të themelimit të kësaj organizate jofitimprurëse”.

12. Projektvendim “Për miratimin e projektit “Spërmarrja ime për shkollën”, hartuar sipas udhëzuesit operacional për zbatimin e tij”.

13. Projektvendimin “Për disa ndryshime në vendimin nr. 126, datë 23.12.2022, të Këshillit Bashkiak “Për miratimin e Programit Buxhetor Afatmesëm 2023-2025 dhe detajimin e Buxhetit të Bashkisë së Tiranës për vitin 2023, të ndryshuar”.