"Çfarë armësh more zotëri?!" Flet xhaxhai i 25-vjeçarit të vrarë nga policia: Kishte dy hurma në dorë, doli për kafe

Familjarët flasin për herë të parë pas ngjarjes së rëndë, ku një efektivë policie qëlloi për vdekje me armë zjarri 25-vjeçarin Klodjan Rasha.

Një pistë hetimi nga ana e grupit hetimor është mungesa e ndriçimit në zonën e krimit. Megjithatë, banorët e zonës shprehen se ndriçimi është i dobët në brendësi të lagjes, por në hyrje (vend në të cilin ndodhi vrasja) shtyllat e ndriçimit bëjnë dritë mjaftueshëm për të kuptuar nëse i riu kishte armë në dorë apo jo.

Në një komunikim për mediat, xhaxhai i viktimës, ka thënë se i riu ka patur dy hurma në dorë dhe kishte dalë për të pirë një kafe. Ai i bëri apel policisë, edhe në emër të të vëllait, për zbardhjen e plotë të ngjarjes.

“Ka patur dy hurma në dorë. I ka lënë në ballkon dhe ka dalë me pi një kafe. Tani na kanë thënë përfundimisht që është i vdekur. Përpara ka qenë i sëmurë, gjatë ditës ka qenë duke punuar.

A ka patur armë me vete djali?

Cfarë armësh more zotëri?! As vëllai im nuk ka armë në shtëpi.

E keni parë trupin?

Absolutisht jo. Na kanë thënë që ndodhet në morg.

Ju si familjarë çfarë kërkoni?

Unë, edhe në emër të vëllait, kërkoi që ngjarja të zbardhet deri në fund. Vëllai më ka garantuar që djali nuk ka patur asnjë armë me vete. Se si ka ndodhur, se çfarë është bërë nuk dimë. Besimin tek ju dhe nga shteti.

I bëjmë policisë apel që të zbardhin ngjarjen deri në fund, sidoqoftë kjo punë”, ka thënë xhaxhai i viktimës.