Gjykata Kushtetuese bëhet funksionale pas tri vitesh, kush janë gjashtë anëtarët e drejtësisë së re

Tashmë pas gati tri vitesh, Shqipëria ka funksionale sërish Gjykatën Kushtetuese.

Pasditen e 23 dhjetorit, presidenti Ilir Meta dekreton emërimin e anëtarit të gjashtë, duke bërë që gjykata me këtë kuorum të zhvillojë seanca gjykimi.

Në total, gjykata duhet të ketë 9 anëtarë, por u shpërbë pasi vettingu nxori jashtë sistemit shumicën e trupës së gjyqtarëve të saj, kryesisht për mos justifikim të pasurisë.

Por, kush janë anëtarët e ‘drejtësisë së re’.

Ata janë Vitore Tusha, Elsa Toska, Marsida Xhaferllari, Fiona Papajorgji, Altin Binaj dhe Përparim Kalo.

Kujtojmë se Tusha, e cila u konfirmua në procesin e vettingut, do të qëndrojë në detyrë deri në zgjidhjen e zëvendësuesit nga Gjykata e Lartë.

Çështjet që ata do të shqyrtojnë janë të shumta, pasi në këto dy vite shumë dosje janë dorëzuar në sekretarinë e kësaj gjykate.

Vitore Tusha: Diplomuar në vitin 1983 në Fakultetin e shkencave Politike-Juridike, dega Drejtësi. Nga viti 1983 deri në vitin 1990, ka ushtruar detyrën e Përmbarueses Gjyqësore në Gjykatën e Rrethit Tiranë dhe më pas deri në vitin 1992 ushtroi profesionin e avokatit. Në periudhën 1992-1994 ka ushtruar detyrën e gjyqtares në Gjykatën e rrethit Tiranë dhe në vitet 1994-2001 atë të gjyqtares në Gjykatën e Kasacionit. Në vitet 1999-2001 ka qenë kryetare e Kolegjit Civil të kësaj gjykate. Në vitin 1997 merr gradën shkencore “Doktor i Shkencave Juridike”. Në mars 2008 është emëruar anëtare e Gjykatës Kushtetuese.

Elsa Toska: ka mbaruar fakultetin e Drejtësisë në vitet 1996-2000 si dhe doktoraturën për ligjin kushtetues dhe atë administrativ. Toska e ka filluar karrierën si ndihmës/komisionere e Avokatit të Popullit dhe prej vitit 2007 punonte si këshilltare ligjore në Gjykatën Kushtetuese.

Ajo ka punuar gjithashtu si pedagoge në disa universitete në vend si dhe ka bashkëpunuar në rolin e ekspertet me një sërë organizatash ndërkombëtare.

Marsida Xhaferllari: Ka filluar karrierën si gjyqtare në Gjykatën e Rrethit Gjyqësor Fier, ku ka shërbyer nga viti 1999 deri në vitin 2007. Në periudhën dhjetor 2007 deri në shtator 2008, ajo ka punuar si këshilltare e Ministrit të Drejtësisë dhe nga shtatori 2008 e deri në janar 2013, si drejtore në Drejtorinë e Kodifikimit si dhe Drejtorinë e Përgjithshme të Çështjeve të Drejtësisë në Ministrinë e Drejtësisë. Në vitin 2013, Xhaferllari u emëruar Kryeinspektore në Këshillin e Lartë të Drejtësisë, një post që ajo e ka mbajtur deri zëvendësimin e KLD-së me Këshillin e Lartë Gjyqësor.

Fiona Papajorgji: Iu nënshtrua vettingut duke e kaluar pa probleme, ndërsa ka një eksperiencë të gjatë si këshilltare ligjore në Gjykatën Kushtetuese. Papajorgji ka qenë pedagoge në disa universitete dhe avokate. Ajo ka një eksperiencë të gjatë në fushën e drejtësisë.

Altin Binaj: Binaj e ka filluar karrierën në institucionin e Prokurorisë në Shqipëri në mesin e viteve ’90 dhe ka qenë prokuror në Vlorë dhe drejtues i prokurorisë atje për disa vite. Në vitin 2013, prokurori Altin Binaj u emërua në Prokurorinë e Përgjithshme, ku kryesoi drejtorinë e hetimit të korrupsionit. Prej vitit 2016, Binaj drejton Prokurorinë e Apelit të Vlorës. Binaj ishte e vetmja kandidaturë që u paraqit nga KED para deputetëve.

I fundit, Përparim Kalo gjyqtar.

Ambasadorja amerikane, Yuri Kim ka këmbëngulur që të arrihet që deri në 31 dhjetor të këtij viti Gjykata të bëhet funksionale e si duket u arrit një javë para afatit të kryediplomates amerikane.  

Ripërtëritja e Gjykatës Kushtetuese është një nga 15 kushtet e Bashkimit Evropian për nisjen e procesit të negociatave të anëtarësimit.