Ministri i Jashtëm grek, Nikos Dendias vizitë zyrtare në Tiranë; takime me Ramën e Metën për marrëveshjen e detit, PDIU e pret me protesta

Ministri i jashtëm grek, Nikos Dendias, do të kryej sot një vizitë zyrtare në Tiranë.

Sipas axhendës, mësohet se Dendias do të zbres në aeroportin e Rinasit rreth orës 11:00, ku do të pritet nga Ministri i Jashtëm në detyrë, Gent Cakaj dhe më pas do të vijoi takimet me krerët me të lartë të shtetit, duke filluar që nga kryeministri Rama, e për të vijuar me Presidentin Meta.

Pas takimit me Ramën, palët do të mbajnë një konferencë për shtyp.

Mediet greke raportojnë se arsyeja e vizitës së Dendias në Shqipëri është diskutimi për marrëveshjen e detit dhe zonat ekonomike ekskluzive.

“Gjatë vizitës “vendimtare”, Dendias do të takohet me homologun e tij shqiptar, ku do të diskutohet për zonën ekonomike ekskluzive midis Greqisë dhe Shqipërisë.

Mësohet se, në qendër të diskutimeve mes palëve pritet të jetë çështja e kufijve detarë, e mbetur pezull që nga viti 2009 kur të dy vendet nënshkruan marrëveshjen, e cila më vonë u anulua nga gjykata kushtetuese shqiptare.

Me përfundimin e marrëveshjes së ZEE me Shqipërinë, "fronti perëndimor" i zonës ekonomike ekskluzive greke mbyllet. Hapet rruga për zgjerimin e ujërave territoriale greke në 12 milje në Jon në mënyrën që Athina dëshiron”, shkruajnë mediat greke.

Ndërkaq, pritja e Ministrit të Jashtëm grek është shoqëruar me protesta nga Shoqata Çamëria dhe përfaqësuesit e PDIU.

Kujtojmë se, debati për çështjen e detit erdhi pasi Greqia paralajmëroi se do kalojë një projektligj për zgjerim të kufirit detar me 12 milje në detin Jon. Sipas Greqisë, ky zgjerim është në të drejtën e saj, por qeveria shqiptare nga ana tjetër ka sqaruar se Greqia mund të zgjerohet aty ku ja lejon gjeografia, dhe jo duke cënuar territorin shqiptar.