Miq apo rivalë? Rama ‘e qortoi’ për ‘lulin’, Ramushi ia ktheu me ‘arat’, ç’po ndodh me krisjen mes vëllazërisë

Kryeministri Edi Rama duket se ka një ‘rivalitet të hapur’ me ish-kryeministrin e Kosovës, Ramush Haradinaj. Akuzat, kundërpërgjigjet dhe shpërthimet ndaj tij, kanë qenë jo pak të shpeshta.

Çështja e “Ballkanit të Hapur” i hodhi më shumë benzinë zjarrit, kur kryeministri Rama i dha njëherë e mirë përgjigje akuzave që e etiketonin atë si ‘tradhtar’ duke mos lënë pa hedhur edhe nja dy kunja për Haradinajn.

Në një postim të publikuar pak kohë më parë, Rama rikujtoi fjalët ‘e papërshtatshme’ të ish-liderit kosovar gjatë bisedës së zhvilluar në zyrën e kancelares Angela Merkel ku ishte i pranishëm edhe presidenti francez Emmanuel Macron. Rama deklaronte me skepticizëm se Kosova s’mund të fitonte paqe e s’mund të njihej si shtet ‘duke i treguar babait arat e lulin’.

“Po a mund ta fitojë Kosova paqen përfundimtare dhe a mund të prosperojë kombi shqiptar, duke u ftohur e siç i themi ne, duke "i treguar babait arat", kur flet me Amerikën, Gjermaninë, Francën a me vetë Bashkimin Europian? E bëj këtë pyetje, sepse e kam jetuar në vetë të parë "tregimin e arave", deri në pikën që një lider kosovar i'a futi në sy të Merkelit e Macronit, "mu nuk më han luli për kta!" dhe mu aty e humbi rastin historik t'ia hiqte vizat Kosovës, të cilën e bëri lolo në sytë e aleatëve të saj të pazëvendësueshëm strategjikë me marrëzira kinse patriotike”, shkroi Rama duke iu referuar në mënyrë indirekte Haradinajt.

Nuk vonoi shumë as kundërpërgjigjia nga Kosova. Ish-ministri i Drejtësisë Selim Selimi ka publikuar një pjesë të bisedës nga zyra e Merkelit duke sqaruar kontekstin e ‘lulit’ të cilit i referohej Rama.

“Një bisedë në hollin e pritjes në Bundeskanzleramt (Zyren e Kancelares) ku isha prezent: Lideri X: Po hiqe at dreq takse. Është koha të rregulloni marrëdhëniet me Serbi. Lideri Y: Nuk asht veç pun’ takse. Para dy ditëve kesh në Mejë e ju kom borxh qatyne të rënëve me ju mbrojt gjakun e dinjitetin. Lideri X: Ka përfunduar ajo kohë duhet të heqësh taksën e të arrish marrëveshje: Lideri Y: Ti kqyri punt e tua se as lu*i sme han për ty”, shkruante Selimi në Facebook.

Përgjigjia e Haradinajt erdhi një ditë më vonë. Gjatë një interviste, Haradinaj i cilësoi ‘të pabaza’ akuzat e Ramës kundrejt tij, duke e vendosur ‘vëllain e tij’ në shënjestrën e ‘armikut’ që i rrezikoi ‘arat’ tokës mëmë (duke iu referuar Kosovës).

“Zhgënjimi i kryeministrit Rama ose ato që i thotë sot janë të pabazuara. Mendoj se në atë kohë ai ka qenë i rreshtuar gabim, pra për ndarjen e Kosovës për hapjen e kufijve të Kosovës, sigurisht që mjaft e rrezikshme për Ballkanin dhe do të na dërgonte në luftëra të reja. Jam detyruar t’i mbroj arat nga vëllai im Edi Rama”, deklaroi asokohe Haradinaj.

Po Ramushi ia tregoi vërtet ‘lulin’ Merkelit dhe Macronit?

Në një intervistë për ABC News, ish-kryeministri kosovar ka mohuar përdorimin e një fjalori të tillë para liderëve Perëndimorë, por nuk e ka përjashtuar mundësinë që me dikë tjetër e për më tepër me vetë Ramën mund ta ketë degraduar bisedën deri te ‘luli’, vetëm nëse ia kanë bërë për ‘borxh’.

“Jo, jo, nuk praktikohet një gjuhë e tillë me ata udhëheqës. Në biseda të ndërsjella me kryeministrin ose me ndonjë edhe mund të kem tejkaluar ndonjë komunikim, mund ta kem bërë, se njerëz jemi, nëse debatojmë. Por nuk kanë qenë pjesë e diskutimit me takime zyrtare, komunikimeve zyrtare me palë zyrtare. Edhe nëse përdor një gjuhë apo një qasje, mund të kem arsyet e duhura, nuk e bëj rastësi apo koicidencë, po nëse rrethanat më krijohen të tilla, po”, ka thënë Haradinaj.

Sa i përket vëllazërisë mes Ramës dhe Hardinajt, lajmet nuk janë aspak optimiste. Ish-lideri i Kosovës pohon se nuk ka komunikim me Ramën prej kohësh. Pra, duket se e kanë dhënë me kohë ‘divorcin’. Megjithatë Ramushi e konsideron ‘vëllanë e tij’, që para pak kohësh e akuzoi se ‘po i sulmonte arat’.

“Unë ka një kohë që nuk kam pas as takim, as diskutime dhe ndonjë temë të hapur me kryeministrin (Rama). Jam në opozitë prej një vit e ca. Jam me disa detyra të natyrave të tjera. E pashë se ai e kishte ndërlidhur në një rast, përvojën gjatë kohës që unë isha kryeministër, të komunikimeve të atëhershme, m’u duk e paarsyeshme. Kanë kaluar edhe kohë që atëherë, janë tema dhe rrethana të tjera”, ka thënë Haradinaj për ABC.