Padia për vjedhjen e të dhënave, prokurorët e SPAK në "konflikt interesi"; emrat e tyre pjesë e listës

Dyshimet e akuzat për vjedhjen e të dhënave nga sistemi “e-Albania” dhe përdorimi i tyre për fushatën e 25 prillit nga Partia Socialiste kanë ngjallur reagime të shumta nga qytetarë të thjeshtë por dhe nga opozita.

Partia Demokratike përgatiti padi ndaj Edi Ramës dhe PS-së për përdorimin e databazës së e-Albania, duke e konsideruar vepër penale dhe e ka dërguar në SPAK.

Mirëpo drejtuesi i SPAK dhe një pjesë e anëtarëve të kësaj strukture mund të konsiderohen në konflikt interesi me këtë çështje.

Lapsi.al shkruan se Arben Kraja është njëri nga 910 mijë qytetarët e Tiranës të cilëve u janë vjedhur të dhënat personale. Në kompjuterin e socialistëve gjendet numri i tij i telefonit, vendlindja, qendra ku voton, numri i ID, si edhe vendi ku punon. Njeriu që monitoron prokurorin e fortë, “patronazhist” i tij, quhet Ermal Pishtari. Në dokumentat e PS, siguruar nga Lapsi, ai përshkruhet si votues i kësaj force politike.  Jo vetëm tek kategoria “Preferenca” shkruhet PS-së, por edhe votimi i tij pro rilindjes konsiderohet “I sigurtë”.

Fakti që socialistët e konsiderojnë të tillë nuk vërteton anësinë politike të Arben Krajës dhe 12 prokurorëve që punojnë me të. Por ama në një hetim të mundshëm të kësaj çështjeje, ashtu sikurse pretendon PD-ja, shefi i SPAK dhe disa prej kolegëve të tij janë në konflikt interesi. Kjo për arsye se janë njëkohësisht edhe subjekt i dëmit që kanë shkaktuar rilindasit që pretendohet se u kanë vjedhur të dhënat personale dhe sepse në dokumente paraqiten si militantë socialistë. Nga tetë prokurorët e SPAK, 4 prej tyre figurojnë si votues të sigurtë të PS, 2 jo të sigurtë por me preferencë PS, dhe dy neutralë që nuk u dihet vota.

Seksioni Kundër Krimit të Organizuar

Altin Dumani

Vladimir Mara

Behar Dibra

Ened Nakuçi

Doloreza Musabelliu

Elida Kaçkini

Seksioni Kundër Korrupsionit

Edvin Kondili

Klodjan Braho

Enkeleda Millonai

Dritan Prençi

Sotir Kllapi

SPAK ka nisur verifikimet pas dyshimeve për nxjerrjen e të dhënave personale nga portali e- Albania dhe përdorimi i tyre, siç denoncoi dhe Partia Demkratike dje, për zgjedhjet e 25 Prillit. Mësohet se SPAK po verifikon nëse kjo database është vënë funksion të fushatës elektorale për zgjedhjet e 25 prillit. SPAK do të marrë kopjo të të dhënave te e-Albania në Kryeministri për të verifikuar nëse janë te njëjta me ato të publikuara.