Të jesh Sakoja e preferuar e Dakos: Historia e rënies së dy ‘kryetarëve’ të Durrësit për të ardhur te ‘Emirjana e shërbimeve’

Politiko.al

Emirjana Sako do të jetë 'emri' që do të garojë për të mbajtur postin e kryebashkiakes së Durrësit. Ajo është aktualisht kryetare e komanduar e kësaj Bashkie, pas largimit për ‘arsye shëndetësore’ të Zhyljen Varfajt nga detyra e nënkryetarit.

Sako u komandua fillimisht si nënkryetare pas largimit për një operacion të kryetarit tjetër të komanduar, Zhyljen Varfaj. Pas kthimit nga një operacion jashtë vendit Varfaj është tërhequr dhe vendin e tij si kryetare e komanduar e ka zënë Sako nepermjet nje votimi online te Keshillit Bashkiak. Njohës të shtresëzimeve dhe klaneve politike në Durrës thonë se E. Sako është investim i ish-kryetarit Vangjush Dako dhe mikut të tij, kreut të OSHEE, Ardian Çela.

Dyshja me pushtet në Durrës ka qenë e palumtur me kryetaren e Bashkisë që u zgjodh në garën pa kundërshtar të 2019. U deshën pak muaj pas zgjedhjes që ajo të largohej nga drejtimi. Tërmeti i 26 nëntorit bëri shumë dëme në Durrës, por duket se “mori edhe jetën politike” të Valbona Sakos. Ka mjaftuar një lapsus i saj gjatë një lidhjeje televizive që ka ngritur një stuhi komentesh e cila e ka detyruar të japë dorëheqjen.

Në një lidhje live me Top Channel, kryebashkiakja Sako tha se “jemi të kënaqur edhe me 50 viktima.” Duke nënkuptuar se me këtë tërmet 50 viktimat mund të kishin qenë edhe më shumë. Megjithatë strukturimi i fjalisë e ka ndëshkuar, të paktën në dukje Sakon.

“E lënduar nga reagimi i madh negativ ndaj një prononcimi që bëra, nën një stres që i kalon fuqitë e mia, jap dorëheqjen nga detyra e Kryetares së Bashkisë Durrës. shkroi ajo pas dorëheqjes.

Dorëheqja e saj, edhe sikur të vijë nga ndjeshëmria apo stresi, apo dhe nga presionet politike të brendshme të habit në një vend si Shqipëria, ku dorëheqjet janë një zhanër politik i panjohur. Edhe kur bëhen korrupsione të mëdha e jo më për gafa të pafajshme.

Më shumë se gafa, Sakon e fundosën korentet politike të qytetit-port, i dyti për nga rëndësia dhe fuqia ekonimike në vend pas Tiranës. Ajo ka qenë nën goditjet e palëve që luftonin për ta dominuar Durrësin.   

Me të njëjëtin mbiemër, por me më shumë fat, për shkak edhe të besimit të Vangjush Dakos për të cilin ka shërbyer si drejtoreshë e Shërbimeve publike, Emirjana Sako ka arritur të ‘rrëzojë’ edhe pasuesin e Sako tjetër, Varfin.

Në kushtet e një opozite të ndarë, E. Sako duket se e ka më të lehtë garën për në krye. Shto kësaj faktin se ajo ka aktualisht butonat dhe resurset e kryetares së Bashkisë së Durrësit. Sidomos mbështetjen e dyshes Dako-Çela.

Durrësi mbetet një bashki e lakmuar edhe më shumë aktualisht, për shkak të projektit për ndërtimin e portit të ri. Aty lidhen shumë interesa ekonomike të fuqishme. Aq i lakmuar është Durrësi, sa deputetja demokrate Grida Duma në një intervistë televizive, ka kërkuar hapur pazar për të, duke thënë se qeveria dhe opozita duhet të bëjnë një pakt, pse jo duke u ulur edhe për portin e ri të qytetit. Duma ka garuar për Durrësin në zgjedhjet e vitit 2015 dhe është mundur më një rezultat ‘publicitar’ nga Dako

Më shumë se kaq, shenja që jep Emirjana Sako si kryetare aktuale dhe kandidate për ta marrë Bashkinë edhe për katër vjet, është se dekriminalizimi dhe non grata amerikane nuk i largojnë aktorët politikë nga ndikimi. Ato thjesht i fusin në prapaskenë prej ku lëvizin fijet. Prej aty mund të jenë edhe më të rrezikshëm sepse nuk kanë përgjegjësi publike.