Flash News

GJKKO liron nga arresti shtëpiak Jamarbër Malltezin

Shkrumbohet nga zjarri urbani i linjës Tiranë-Kamëz

Në kërkim ndërkombëtar për trafik droge, arrestohet në Kroaci i riu shqiptar (EMRI)

Në zbatim të masës "detyrim paraqitje", Berisha mbërrin në SPAK

Rama nuk i ndahet Vlorës, sërish vizitë në bashki

E-TJERA

Parkut Natyror i Ohrit drejt “listës së zezë’” të UNESCO-s

Politiko 7 Korrik 2025, 10:25

Parkut Natyror i Ohrit drejt “listës së zezë’”

Java e ardhshme pritet të sjellë një vendim të rëndësishëm nga UNESCO, që do të zyrtarizojë vendosjen e Parkut Natyror të Ohrit në Listën e Trashëgimisë Botërore në Rrezik.

Ky zhvillim vjen si rezultat i një sërë ndërhyrjesh të papërshtatshme në zonën liqenore dhe mangësive serioze në menaxhimin dhe mbrojtjen e pasurisë natyrore dhe kulturore të rajonit, siç shkruan në Facebook Forumi për Mbrojtjen e Trashëgimisë Kulturore .

Në raportin e fundit të misionit të vitit 2024, UNESCO konfirmon gjetjet e mëparshme duke ngritur alarmin për ndikimet kumulative dhe të vazhdueshme që kanë përkeqësuar gjendjen e zonës. Raporti paralajmëron se nëse nuk merren masa të menjëhershme dhe vendimtare, degradimi i parkut mund të bëhet i pakthyeshëm.

"Misioni i vitit 2024 konfirmon gjetjet e misioneve të mëparshme, duke arritur në përfundimin se ndikimet kumulative dhe të vazhdueshme - duke përfshirë zhvillimin urban, mangësitë në planifikimin hapësinor, ndërhyrjet e papërshtatshme, eutrofikimin e liqenit, infrastrukturën në shkallë të gjerë dhe projekte të tjera kanë shkaktuar përkeqësim serioz të atributeve kryesore të parkut, duke rezultuar në degradim të pakthyeshëm nëse nuk merren masa vendimtare, dhe konsideron se kushtet për regjistrimin e pronës në Listën e Trashëgimisë Botërore në Rrezik janë përmbushur, në përputhje me paragrafët 179-180 të Udhëzimeve Operacionale", theksohet në raportin e misionit të UNESCO-s.

Ironikisht, kjo situatë vjen ndërsa autoritetet shqiptare e kanë promovuar Planin e Menaxhimit të përgatitur nga AADF (Fondacioni Shqiptaro-Amerikan për Zhvillim) në bashkëpunim me Ministrinë e Turizmit dhe Mjedisit si një sukses institucional. Në praktikë, ky plan dhe vendimmarrjet që e shoqërojnë kanë rezultuar në legalizimin e ndërhyrjeve që kontribuojnë në degradimin e zonës, në vend që ta mbrojnë atë.

Zonat natyrore si Parku i Ohrit kërkojnë jo vetëm promovim turistik, por mbrojtje reale, transparente dhe në përputhje me standardet ndërkombëtare. Ky status i ri nga UNESCO, megjithëse shqetësues, mund të shërbejë si një sinjal alarmi për të rishikuar rrënjësisht politikat e menaxhimit dhe për të ndalur shkatërrimin e një prej pasurive më të çmuara natyrore dhe kulturore të Shqipërisë.